Iosua 8:1-35
8 Ona fetalai mai lea o Ieova iā Iosua: “Aua e te fefe pe e te mataʻu.+ Ia e ave tagata totoa uma, ma ō aʻe i Ai. Vaai foʻi, ua ou tuuina atu i ou lima le tupu o Ai, o ona tagata, o lona aai, ma lona laueleele.+
2 Ia e faia iā Ai ma lona tupu e pei ona e faia foʻi iā Ieriko ma lona tupu.+ Ia ave foʻi ma outou le vete ma lafumanu. Ia ave foʻi sa outou ʻautau e faalalafi i tua o le aai.”
3 Ona tulaʻi lea o Iosua ma tagata totoa uma ma ō aʻe i Ai, ma ua filifilia e Iosua tagata totoa malolosi e toʻa 30,000 ma aauina atu i latou i le pō.
4 Ua ia poloaʻi atu foʻi iā i latou: “Ia outou lalafi i tua o le aai. Aua neʻi ō ese mamao atu mai i le aai, ma ia outou nofosauni uma.
5 A o aʻu, ma tagata uma o faatasi ma aʻu, matou te faalatalata atu i le aai. Pe a latou ō mai e osofa‘i i matou e pei o le taimi muamua,+ ona matou sosola lea mai i o latou luma.
6 Pe a latou mulimuli mai iā i matou, ona matou tataʻi ese lea o i latou mai i le aai, auā o le a latou faapea ifo, ‘Ua latou sosola mai i o tatou luma e pei o le taimi muamua.’+ Ona matou sosola ai lea mai iā i latou.
7 A o outou, tou te ō ese mai i le mea na outou lalafi ai ma ō atu e faoa le aai; e tuuina mai lava e Ieova lo outou Atua le aai i o outou lima.
8 Pe a outou faoa le aai, ona outou susunuina loa lea i le afi.+ Ia outou faia e tusa ma le afioga a Ieova. Faauta, ua ou poloaʻi atu ai iā te outou.”
9 Ona aauina atu lea o i latou e Iosua ma agaʻi atu i le nofoaga e lalafi ai, ma nonofo ai i le vā o Peteli ma Ai i le itu i sisifo o Ai, ae ua nofo pea Iosua i lenā pō faatasi ma isi tagata totoa.
10 Ona tulaʻi lea o Iosua i le taeaopō ma faamaopoopo tagata totoa ma latou ō aʻe, o ia ma toeaina o Isaraelu e ō agaʻi i Ai.
11 O tagata totoa uma+ o ē o loo faatasi ma ia, ua latou ō aʻe ma faalatalata atu i luma o le aai, ma tolauapi ai i le itu i mātū o Ai, e na o le vanu e vā ai i latou ma Ai.
12 I le taimi lea, ua uma ona ia aauina atu ni tamāloloa pe tusa ma le toʻa 5,000 ma faalalafi+ i le vā o Peteli+ ma Ai, i le itu i sisifo o Ai.
13 Ona tuu lea o tagata o le vaega autū o le ʻautau i le itu i mātū o le aai,+ a o le isi vaega uma i le itu i sisifo o le aai.+ Ona alu lea o Iosua i le ogatotonu o le vanu* i lenā pō.
14 Ina ua iloa e le tupu o Ai, ona tulaʻi faavave lea o ia ma tamāloloa o le aai i le taeaopō ma ō atu e faafetaiaʻi iā Isaraelu i le taua, i se nofoaga e iloa atu ai le fanua laugatasi o le toafa. Ae ua ia lē iloa le ʻautau na lalafi i tua o le aai e tau faasaga iā te ia.
15 Ina ua osofa‘i atu tamāloloa o Ai, ona sosola ai lea o Iosua ma Isaraelu uma e agaʻi i le toafa.+
16 Ona faatonuina lea o tagata uma o loo i le aai e tuliloa iā te i latou; ua latou tuliloa iā Iosua ma ō ese atu ai mai i le aai.
17 E leai ma se tane na totoe i Ai ma Peteli, ae na ō atu uma e tuliloa iā Isaraelu, ma ua tuua ai le aai e aunoa ma se puipuiga.
18 Ona fetalai mai lea o Ieova iā Iosua: “Inā faaloaloa atu ia le tao o loo i lou lima agaʻi i Ai,+ auā ou te tuuina atu i lou lima le aai.”+ Ona faaloaloa lea e Iosua o le tao sa i lona lima i le aai.
19 O le taimi lava na faaloaloa atu ai lona lima, ona feosofi vave mai ai lea o ʻautau mai i mea na lalafi ai, ma taufetuli atu loa ua latou ulu atu ma faoa le aai. Ua faanatinati ona latou susunuina le aai.+
20 Ina ua tetepa i tua tagata o Ai, ona latou iloa atu lea ua alu aʻe i le lagi le asu o le aai, ma ua leai foʻi so latou malosi e toe sosola ai i se isi ala. Ona toe liliu mai lea o tagata na sosola i le toafa, i ē o loo tuliloaina atu i latou.
21 Ua iloa atu e Iosua ma Isaraelu uma ua faoa le aai e ʻautau na lalafi, ma ua alu aʻe lona asu, ona latou toe liliu mai lea ma osofa‘ia tane o Ai.
22 Ua ō mai foʻi i latou na faoa le aai e faafetaiaʻi tane o Ai, ina ia latou iai i le vā o Isaraelu, o isi i lenei itu ma isi i lenā itu, ma latou fasiotia i latou seʻia oo ina lē toe iai se tasi na sao mai, po o sē na sola ese.+
23 Ae ua latou pu‘eolaina le tupu o Ai+ ma aumai iā Iosua.
24 Ina ua uma ona fasiotia e Isaraelu o tagata uma o Ai i le toafa na latou tuliloaina ai le ‘autau a Isaraelu, ma ua fasiotia i latou uma i le pelu, ona toe foʻi lea o Isaraelu i Ai ma fasia i le pelu.
25 O i latou uma na fasiotia i lenā aso e toʻa 12,000, o tamāloloa ma fafine, o tagata uma o Ai.
26 E leʻi tuua lava i lalo e Iosua lona lima na faaloaloa ai le tao,+ seʻia oo ina faaumatia uma i latou na nonofo i Ai.+
27 E na o lafumanu ma le vete o lenā aai na ave e Isaraelu mo i latou, e tusa ai ma le poloaʻiga a Ieova iā Iosua.+
28 Ona susunuina lea e Iosua o Ai ma ua avea o se faaputuga o maa,+ e oo mai lava i aso nei.
29 Na ia faatautau foʻi le tupu o Ai i le laau seʻia oo i le afiafi; ae ina ua lata ina goto le lā, ona poloaʻi atu lea o Iosua e ave ifo lona tino oti mai i le laau.+ Ona latou lafoina lea i le faitotoʻa e ulu atu ai i le aai, ma tuu ai se faaputuga maa i ona luga, lea o loo iai e oo mai i aso nei.
30 Ona fausia lea e Iosua o se fata faitaulaga iā Ieova le Atua o Isaraelu, i le mauga o Evalu,+
31 e pei ona poloaʻi mai ai le auauna a Ieova o Mose i tagata Isaraelu. E pei fo‘i ona tusia i le tusi o le Tulafono+ a Mose: “O se fata faitaulaga o maa atoatoa e le‘i tipiina i se meafaigaluega u‘amea.”+ Na latou ofoina atu ai foʻi taulaga mū iā Ieova ma taulaga faifaatasi.+
32 Ona ia tusia lea i luga o maa o se kopi o le Tulafono,+ lea na tusia e Mose i luma o tagata Isaraelu.+
33 Ua tutū foʻi Isaraelu uma, o toeaina, o alii, ma o latou faamasino i itu e lua o le Atolaau i luma o ositaulaga sa Levī, o ē o loo aveina le atolaau o le feagaiga a Ieova. Na iai fo‘i tagata ese, atoa ai ma tagatānuu.+ O le isi ʻafa o i latou i luma o le mauga o Keresema, ma le isi ʻafa i luma o le mauga o Evalu+ (e pei ona poloaʻi mai ai le auauna a Ieova o Mose),+ ina ia faamanuiaina ai tagata o Isaraelu.
34 Ona ia faitau leotele lea o upu uma o le Tulafono,+ o le manuia+ ma le malaia,+ e tusa ai ma mea uma o loo tusia i le tusi o le Tulafono.
35 E leai se upu o upu uma na poloaʻi mai ai Mose, e leʻi faitauina leotele atu e Iosua i luma o le faapotopotoga uma o Isaraelu,+ o fafine, o fanau iti, ma tagata ese+ na iai* faatasi ma i latou.+
