Isaia 38:1-22
38 I na aso, na maʻi ai Esekia ma ua toetoe lava a oti.+ Ona sau ai lea iā te ia o le perofeta o Isaia+ le atalii o Amota, ma ua faapea mai: “O le mea lenei ua fetalai mai ai Ieova, ‘Inā fai atu ia ni faatonuga i lou aiga, auā o le a e oti lava, e te lē toe malosi.’”+
2 Ona faasaga lea o Esekia i le puipui, ma ua tatalo atu iā Ieova e faapea:
3 “Ieova e, ou te ʻaiʻoi atu iā te oe, faamolemole, ia e manatua+ ua ou savali ma le faamaoni i ou luma ma le lotoatoa,+ ua ou faia foʻi le mea ua tonu i lau silafaga.” Ona tagi masūsū ai lea o Esekia.
4 Ona fetalai mai lea o Ieova iā Isaia, e faapea:
5 “Inā toe foʻi atu ia, ma e fai atu iā Esekia,+ ‘O le mea lenei ua fetalai mai ai Ieova le Atua o Tavita lou augātamā: “Ua ou faalogo i lau tatalo.+ Ua ou vaai i ou loimata.+ O lenei, ou te faaopoopoina tausaga e 15 i ou aso,+
6 ou te laveaʻi foʻi iā te oe ma lenei aai mai i le lima o le tupu o Asuria, ma ou te puipuia lenei aai.+
7 O le faailoga lenei mai iā Ieova, ina ia e iloa ai o le a faataunuu e Ieova le mea na ia fetalai mai ai:+
8 Ou te faafoʻi le ata lafoia o le lā ua alu ifo i sitepu* o Aasa, i le sefulu sitepu i tua.”’”+ Ona toe foʻi atu lea o le lā i faasitepu e sefulu ia ua uma ona alu ifo ai.
9 O le tusitusiga a Esekia le tupu o Iuta ina ua maʻi o ia ma toe malosi mai i lona gasegase.
10 Sa ou faapea ane: “A o leʻi taitai oʻu asoE tatau ona ou alu atu i le faitotoʻa o le Tuugamau.*
O le a aveesea foʻi oʻu tausaga o totoe.”
11 Sa ou faapea ane: “Ou te lē toe vaai iā Ioa,* o Ioa i le laueleele o loo nonofo ai ē o loo feola.+
Ou te lē toe vaai i tagata,Pe a ou faatasi atu i ē ua feoti.
12 Ua liaʻiina le mea ou te nofo ai ma aveesea mai iā te aʻu+E pei o le faleʻie o se leoleo mamoe.
Ua ou taata‘aia loʻu ola e pei ona taata‘aia e le tagata lalaga ʻie, o se ‘ie ua uma ona lalagaina;Ua vavaeeseina aʻu e le Atua e pei o le vavaeeseina o se ʻie ua uma ona lalagaina, mai i le mea na lalaga ai.
E na te tuuina atu pea aʻu i faigatā e mai i le ao seʻia oo i le pō.+
13 Ou te fifilemu seʻia oo i le taeao.
E pei o le leona, e na te gauia pea oʻu ponaivi uma;E na te tuuina atu pea aʻu i faigatā e mai i le ao seʻia oo i le pō.+
14 E pei o tama‘i manulele o le peʻapeʻa ma le akuru, e faapea lava ona ou ‘ī‘ī;+Ua ou olo e pei o le lupe.+
Ua nenefu oʻu mata i le vaai atu i le mea maualuga:+
‘Ieova e, ua ou matuā puapuagatia.Ia e lagolago mai iā te aʻu!’+
15 O le ā saʻu upu e fai atu?
O lea ua ia fetalai mai ma ua ia faia.
O le a ou savali pea ma loʻu lotomaulalo i oʻu tausaga umaOna o lenei mea oona ua oo mai iā te aʻu.
16 ‘Ieova e, o mea nei* e ola ai tagata uma,Ma o mea ia ua maua ai loʻu malosi e ola ai.
O le a e faafoʻisia mai iā te aʻu le ola mālōlōina ma faasaoina aʻu.+
17 Faauta! Nai lo o le filemu, na ou maua le mea oona,Ae ona o lou alofa i loʻu nei tagata,Ua e faasaoina ai aʻu mai i le lua e pala ai.+
Ua e lafoaʻiina aʻu agasala uma i ou tua.*+
18 Auā e lē mafai ona faamamaluina oe e le Tuugamau.*+E lē mafai foʻi ona vivii atu le oti iā te oe.+
E lē mafai e i latou ua ō ifo i le lua ona faamoemoe i lou faamaoni.+
19 O lē ua ola, o lē ua ola e mafai ona vivii atu iā te oe,E pei ona ou faia i le asō.
O lea, e mafai e se tamā ona faailoa i ona atalii e uiga i lou faamaoni.+
20 Ieova e, ia e faaolaina aʻu,Ona matou tāina lea o pese i meafaifaaili e iai uaua+I aso uma o o matou olaga i le fale o Ieova.’”+
21 Ona faapea atu lea o Isaia: “Ia aumai se keke o mati mamago ma tuu i luga o le maʻi sua, ina ia toe malosi ai o ia.”+
22 Ua fai atu Esekia: “O le ā le faailoga e iloa ai o le a ou alu aʻe i le fale o Ieova?”+
Faamatalaga Pito i Lalo
^ Atonu o nei sitepu na faaaogāina e tau ai le taimi, e ala i le mātauina o le mea ua oo i ai le ata lafoia.
^ Po o “Seoli.” Tagaʻi i le Uiga o Upu.
^ O “Ioa” o le faapuupuuga o le suafa o Ieova.
^ E faasino atu i afioga ma galuega a le Atua.
^ Po o le “Ua e aveesea aʻu agasala uma mai i ou luma.”
^ Po o “Seoli.” Tagaʻi i le Uiga o Upu.
