Isaia 66:1-24
66 O le fetalaiga lenei a Ieova:
“O le lagi o loʻu nofoālii lea, a o le lalolagi o le mea lea e tū ai oʻu vae.+
O fea la le fale e mafai ona outou faia mo aʻu,+O fea foʻi le mea ou te mālōlō ai?”+
2 “Na faia e oʻu lava lima nei mea uma,Ma o le mea lea ua māfua ai ona iai nei mea uma,” ua fetalai mai ai Ieova.+
“A o le tagata ou te vaai i ai,O le tagata ua mafatia ma nutimomomo lona agaga, ma ua gatete* i laʻu upu.+
3 O lē ua fasia le povi poʻa, ua pei o lē ua fasiotia se tamāloa.+
O lē e faia se taulaga i le mamoe, ua pei o lē ua gausia le ua o le taʻifau.+
O lē e ofoina atu se meaalofa, ua pei o lē e ofoina atu le toto o le puaa!+
O lē e ofoina atu se faamanatuga o lipano,+ ua pei o lē e fai atu se faamanuiaga i ni upu faataulāitu.*+
Ua latou filifilia o latou lava ala,Ma ua fiafia i mea e inosia.
4 A o aʻu, ou te filifilia ala e faapuapuagatia ai i latou,+Ou te aumaia foʻi i o latou luga mea e latou te matata‘u ai.
Talu ai na ou valaau atu, ae e leai se isi na tali mai;Na ou tautala atu, ae e leai se isi na faalogo mai.+
Na latou faia pea mea leaga i oʻu luma,Ma na latou filifili e faia le mea ou te lē fiafia i ai.”+
5 Inā faalogo mai ia i le afioga a Ieova, o outou o ē e gatete* i ana upu:
“Ua faapea ane o outou uso o ē ua ʻinoʻino iā te outou ma faaesea outou ona o loʻu igoa, ‘Ia faamamaluina Ieova!’+
Ae o le a faaali mai o Ia ma foa‘i mai le olioli iā te outou,Ma o le a faamāina i latou na.”+
6 Ua iai le leo o le vāvāō mai i le aai, o le leo mai i le malumalu!
O le leo o le taui atu e Ieova i ona fili o le mea ua tatau iā i latou.
7 Ua fanau o ia a o leʻi oo ina tigā o le a fanau.+
Ua fanau mai e ia se tama tama, a o leʻi oo ina faatigā o le a fanau.
8 O ai na faalogo i se mea faapenei?
O ai na vaai i ni mea faapenei?
Pe e fanau mai ea se laueleele i se aso e tasi?
Pe e fanau mai ea se nuu i se taimi e tasi?
Ae na fanaua e Siona lana fanau tama, i le taimi lava na faatigā ai o le a fanau.
9 “A o aʻu, po ou te tatalaina ea le faaautama, ae e taofia le fanau mai o le tama?” ua fetalai mai ai Ieova.
“Po ou te faapogaia ea le fanau mai, ona ou toe punitia lea o le faaautama?” ua fetalai mai ai lou Atua.
10 Ia olioli ma fiafia faatasi ma Ierusalema,+ o outou uma o ē e alolofa iā te ia.+
Ia matuā fiafia faatasi ma ia, o outou uma o ē o loo faavauvau ona o ia,
11 Auā o le a outou fesusui ma faamalieina i ona susu o faamāfanafanaga,Ma o le a outou feinu fo‘i ma maua le fiafia mai i le tele o lona mamalu.
12 Auā o le fetalaiga lenei a Ieova:
“O aʻu lenei, ou te avatu iā te ia le filemu e pei o le vaitafe,+Ma le mamalu o atunuu e pei o se lologa ua tatafe.+
O le a tausia outou ma afisi i lona itu,Ma o le a tausia ma le alofa outou i luga o ona vae.
13 E pei o se tinā e faamāfanafana i lana tama,E faapea foʻi ona ou faamāfanafana pea iā te outou;+Ma e faamāfanafanaina outou ona o Ierusalema.+
14 O le a vāai outou i lenei mea, ma olioli ai o outou loto,O le a tupu olaola o outou ivi e pei o le mutia muʻamuʻa.
O le a iloa e ana auauna le aao* o Ieova,Ae o le a ia taʻusalaina ona fili.”+
15 “Auā o le a afio mai Ieova e pei o le afi,+Ma e pei ana kariota o le matagi malosi,+Ina ia taui atu iā i latou i lona ita tele,Ma aʻoaʻi malosi i latou i le afi mumū.+
16 Auā o le a faaoo atu e Ieova le faasalaga faafaamasinoga e ala i le afi,Atoa foʻi ma le pelu e faasagatau ai i tagata uma;Ma e toʻatele o le a fasiotia e Ieova.
17 “O i latou ua faapaiaina ma faamamāina i latou lava ina ia ō atu i togālaau,*+ ma mulimuli atu i lē o loo i le ogatotonu, e aai i le aano o le puaa,+ faapea mea inosia ma isumu,+ o le a oo faatasi mai lo latou iʻuga,” ua fetalai mai ai Ieova.
18 “Talu ai ua ou iloa a latou galuega ma o latou manatunatuga, o lea ua ou alu atu ai ina ia faapotopotoina atunuu uma ma gagana, ma o le a latou ō mai ma vāai i loʻu mamalu.”
19 “O le a ou faatū se faailoilo iā i latou, ma o le a ou aauina atu nisi o i latou ua sao i atunuu o Tasesa,+ o Pula ma Luti,+ o ē ua lolo‘u le ʻaufana, o Tupalu ma Iavana,+ ma motu tū mamao, o ē e leʻi faalogo i se faamatalaga e uiga iā te aʻu pe vāai i loʻu mamalu; o le a latou faalauiloa atu lava i atunuu loʻu mamalu.+
20 O le a latou aumaia o outou uso mai i atunuu uma+ o se meaalofa iā Ieova, i luga o solofanua, o kariota, o taavale toso, o asini,* ma kamela televavave, ma avatu i loʻu mauga paia, o Ierusalema lea,” ua fetalai mai ai Ieova, “e pei lava ona aumaia e le fanauga a Isaraelu a latou meaalofa i se ipu mamā i le fale o Ieova.”
21 “Ou te aumaia mai iā i latou nisi e fai ma ositaulaga ma nisi e fai ma sa Levī,” ua fetalai mai ai Ieova.
22 “Auā e pei ona tumau i oʻu luma o le lagi fou ma le lalolagi fou+ lea o loo ou faia,” ua fetalai mai ai Ieova, “e faapea foʻi ona tumau pea a outou fanau ma lo outou igoa.”+
23 “O le a ō mai lava tagata uma ina ia ifo mai* iā te aʻu,Mai i lea masina faatoʻā vaaia i lea masina faatoʻā vaaia, ma mai i lea sapati i lea sapati,”+ ua fetalai mai ai Ieova.
24 “O le a latou ō atu ma vāai i tino oti o tagata na fouvale iā te aʻu;E lē mamate foʻi ilo o loo i o latou tino,E lē tineia lo latou afi,+Ma e avea i latou ma mea e inosia e tagata uma.”
Faamatalaga Pito i Lalo
^ Po o le “ma ua atuatuvale e faatatau.”
^ Pe atonu “o lē o loo vivii atu i se tupua.”
^ Po o le “atuatuvale e faatatau.”
^ Po o le “malosi.”
^ E faasino atu i togālaau faapitoa e faaaogā mo tapuaʻiga i tupua.
^ O le upu Eperu e faasino atu i le tama a le asini poʻa ma le solofanua fafine.
^ Po o le “e tapuaʻi.”
