Iosua 9:1-27
9 Ina ua faalogo tupu uma sa i le itu i sisifo o Ioritana+ i lenei mea, o ē sa i vaega maugā, i Sefila,* i le talafatai atoa o le Sami Tele,*+ faapea ma ē sa feagai ma Lepanona, o tagata Hetī, o tagata Amorī, o tagata Kanana, o tagata Perisē, o tagata Hivī, ma tagata Iepusē,+
2 ona latou ʻau faatasi ai lea e siitaua atu iā Iosua ma Isaraelu.+
3 Ua faalogo foʻi tagata o Kipeona+ i le mea na faia e Iosua iā Ieriko+ ma Ai.+
4 Ona latou gaoioi lea ma le faautauta, ua ave a latou meaʻai i taga tuai ua masaesae ma tuu i luga o a latou asini, faapea ma fagupa‘u uaina ua pāpā na latou fonoina,
5 ma ua see i seevae masaesae ua fonofono, ma oofu i ofu tuai; o falaoa uma foʻi mo a latou meaʻai, ua magumagu ma ua nuti.
6 Ona latou ō atu lea iā Iosua i le togālauapi i Kilikala,+ ma faapea atu iā te ia ma tamāloloa o Isaraelu: “Ua matou ō mai i se nuu mamao lava. O lea, ia outou osia se feagaiga ma i matou.”
7 Ae ua fai mai tamāloloa o Isaraelu i tagata Hivī:*+ “Atonu e tou te nonofo latalata mai lava iā i matou. E faapefea la ona matou osia se feagaiga ma outou?”+
8 Ona latou tali atu lea iā Iosua: “O matou o au auauna.”*
Ona fai mai lea o Iosua iā i latou: “O ai ea outou, ma o fea foʻi tou te ō mai ai?”
9 Ona latou faapea atu lea iā Iosua: “E mamao lava le nuu+ e ō mai ai au auauna ona o le suafa o Ieova lou Atua, auā ua matou faalogo i lona taʻutaʻua ma mea uma na ia faia i Aikupito,+
10 ma mea uma na ia faia i tupu e toʻalua o tagata Amorī o ē sa i le isi itu* o Ioritana, o Sekono+ le tupu o Hesepona, ma Oko+ le tupu o Vasana, o lē sa i Aserota.
11 O le mea lenei ua fai mai ai o matou toeaina, ma tagata uma o lo matou nuu iā i matou, ‘Ia outou ave ni meaʻai mo le malaga ma ō atu e faafeiloa‘i i latou, ma ia outou fai atu iā i latou: “Ia fai i matou ma a outou auauna.+ O lea, ia outou osia se feagaiga ma i matou.”’+
12 O a matou falaoa nei, sa vevela ina ua matou tuua o matou fale i le aso na matou ō mai ai iā te outou, ae vaai! ua magumagu ma ua nuti.+
13 O fagupa‘u uaina foʻi nei na matou faatutumuina a o fou, ae vaai! ua pāpā,+ ua masaesae foʻi o matou ofu ma seevae ona o le mamao o le mea matou te ō mai ai.”
14 Ona iloilo lea e tamāloloa Isaraelu nisi o a latou meaʻai, ae e latou te leʻi fesili atu iā Ieova.+
15 Na faia e Iosua se leleiga ma i latou,+ ma osia se feagaiga ina ia lē fasiotia i latou, ona tautō ai lea o taʻitaʻi o le faapotopotoga iā i latou.+
16 Ae ina ua mavae aso e tolu talu ona osia le feagaiga ma i latou, ona faalogo ai lea o tagata Isaraelu e latou te nonofo latalata ane.
17 Ona ō atu ai lea o tagata Isaraelu i o latou aai i le aso lona tolu, o o latou aai o Kipeona,+ o Kafira, o Perota, ma Kiriata-iarima.+
18 E leʻi fasiotia foʻi i latou e tagata Isaraelu, auā na tautō taʻitaʻi o le faapotopotoga iā i latou i le suafa o Ieova+ le Atua o Isaraelu. Ona muimui ai lea o le faapotopotoga i taʻitaʻi.
19 Ona fai atu lea o taʻitaʻi uma i le faapotopotoga: “Talu ai na matou tautō atu iā i latou i le suafa o Ieova le Atua o Isaraelu, o le mea lea e lē mafai ai ona tatou fasia i latou.
20 O le mea lenei o le a tatou faia: O le a tatou lē fasiotia i latou, ina neʻi oo mai iā i tatou le toʻasā ona o le tautoga na tatou tautō ai iā i latou.”+
21 Ona fai atu lea o taʻitaʻi: “Ia ola pea i latou, ae ia avea ma ē e fai fafie ma asu vai mo le faapotopotoga uma.” O le mea lea na folafola atu e taʻitaʻi iā i latou.
22 Ona valaau atu lea o Iosua iā i latou ma faapea atu: “Aiseā ua outou ʻolegia ai i matou i le faapea mai, ‘E mamao lava le mea e matou te ō mai ai,’ ae o loo outou nonofo latalata mai lava?+
23 O lenei, o outou o tagata ua faamalaiaina,+ o le a avea pea outou ma pologa, ma ē e fai fafie ma asu vai mo le fale o loʻu Atua.”
24 Ona latou tali mai lea iā Iosua: “Auā na faailoa manino mai i au auauna, na poloaʻi Ieova lo outou Atua i lana auauna o Mose e avatu iā te outou le nuu uma, ma ia tafiesea ē uma o loo i le nuu mai i o outou luma.+ O le mea lea ua matou matuā fefefe ai ona o outou ina neʻi o matou oti,+ ma matou faia ai loa lenei mea.+
25 O i matou nei ua i ou lima, o le mea e lelei ma tonu iā te oe e faia iā i matou, ia faia faapea.”
26 Ona ia faia lea faapea iā i latou, ma laveaʻi i latou mai i lima o tagata Isaraelu, e leʻi fasiotia foʻi i latou.
27 Ona faia lea e Iosua o i latou i lenā aso ma ē e fai fafie, ma ē e asu vai mo le faapotopotoga+ ma le fata faitaulaga a Ieova, i le nofoaga e filifilia e le Atua.+ Ua latou faia faapea e oo mai i aso nei.+
Faamatalaga Pito i Lalo
^ E faasino atu i le Metitirani.
^ Po o “le fanua maulalo.”
^ O le taimi lea o loo nofoia Kipeona e tagata Hivī.
^ Po o “pologa.”
^ E faasino atu i le itu i sasaʻe.
