Iosua 24:1-33
24 Ona faapotopoto faatasi lea e Iosua o ituaiga uma o Isaraelu i Sekema, ma aami toeaina o Isaraelu, o ulu o aiga, o faamasino, ma alii,+ ona latou ō mai ai lea ma tutū i luma o le Atua moni.
2 Ua faapea atu Iosua i le nuu uma: “O le mea lenei ua fetalai mai ai Ieova le Atua o Isaraelu, ‘O le isi itu o le Vaitafe* na nonofo ai o outou augātamā+ i aso anamua,+ o Tara le tamā o Aperaamo, o le tamā foʻi o Nakori, ma na latou auauna ai i isi atua.+
3 “‘Mulimuli ane, na ou aumaia lo outou augātamā o Aperaamo+ mai i le isi itu o le Vaitafe,* ma tuu atu o ia e fealuaʻi i le laueleele atoa o Kanana, ma faatoʻateleina lana fanau.+ Na ou foaʻiina atu iā te ia o Isaako.+
4 Na ou foaʻiina atu iā Isaako o Iakopo ma Esau.+ Mulimuli ane, ona ou avatu lea iā Esau o le mauga o Seira e fai ma ona tofi;+ ae na ō ifo Iakopo ma lana fanau i Aikupito.+
5 Mulimuli ane, ona ou aauina atu lea o Mose ma Arona,+ ma ou taia Aikupito i mala;+ ona ou aumaia ai lea o outou.
6 Ina ua ou aumaia o outou tamā mai i Aikupito+ ma latou ui mai i le sami, ona tuliloa mai lea e tagata Aikupito o o outou tamā i kariota o le taua ma ʻautau, seʻia oo i le Sami Ulaula.+
7 Ua latou alalaga mai iā te aʻu, o Ieova,+ ona ou tuu lea o le pōuliuli i le vā o outou ma tagata Aikupito, ma faatafe mai le sami i o latou luga ma ufitia ai i latou,+ na vāai foʻi o outou mata i mea na ou faia i Aikupito;+ ma outou nonofo ai i le toafa mo tausaga* e tele.+
8 “‘Na ou aumaia outou i le laueleele o tagata Amorī, o ē na nonofo i le isi itu* o Ioritana, ma na latou siitaua mai iā te outou.+ Ae na ou tuuina atu i latou i o outou lima, ina ia fai mo outou lo latou laueleele, ma na ou faaumatia i latou mai i o outou luma.+
9 Ona tulaʻi lea o Palako le atalii o Seporu le tupu o Moapi, ma siitaua iā Isaraelu. Ona ia aami lea o Palaamo le atalii o Peoro e fetuu iā te outou.+
10 Ae ou te leʻi fia faalogo iā Palaamo.+ O lea, na ia faamanuia atu pea iā te outou,+ ma na ou laveaʻiina ai outou mai i lona lima.+
11 “‘Ona outou sopoʻia lea o Ioritana+ ma ō mai i Ieriko.+ Na siitaua atu iā te outou taʻitaʻi* o Ieriko, o tagata Amorī, o tagata Perisē, o tagata Kanana, o tagata Hetī, o tagata Kirekasē, o tagata Hivī, ma tagata Iepusē; ae na ou tuuina atu i latou i o outou lima.+
12 Ona ou faaoo atu lea o le mataʻu e muamua iā te outou, ma oo ina tutuliesea ai i latou mai i o outou luma,+ e pei ona faia i tupu e toʻalua o Amorī. E leʻi tuliesea ona o lau pelu po o lau ʻaufana.+
13 Ua ou avatu iā te outou se nuu e tou te leʻi tigāina e galueaʻiina, ma aai tou te leʻi fausia+ e tou te nonofo ai. Ua outou aai foʻi i togāvine ma togāolive tou te leʻi totōina.’+
14 “O lea, ia outou matataʻu iā Ieova ma auauna iā te ia ma le lē taʻuleagaina ma le faamaoni,+ ma aveese atua ia na auauna i ai o outou augātamā i le isi itu o le Vaitafe* ma Aikupito,+ ae ia auauna iā Ieova.
15 O lenei, afai e leaga iā te outou le auauna iā Ieova, inā outou filifili ia i le aso nei po o ai e tou te auauna i ai,+ po o atua na auauna i ai o outou augātamā i le isi itu o le Vaitafe,*+ po o atua o tagata Amorī o ē e ona le laueleele o loo outou nonofo ai.+ A o aʻu ma loʻu aiga, e matou te auauna iā Ieova.”
16 Ona tali mai lea o le nuu: “Ia mamao iā i matou ona matou tuua Ieova ae auauna i isi atua.
17 Auā o Ieova lo tatou Atua na aumaia i tatou ma o tatou tamā mai i le nuu o Aikupito,+ mai i le mea na nonofo pologa ai,+ o lē na faia nei faailoga tetele i o tatou luma,+ o lē na leoleoina pea i tatou i le ala na tatou savavali ai, ma nuu uma na tatou uia.+
18 Na tuliesea foʻi e Ieova mai i o tatou luma o tagata uma, e oo lava i tagata Amorī sa nonofo i le laueleele. O lea, e matou te auauna foʻi iā Ieova, auā o ia o lo tatou Atua.”
19 Ona fai atu lea o Iosua i le nuu: “E lē mafai ona outou auauna iā Ieova, auā o ia o le Atua paia;+ o le Atua e finagalo e tapuaʻi atu tau lava o ia.+ E na te lē faamagaloina a outou solitulafono* ma a outou agasala.+
20 Ae afai e tou te tuua Ieova ma outou auauna i atua ese, o le a liliu mai lava o ia, ma faaumatia outou, ina ua uma ona ia faia o mea lelei iā te outou.”+
21 Ae ua faapea mai le nuu iā Iosua: “E leai, e matou te auauna lava iā Ieova!”+
22 Ona fai atu lea o Iosua i le nuu: “O molimau outou iā te outou lava, auā o outou lava ua outou filifili e auauna iā Ieova.”+ Ona latou faapea mai lea: “O molimau i matou.”
23 “O lenei, inā aveese ia o atua ese o loo iā te outou, ma ia uaʻi atu o outou loto iā Ieova le Atua o Isaraelu.”
24 Ona faapea mai lea o le nuu iā Iosua: “O Ieova lo tatou Atua e matou te auauna i ai, o lona siʻufofoga foʻi e matou te faalogo i ai!”
25 Ona osia lea e Iosua o se feagaiga ma le nuu i lenā aso, ma tuuina atu iā i latou poloaʻiga ma iʻuga o faamasinoga i Sekema.
26 Ua tusia e Iosua nei upu i le tusi o le Tulafono a le Atua,+ ma ave se maa telē+ ma tuu ai i inā i lalo o le laau telē, lea e i tafatafa o le nofoaga ua faapaiaina e Ieova.
27 Ona faapea atu lea o Iosua i le nuu uma: “Faauta! Ua avea lenei maa ma molimau iā i tatou,+ auā ua ia faalogo i fetalaiga uma a Ieova na fetalai mai ai iā i tatou, ma e fai foʻi ma molimau iā te outou, ina neʻi outou faafitia lo outou Atua.”
28 Ona tuu atu lea e Iosua o le nuu e ō, e taʻitoʻatasi i lona tofi.+
29 Ua mavae nei mea, ona maliu ai lea o Iosua le atalii o Nuno le auauna a Ieova, i le 110 o ona tausaga.+
30 Ua latou tanu o ia i le laueleele o lona tofi i Timenata-sera,+ i le vaega maugā o Efaraima, i le itu i mātū o le mauga o Kaasa.
31 Sa auauna pea le nuu o Isaraelu iā Ieova i aso uma o Iosua, ma aso uma o toeaina o ē na iai pea ina ua mavae Iosua, o ē na iloa galuega uma na faia e Ieova iā Isaraelu.+
32 O ivi foʻi o Iosefa+ ia na aumai e le fanauga a Isaraelu mai i Aikupito, na latou tanu i Sekema i le fasi fanua lea na faatau e Iakopo i tupe e 100+ mai i le fanauga a Hamoro+ le tamā o Sekema; ma ua avea ma tofi o le fanauga a Iosefa.+
33 Ua oti foʻi Eleasaro le atalii o Arona,+ ona latou tanu lea o ia i le aʻega o Fineaso lona atalii,+ lea na tuuina atu iā te ia i le vaega maugā o Efaraima.
Faamatalaga Pito i Lalo
^ E faasino atu i le vaitafe o Eufirate.
^ E faasino atu i le vaitafe o Eufirate.
^ Epe., “aso.”
^ E faasino atu i le itu i sasaʻe.
^ Pe atonu “ē e ona fanua.”
^ E faasino atu i le vaitafe o Eufirate.
^ E faasino atu i le vaitafe o Eufirate.
^ Po o “fouvalega.”
