Levitiko 16:1-34
-
Le Aso o le Togisala (1-34)
16 Ua fetalai mai Ieova iā Mose ina ua mavae le feoti o atalii e toʻalua o Arona ona o lo la faalatalata atu iā Ieova.+
2 Ona fetalai mai ai lea o Ieova iā Mose: “Ia e fai atu iā Arona lou uso, e lē tatau ona alu atu o ia i so o se taimi i le mea paia+ i le isi itu o le ʻie puipui,+ i luma o le ufiufi lea o loo i luga o le Atolaau, ina neʻi oti ai o ia;+ auā ou te iai i le ao+ i luga o le ufiufi.+
3 “O mea nei e ao ona aumaia e Arona pe a ulufale i le mea paia: o se tamaʻi povi poʻa mo le taulaga o agasala,+ ma se mamoe poʻa mo le taulaga mū.+
4 E ao ona ia ofu i le ofu talaloa lino paia,+ ma le ofuvae pupuu ua faia i le ‘ie lino+ e ufiufi ai lona tino, ia fusi foʻi o ia i le fusi ʻie ua fai i le ʻie lino,+ ma sai lona ulu i le pulou lino.+ O ofu paia ia.+ E ao ona tāʻele o ia i le vai,+ ona ofu ai lea.
5 “E ao ona ia aumai mai i le faapotopotoga o le fanauga a Isaraelu+ o ni tamaʻi ʻoti poʻa se lua mo le taulaga o agasala, ma se mamoe poʻa mo le taulaga mū.
6 “E aumaia e Arona le povi poʻa o le taulaga o agasala mo ia lava, ma e na te faia le togisala mo ia+ ma lona aiga atoa.
7 “Ona ia ave lea o ʻoti e lua ma faatutū i luma o Ieova, i le faitotoʻa o le faleʻie o le feiloaʻiga.
8 E fai e Arona le vili* i ʻoti e lua, o le tasi mo Ieova a o le isi mo Asaseli.*
9 E avatu e Arona le ʻoti lea na maua mai i le vili+ mo Ieova, ma faia ai le taulaga o agasala.
10 A o le ʻoti na maua mai i le vili mo Asaseli e tatau ona avatu ola i luma o Ieova e fai ai i luga le togisala, ona tuu atu lea o le ʻoti mo Asaseli e alu i le toafa.+
11 “E aumaia e Arona le povi poʻa o le taulaga o agasala lea ua fai mo ia, ma faia ai le togisala mo ia ma lona aiga atoa; a māe‘a ona ia fasia lea o le povi poʻa o le taulaga o agasala, lea ua fai mo ia.+
12 “Ona ia aumaia lea o le ipu e faamū ai mea manogi,+ ua tumu i malala ola mai i le fata faitaulaga+ i luma o Ieova, ma ua tumu ona lima i mea manogi lelei,+ ma e na te avatu ia mea i le isi itu o le ʻie puipui.+
13 E na te tuuina foʻi mea manogi i malala ola i luma o Ieova,+ ma e ao ona lilofia le ufiufi o le Atolaau,+ lea ua i luga o le atolaau o le feagaiga,*+ i le asu o le mea manogi, ina neʻi oti ai o ia.
14 “E na te ave se vaega o le toto+ o le povi poʻa ma sausau i lona tamatamaʻilima i luma o le ufiufi i le itu i sasaʻe, e ave foʻi se vaega o le toto ma sausau faafitu i lona tamatamaʻilima i luma o le ufiufi.+
15 “Ona ia fasia lea o le ʻoti o le taulaga o agasala, lea ua fai mo le nuu,+ ma ia avatu lona toto i le isi itu o le ʻie puipui,+ ma faia ai le mea lava e tasi i lona toto+ lea na ia faia foʻi i le toto o le povi poʻa; e na te sausau ai i luma o le ufiufi.
16 “E ao ona ia faia le togisala mo le mea paia ona o mea lē mamā a le fanauga a Isaraelu, ma a latou solitulafono ma agasala,+ ma e ao foʻi ona ia faia faapea i le faleʻie o le feiloaʻiga, lea ua iai i le mea e nonofo ai i latou o ē faia mea e lē mamā.
17 “E lē tatau ona iai se tagata i totonu o le faleʻie o le feiloaʻiga pe a ulu atu o ia e faia le togisala i le mea paia seʻia toe ulufafo o ia. E na te faia le togisala mo ia lava ma lona aiga atoa+ ma le faapotopotoga uma o Isaraelu.+
18 “Ona alu lea o ia i fafo i le fata faitaulaga+ lea ua i luma o Ieova ma fai ai le togisala mo le fata faitaulaga, e na te ave se vaega o le toto o le povi poʻa, ma se vaega o le toto o le ʻoti ma nini ai seu i itu uma o le fata faitaulaga.
19 E na te sausau faafitu foʻi i luga o le fata faitaulaga sina vaega o le toto i lona tamatamaʻilima ma faamamā ai, ma faapaia ai, mai i mea e lē mamā a le fanauga a Isaraelu.
20 “Pe a uma ona ia faia le togisala+ mo le mea paia, ma le faleʻie o le feiloaʻiga, ma le fata faitaulaga,+ ona ia aumaia ai lea o le ʻoti ola.+
21 E faaee e Arona ona lima uma i luga o le ulu o le ʻoti ola ma taʻu atu mea sesē uma a le fanauga a Isaraelu, ma a latou solitulafono uma, ma a latou agasala uma, ma e na te faaee ia mea uma i luga o le ulu o le ʻoti+ ma tuu atu le ʻoti e alu i le toafa e ala i le tagata ua tofia e faia lea mea.*
22 E na te tuu atu le ʻoti e alu ma e ao ona tauave e le ʻoti a latou agasala uma+ i le toafa.+
23 “Ona ulu atu lea o Arona i le faleʻie o le feiloaʻiga, ona tatala ese lea o ofu lino na ia ofu ai ina ua ulu atu i totonu o le mea paia, ma e ao ona ia tuu ai i inā.
24 E ao ona tāʻele o ia* i le vai+ i se nofoaga paia ma ofu ona ofu;+ ona sau ai lea i fafo ma faia le taulaga mū+ mo ia lava ma le taulaga mū mo le nuu,+ ma faia ai le togisala mo ia lava atoa ma le nuu.+
25 E na te susunuina le gaʻo o le taulaga o agasala i luga o le fata faitaulaga.
26 “O le tagata na ia tuu atu le ʻoti e alu mo Asaseli,+ e ao ona ia tatā ona ofu ma tāʻele i le vai, a mavae lenā ona sau lea i le togālauapi.
27 “O le povi poʻa o le taulaga o agasala ma le ʻoti o le taulaga o agasala, ia na ave o la toto i le mea paia e fai ai le togisala, o le a ave i tua o le togālauapi, ma o le a susunu paʻu, o aano, ma otaota o ia manu i le afi.+
28 E ao i lē na susunuina ia manu ona tatā ona ofu ma tāʻele i le vai, a mavae lenā ona sau lea i le togālauapi.
29 “O le tulafono tumau lea mo outou: I le masina lona fitu, i le aso sefulu o le masina, e ao ona outou faapuapuagatia* iā te outou ma aua tou te faia ni galuega,+ e tusa lava po o le tagatānuu po o se tagata ese lea e aumau iā te outou.
30 E faia le togisala+ mo outou i lea aso ina ia faailoa atu ai ua mamā outou. E tou te mamā ai i luma o Ieova mai i a outou agasala uma.+
31 O le sapati lea mo outou e matuā mālōlō ai, ma e ao ona outou faapuapuagatia ai outou.+ O le tulafono tumau lea.
32 “O le ositaulaga o lē ua faauuina+ ma tofia* e auauna o se ositaulaga,+ e suitulaga i lona tamā,+ e ao ona ia faia le togisala ma ofu i ofu lino,+ o ofu paia+ ia.
33 E na te faia le togisala mo le mea e sili ona paia,+ le faleʻie o le feiloaʻiga,+ ma le fata faitaulaga;+ ma e na te faia le togisala mo le ʻauositaulaga ma tagata uma o le faapotopotoga.+
34 E fai lea ma tulafono tumau mo outou,+ ina ia faatasi ai ona faia i le tausaga le togisala mo le fanauga a Isaraelu ona o a latou agasala uma.”+
Ua ia faia foʻi e pei lava ona poloaʻi mai ai Ieova iā Mose.
Faamatalaga Pito i Lalo
^ Tagaʻi i le Uiga o Upu.
^ Atonu e uiga atu “O le ʻOti ua Mou Atu.”
^ Epe., “Molimau.”
^ Po o le “tagata ua lava tapena.”
^ Epe., “lona tino.”
^ O le “faapuapuagatia o se tasi” e ono faasino atu i faasāsāaga eseese, e aofia ai le anapogi.
^ Epe., “ma faatumu lona lima.”
