Iosua 4:1-24
-
Maa e fai ma faamanatu (1-24)
4 Ina ua uma ona sopoʻia e le nuu atoa le vaitafe o Ioritana, ona fetalai mai lea o Ieova iā Iosua:
2 “Inā ave ia ni tamāloloa se toʻa 12 mai i le nuu, e taʻitoʻatasi mai i le ituaiga,+
3 ma poloaʻi atu iā i latou e faapea, ‘Ia outou ave ni maa se 12 mai i le ogatotonu o Ioritana, mai i le mea na tutū ai ositaulaga e lē gaoioi,+ ia outou avatu nei maa ma tuu i le mea o le a outou api ai i le pō a nanei.’”+
4 Ua valaau atu Iosua i tamāloloa e toʻa 12 na ia tofia mai i le fanauga a Isaraelu, e taʻito‘atasi mai i le ituaiga,
5 ona fai atu lea o Iosua iā i latou: “Ia muamua atu i le Atolaau a Ieova lo outou Atua, ma ia ō atu i le ogatotonu o le vaitafe o Ioritana, ona taʻitasi lea o outou ma sii aʻe i luga se maa i lona tauʻau, e tusa ma le aofaʻi o ituaiga o le fanauga a Isaraelu,
6 ina ia fai ma faailoga iā te outou. Pe a fesili mai foʻi a outou fanau* i se taimi o i luma e faapea, ‘Aiseā ua outou tuu ai i inei nei maa?’+
7 Ia outou faapea atu iā i latou, ‘Auā na lē toe tafe le vaitafe o Ioritana i luma o le atolaau+ o le feagaiga a Ieova. Ina ua sopoʻia atu e le atolaau le vaitafe o Ioritana, ona lē toe tafe ai lea o le vai, ma e fai pea nei maa ma faamanatuga i le fanauga a Isaraelu i taimi uma.’”+
8 Ua faapea foʻi ona faia e le fanauga a Isaraelu e pei ona poloaʻi atu ai Iosua. Na latou ave maa e 12 mai i le ogatotonu o le vaitafe o Ioritana, e pei ona fetalai mai ai Ieova iā Iosua, e tusa ma le aofaʻi o ituaiga o le fanauga a Isaraelu. Na latou ave foʻi na maa ma tuu i le mea na latou api ai.
9 Na ati foʻi e Iosua maa e 12 i le ogatotonu o le vaitafe o Ioritana, i le mea na tutū ai ositaulaga na aveina le atolaau o le feagaiga,+ ma o loo iai pea i inā e oo mai i aso nei.
10 Na tutū foʻi i le ogatotonu o le vaitafe o Ioritana ositaulaga na aveina le Atolaau, seʻia oo ina māeʻa mea uma na fetalai mai ai Ieova iā Iosua e taʻu atu i le nuu, e tusa ma mea uma na poloaʻi atu ai Mose iā Iosua. A o le taimi lea, ua ō atu faavave le nuu ma latou sopoʻia atu.
11 Ina ua uma ona sopoʻia e le nuu atoa le vaitafe, ona sopo‘ia atu lea e ositaulaga ma le Atolaau a Ieova le vaitafe a o vāai mai i ai le nuu.+
12 Na sopo atu foʻi le fanauga a Reupena, o le fanauga a Kato, ma le ʻafa o le ituaiga o Manase e pei o se ʻautau,+ e muamua atu i le fanauga a Isaraelu, e pei ona taʻu atu e Mose iā i latou.+
13 E tusa ma le 40,000 tagata faaauupegaina mo le taua na sopo atu i luma o Ieova e agaʻi i fanua laugatasi o le toafa o Ieriko.
14 O le aso lava lea na faamamaluina ai e Ieova Iosua i luma o Isaraelu uma,+ ma latou matuā faaaloalo* ai iā Iosua i aso uma o lona ola, e pei lava ona latou matuā faaaloalo iā Mose.+
15 Ona fetalai mai lea o Ieova iā Iosua:
16 “Ia e fai atu i ositaulaga o ē o loo aveina le atolaau+ o le feagaiga,* ina ia latou ō aʻe mai i le vaitafe o Ioritana.”
17 Ona poloaʻi atu lea o Iosua i ositaulaga: “Inā ō aʻe ia mai i le vaitafe o Ioritana.”
18 Ina ua ō aʻe ositaulaga na aveina le atolaau+ o le feagaiga a Ieova mai i le ogatotonu o le vaitafe o Ioritana, ma ua papa‘i o latou alofivae i le eleele mātūtū, ona toe tafe mai lea o le vai o Ioritana ma ua lofia ai ona auvai+ e pei ona iai muamua.
19 Na ō aʻe tagata mai i le vaitafe o Ioritana i le aso sefulu o le masina muamua, ma tolauapi i Kilikala+ i le itu i sasaʻe o le tuaoi o Ieriko.
20 Na faatūina foʻi e Iosua i Kilikala o maa e 12 na latou ave aʻe mai i le vaitafe o Ioritana.+
21 Ua ia faapea atu foʻi i le fanauga a Isaraelu: “Pe a fesili atu a outou fanau i o latou tamā i se aso o i luma, ‘O le ā le uiga o nei maa?’+
22 ia outou faailoa atu i a outou fanau e faapea: ‘Na sopoʻia e Isaraelu le ilitivai mātūtū o le vaitafe o Ioritana,+
23 ina ua faapaʻumātūina e Ieova lo outou Atua vai o Ioritana i o latou luma seʻia o latou sopoʻia atu, e pei ona faia e Ieova lo outou Atua i le Sami Ulaula, ina ua ia faapaʻumātūina i o tatou luma seʻia oo ina tatou sopo‘ia atu.+
24 Na ia faia faapea ina ia iloa ai e nuu uma o le lalolagi e malosi le aao o Ieova;+ ma ia outou matataʻu ai pea iā Ieova lo outou Atua.’”
