Iosua 5:1-15
5 Ua faalogo tupu uma o tagata Amorī+ o ē na i le itu i sisifo* o le vaitafe o Ioritana, ma tupu uma o Kanana+ o ē o loo i tafatafa o le sami e faapea, na faapa‘umātūina e Ieova vai o Ioritana i luma o le fanauga a Isaraelu seʻia o latou sopoʻia atu. Ona vaivai ai lea o o latou loto,+ ma ua lē toe iai se malosi iā i latou ona o le fanauga a Isaraelu.+
2 O le taimi lea na fetalai mai ai Ieova iā Iosua e faapea: “Ia e faia mo oe ni naifi* ma toe peritomeina+ tane o Isaraelu, o le faalua ai lea.”
3 Ona faia lea e Iosua o naifi ma peritome ai tane o Isaraelu i Kipea-aralota.*+
4 O le māfuaaga lenei na faia ai e Iosua le peritomega: auā o tane uma na tuua Aikupito, o tamāloloa uma o le taua,* na feoti i le toafa a o latou iai i le ala ina ua tuua Aikupito.+
5 O tagata uma na ō ese mai i Aikupito na peritomeina i latou, a o tagata uma na fananau i le ala i le toafa, e leʻi peritomeina.
6 Auā na feoaʻi le fanauga a Isaraelu i le toafa i tausaga e 40,+ seʻia oo ina feoti tane uma o le taua na tuua Aikupito, o ē e leʻi usitaʻi i le siʻufofoga o Ieova,+ o ē na tautō i ai Ieova o le a lē vāai i le nuu+ na tautō ai Ieova i o latou augātamā e foaʻiina mai i ona tagata,*+ o le laueleele o loo tafe ai le suāsusu ma le meli.+
7 O lea na ia aumaia ai o latou atalii i le nuu e sui ai i latou.+ Na peritomeina e Iosua o latou atalii, auā e leʻi peritomeina i latou i le ala.
8 Ina ua uma ona peritomeina o le nuu uma, ona latou nonofo ai lea i le togālauapi seʻia toe malolosi.
9 Ona fetalai mai lea o Ieova iā Iosua: “O le asō ua ou aveesea ai le faalumaina o outou e Aikupito.” O le mea lea na faaigoa ai lenei nofoaga o Kilikala,*+ e oo mai i aso nei.
10 Ua tolauapi pea le fanauga a Isaraelu i Kilikala, ma ua latou faia foʻi le Paseka i le afiafipō o le aso lona 14 o le masina,+ i fanua laugatasi o le toafa o Ieriko.
11 I le aso ina ua mavae le Paseka, na amata ai ona latou aai i fua o le laueleele, o le aso lava lea na aai ai i falaoa e lē faafefeteina+ ma saito* tunu.
12 Na lē toe iai le manai i le aso na latou aai ai mai i fua o le laueleele, e leʻi toe maua foʻi le manai mo le fanauga a Isaraelu,+ ae ua latou aai i fua o le laueleele o le nuu o Kanana i lenā tausaga.+
13 Ina ua latalata atu Iosua i Ieriko, ona ia tepa aʻe lea ma iloa atu, o loo tū mai se tagata+ i ona luma o loo uu lana pelu i lona lima.+ Ua savali atu Iosua iā te ia ma faapea atu: “Pe e te ʻau ma i matou po o matou fili?”
14 Ona tali mai lea o ia: “E leai, ae ua ou sau, o aʻu o le ta‘ita‘i* o le ʻautau a Ieova.”+ Ona faapaʻū faō lea o Iosua i le eleele, ua ifo ma faapea atu iā te ia: “O le ā le fetalaiga a loʻu alii i lana auauna?”
15 Ona tali mai lea o le ta‘ita‘i o le ʻautau a Ieova iā Iosua: “Ia aveese ou seevae mai i ou vae, auā e paia le mea o loo e tū ai.” Ona faia loa lea faapea e Iosua.+
Faamatalaga Pito i Lalo
^ Epe., “itu agaʻi i le sami.”
^ Epe., “naifi e faia i le maa.”
^ Lona uiga “Aʻega o Paʻu.” O le “Paʻu” e faasino atu i le paʻu o totogasā o tamāloloa.
^ Po o “tamāloloa uma na ausia tausaga faatulagaina mo le vaegaʻau.”
^ Epe., “iā i tatou.”
^ Lona uiga “Faataavale; Faataavale Ese.”
^ Pe atonu “karite.”
^ Epe., “perenise.”
