O le Tusi i Faapotopotoga i Kalatia 2:1-21
2 Ina ua mavae tausaga e 14, ona ou toe alu aʻe lea i Ierusalema faatasi ma Panapa,+ na ou alu foʻi ma ave Tito.+
2 Na ou alu aʻe ona o se faaaliga mai i le lagi, ma na ou faailoa atu iā i latou le tala lelei lea o loo oʻu talaʻia i nuu ese. Ae na matou talanoa na o i matou ma tane aloaʻia, ina ia ou mautinoa ai e leʻi iʻuvale laʻu tamoʻe i le taimi ua mavae ma le taimi nei.
3 E oo foʻi iā Tito+ lea na ma faatasi, e leʻi faamalosia o ia ina ia peritomeina+ e ui lava o ia o se Eleni.
4 Ae na aliaʻe mai lenā mataupu ina ua ō mai faalilolilo uso pepelo,+ o ē na ō mai faananā e saʻili se mea e lamatia ai lo matou saʻolotoga+ iā Keriso Iesu, ina ia latou faapologaina ai i matou;+
5 ae e matou te leʻi lolo atu lava e gauaʻi atu iā i latou+ mo sina taimi,* ina ia tumau pea iā te outou le upu moni o le tala lelei.
6 Ae o ē ua taʻua o tane aloaʻia,+ ou te manatu e leai se mea fou na ou iloa mai iā i latou. Ioe, po o ā lava o latou tulaga na iai muamua, e lē tāua lea iā te aʻu, auā e lē silasila le Atua i foliga i fafo o tagata.
7 Ae ina ua latou iloa ua tuuina mai iā te aʻu le tala lelei mo ē e leʻi peritomeina,+ e pei foʻi o lea na tuuina atu iā Peteru, mo ē ua peritomeina,
8 (auā o Lē na tuuina atu iā Peteru le pule e avea ai ma aposetolo i ē ua peritomeina, ua ia tuuina mai foʻi iā te aʻu le pule e avea ai ma aposetolo i tagata o nuu ese)+
9 ma ina ua latou iloa le agalelei faifua ua tuuina mai iā te aʻu,+ ona faatalofa mai lea iā i maʻua ma Panapa,+ o lima taumatau o Iakopo,+ Kefa* ma Ioane o ē na taʻua o ni poutū, e faailoa ai ua matou malilie faatasi, ina ia ma ō atu i nuu ese, ae ō atu i latou i ē ua peritomeina.
10 Na latou talosaga mai e tau ina ia ma manatua o ē ua matitiva, ma o le mea lenā na ou matuā naunau e fai.+
11 Ae ina ua sau Kefa*+ i Anetioka,+ na ou fai saʻo atu lava iā te ia e sesē lana mea na fai.
12 Auā a o leʻi taunuu ane nisi o tane mai iā Iakopo,+ na masani ona aai faatasi o ia ma tagata o nuu ese;+ ae ina ua latou taunuu ane, ona ia lē toe faia lea faapea ma vavaeesea o ia mai i tagata o nuu ese, ona o le fefe i tagata ua peritomeina.+
13 Ua aufaatasi atu foʻi isi Iutaia uma iā te ia i lona faagutugutulua, ua oo foʻi ina taaʻina atu ai ma Panapa i lo latou faagutugutulua.
14 Ae ina ua ou iloa e latou te lē o savavali e tusa ai o le upu moni o le tala lelei,+ ona ou fai atu lea iā Kefa* i luma o i latou uma e faapea: “Afai o oe o se Iutaia ae ua e ola e pei o tagata o nuu ese ae e lē pei o tagata Iutaia, aiseā la ua e manaʻo ai e tauanau tagata o nuu ese ina ia tausia tū a tagata Iutaia?”+
15 O i tatou o ni tagata Iutaia moni, ae e lē o ni tagata agasala mai i nuu ese,
16 ua tatou iloa e taʻuamiotonuina le tagata, e lē ona o galuega o le tulafono, ae ona o le faatuatua+ iā Iesu Keriso.+ O lea, ua tatou faatuatua iā Keriso Iesu ina ia taʻuamiotonuina ai i tatou ona o le faatuatua iā Keriso, ae lē ona o galuega o le tulafono, auā e lē taʻuamiotonuina se tagata ona o galuega o le tulafono.+
17 O lenei, afai ua iloa o i tatou o ni tagata agasala a o tatou saʻili ina ia taʻuamiotonuina i tatou e ala iā Keriso, po ua fai ea la Keriso ma auauna a le agasala? E mautinoa e leai!
18 Afai ou te toe atiaʻe mea lava ia na ou lepetia, ua ou faaalia ai o aʻu o se tagata solitulafono.
19 Auā na ou oti i le tulafono+ ona o le tulafono, ina ia ou ola mo le Atua.
20 Ua tutuʻi aʻu i luga o le laau faatasi ma Keriso.+ Ua ou lē toe ola mo aʻu lava,+ a o Keriso o lē o loo ola e autasi ma aʻu. O le mea moni, o le ola lea ua ou ola ai i le tino, ou te ola ai i le faatuatua i le Alo o le Atua,+ o lē na alofa mai iā te aʻu ma foaʻiina mai lona ola mo aʻu.+
21 Ou te lē teena le agalelei faifua o le Atua,+ auā ana oo mai le amiotonu ona o le tulafono, ua lē aogā la le maliu o Keriso.+
Faamatalaga Pito i Lalo
^ Ele., “mo se itula.”
^ E igoa foʻi iā Peteru.
^ E igoa foʻi iā Peteru.
^ E igoa foʻi iā Peteru.
