Levitiko 18:1-30
18 Ua toe fetalai mai Ieova iā Mose e faapea:
2 “Ia e fai atu i le fanauga a Isaraelu, ma faapea atu iā i latou, ‘O aʻu o Ieova o lo outou Atua.+
3 Aua ne‘i outou amioa‘i e pei ona latou faia i Aikupito, lea na outou nonofo ai, ma aua neʻi outou faia mea ua latou faia i le atunuu o Kanana lea ou te avatu i ai outou.+ Aua fo‘i neʻi outou mulimuli i a latou tulafono.
4 Ia outou usiusitaʻi i iʻuga o aʻu faamasinoga, ia outou tausi foʻi ma mulimuli i aʻu tulafono.+ O aʻu o Ieova o lo outou Atua.
5 E ao ona outou tausia aʻu tulafono ma iʻuga o aʻu faamasinoga; o so o se tasi e faia ia mea, e ola lava o ia ona o nei mea.+ O aʻu o Ieova.
6 “‘Aua lava neʻi faalatalata atu se tane mai iā te outou i se tasi o ona aiga vavalalata ina ia feusua‘i ma ia.*+ O aʻu o Ieova.
7 Aua neʻi e feusua‘i ma lou tamā, ma aua ne‘i e feusua‘i ma lou tinā. O ia o lou tinā, aua neʻi e feusua‘i ma ia.
8 “‘Aua neʻi e feusua‘i ma le avā a lou tamā.+ E faalumaina ai lou tamā.*
9 “‘Aua neʻi e feusua‘i ma lou tuafafine, e tusa po o le afafine o lou tamā, po o le tama teine a lou tinā, e tusa lava pe na fanau i le aiga e tasi pe leai.+
10 “‘Aua neʻi e feusua‘i ma le afafine o lou atalii, po o le tama teine a lou afafine, auā e faalumaina ai lava oe.
11 “‘Aua neʻi e feusua‘i ma le tama teine a le avā a lou tamā, o lē na fanau mai i lou tamā, auā o lou tuafafine o ia.
12 “‘Aua neʻi e feusua‘i ma le tuafafine o lou tamā. O ia o le toto ma aano o lou tamā.+
13 “‘Aua neʻi e feusua‘i ma le uso o lou tinā, auā o ia o le toto ma aano o lou tinā.
14 “‘Aua neʻi e faalumaina le uso o lou tamā,* e ala i le feusua‘i ma lana avā. Ua pei o ia o se tuafafine o lou tamā.+
15 “‘Aua neʻi e feusua‘i ma le avā a lou atalii.+ O ia o le avā a lou atalii, aua ne‘i e feusua‘i ma ia.
16 “‘Aua neʻi e feusua‘i ma le avā a lou uso,+ auā e faalumaina ai lou uso.*
17 “‘Aua neʻi e feusua‘i ma se fafine ma lana tama teine, pe feusua‘i ma le afafine o lana tama tama, po o le tama teine a lana tama teine.+ O ona tauaiga vavalalata i latou; o se amioga matagā lea.*
18 “‘Aua neʻi e faaipoipo i le uso o lau avā e faatigā ai iā te ia,+ ma e feusuaʻi ai ma ia, a o ola pea lau avā.
19 “‘Aua neʻi e faalatalata i se fafine a o lē mamā o ia i lona maʻi masina, ina ia feusua‘i ma ia.+
20 “‘Aua neʻi e feusua‘i ma le avā a se isi tagata,* ma e lē mamā ai.+
21 “‘Aua neʻi e tuuina atu* se tasi o lau fanau iā Moloka.+ Aua neʻi e faalumaina le suafa o lou Atua i lenā mea.+ O aʻu o Ieova.
22 “‘Aua neʻi lua momoe ma se tane e pei ona lua momoe ma se fafine.+ O se mea e matuā inosia lea.
23 “‘Aua neʻi feusua‘i se tane ma se manu ma lē mamā ai; pe tuu atu e se fafine o ia i se manu ina ia la feusuaʻi.+ Ua solia ai le tū ua masani ai.
24 “‘Aua neʻi lē mamā outou i so o se tasi o nei mea, auā o mea ia ua lē mamā ai nuu ia ou te tuliesea mai i o outou luma.+
25 O le mea lea, ua lē mamā ai le laueleele, ma ou te faasalaina ai ona o lana agasala, ma e luai mai e le laueleele ē o loo nonofo ai.+
26 Ae e ao ona outou tausia aʻu tulafono ma iʻuga o aʻu faamasinoga,+ ma aua lava neʻi outou faia se tasi o ia mea e inosia, e tusa lava po o se tagatānuu, po o se tagata ese ua aumau iā te outou.+
27 Auā o mea inosia uma nei ua faia e tagata na muamua nonofo i le laueleele nai lo o outou,+ ma ua lē mamā ai le laueleele.
28 Ona e tou te leʻi faaleagaina le laueleele, e lē luai mai ai outou e le laueleele, e pei ona luai mai e le laueleele o nuu na muamua nonofo ai nai lo o outou.
29 Afai e faia e se tasi se mea o ia mea inosia, o le a fasiotia i latou uma ua faia ia mea.
30 E ao ona outou tausia la outou matafaioi iā te aʻu, e ala i le lē faia o so o se tū e inosia, lea ua faia e nisi na muamua atu iā te outou,+ neʻi lē mamā ai outou ona o ia mea. O aʻu o Ieova lo outou Atua.’”
Faamatalaga Pito i Lalo
^ Epe., “ina ia faatelenoa o ia,” e faatatau atu i lenei fuaiupu ma fuaiupu o loo mulimuli mai.
^ Epe., “O le telenoa lea o lou tamā.”
^ Epe., “faatelenoa i le uso o lou tamā.”
^ Epe., “o le telenoa lea o lou uso.”
^ Po o le “amioga e faalumaina ai.”
^ Po o le “a lou tuaoi; a lau uō.”
^ Po o le “tuutoina atu; osia.”
