O le Tusi i le Faapotopotoga i Kolose 4:1-18
4 O outou matai, ia feutagaʻi ma a outou pologa i se auala amiotonu ma le saʻo, auā ua outou iloa o loo iai foʻi lo outou Matai i le lagi.+
2 Ia finafinau i le tatalo,+ ia mataala pea i ai, ma ia lotofaafetai.+
3 Ia outou tatalo foʻi mo i matou,+ ina ia tatala mai e le Atua se faitotoʻa ina ia mafai ai ona matou folafola atu le upu ma le mea lilo paia e uiga i le Keriso, auā o le mea lea ua saisaitia ai aʻu,+
4 ma ina ia ou folafola atu e pei ona tatau ona ou tautala atu ai.
5 Ia outou savavali pea ma le atamai e faatatau i ē o i tua,* ia outou faaaogā tatau le taimi.*+
6 Ia lē aunoa ona outou tautatala atu i upu e logolelei, ia faamāi i le masima,+ ina ia outou iloa le auala e tali atu ai i tagata taʻitoʻatasi.+
7 E faailoa atu iā te outou e Tuiko+ loʻu uso pele, o le auauna faamaoni, ma o loʻu uso a pologa foʻi i le Alii, mea uma e uiga iā te aʻu.
8 Ua ou auina atu o ia iā te outou, ina ia outou iloa ai mea uma e uiga iā i matou, ma e na te faamāfanafanaina ai o outou loto.
9 O loo ō atu faatasi o ia ma Onesemo+ loʻu uso pele faamaoni, o lē sa faatasi ma outou; e la te faailoa atu foʻi iā te outou mea uma o loo tutupu i inei.
10 O loo momoli atu iā te outou alofaaga o Aritako,+ o lē ua ma saisaitia faatasi, faapea foʻi ma Mareko+ le tausoga o Panapa, (o lē na matou poloaʻi atu ai iā te outou ina ia talia o ia+ pe a alu atu),
11 ma Iesu o lē ua igoa iā Iuso, o i latou nei o ē ua peritomeina. E na o i latou nei na matou galulue faatasi mo le Malo o le Atua, ma ua avea i latou ma puna o faamāfanafanaga tele* iā te aʻu.
12 O loo momoli atu iā te outou alofaaga o Epafara,+ o lē sa faatasi ma outou, o le pologa a Keriso Iesu. E finafinau e lē aunoa o ia i le tatalo mo outou, ina ia iʻu ai ina atoatoa outou, ma outou matuā mautinoa ai i le finagalo o le Atua.
13 Auā ou te molimau i ana taumafaiga malolosi mo outou ma i latou o i Laotikaia, atoa ma ē o i Iarapoli.
14 O loo momoli atu iā te outou alofaaga o Luka,+ le fomaʻi pele, faapea foʻi ma Tema.+
15 E momoli atu oʻu alofaaga i uso i Laotikaia ma alofa atu foʻi i le tuafafine o Numefa, atoa ma le faapotopotoga o i lona fale.+
16 Pe a uma ona outou faitau i lenei tusi, ia fuafua foʻi e faitau lenei tusi+ i le faapotopotoga i Laotikaia, ma ia outou faitau foʻi i le tusi mai i Laotikaia.
17 Ia taʻu atu foʻi iā Arekipa:+ “Ia uaʻi atu ina ia faataunuu le faiva lea na e talia o se soo o le Alii.”
18 O aʻu o Paulo, ua tusia e loʻu lava lima oʻu alofaaga mo outou.+ Ia outou manatuaina pea oʻu noanoataga.+ Tau ina ia iā te outou le agalelei faifua o le Atua.
Faamatalaga Pito i Lalo
^ Po o “ē e lē o i totonu o le faapotopotoga Kerisiano.”
^ Ele., “ia outou faatau mai le taimi.”
^ Po o le “ma fesoasoani e faamalosiau.”
