Levitiko 23:1-44
23 Ua toe fetalai mai Ieova iā Mose e faapea:
2 “Ia e fai atu i le fanauga a Isaraelu ma e faapea atu iā i latou, ‘O aso o tausamiga+ iā Ieova e ao ona outou faasilasila atu+ o ni tauaofiaga paia. O aso o tausamiga lava ia iā te aʻu:
3 “‘Ia faia galuega i aso e ono, a o le aso lona fitu o le sapati lea e mālōlō lelei ai,+ o se tauaofiaga paia. Aua lava neʻi outou faia ai so o se galuega. O le aso sapati lea iā Ieova i mea uma ua outou nonofo ai.+
4 “‘O aso o tausamiga ia iā Ieova, o tauaofiaga paia, ia outou faasilasila atu aso atofaina e faia ai:
5 O le masina muamua, o le aso lona 14 o le masina,+ i le afiafipō* e faia ai le Paseka+ iā Ieova.
6 “‘O le aso lona 15 o lea masina ia fai ai le Tausamiga o Falaoa e Lē Faafefeteina iā Ieova.+ E fitu aso e tou te aai ai i falaoa e lē faafefeteina.+
7 O le aso muamua e tou te faia ai le tauaofiaga paia.+ Aua lava neʻi outou faia ai so o se galuega mamafa.
8 Ae e ao ona outou avatu taulaga iā Ieova ua faia i le afi mo aso e fitu. O le aso lona fitu e faia ai le tauaofiaga paia. Aua lava neʻi outou faia ai so o se galuega mamafa.’”
9 Ua fetalai mai pea Ieova iā Mose e faapea:
10 “Ia e fai atu i le fanauga a Isaraelu ma e faapea atu iā i latou, ‘Pe a outou taunuu atu i le laueleele ou te tuu atu iā te outou, ma ua outou selesele i a outou seleselega, e ao ona outou avatu se fusi karite* o uluaʻi fua+ o a outou seleselega i le ositaulaga.+
11 E na te lūlū i luma o Ieova le fusi karite i le isi itu ma le isi itu ina ia talileleia ai outou. E ao i le ositaulaga ona lūlūina i le aso e uma ai le Sapati.
12 I le aso ua lūlūina ai le fusi saito, e ao ona outou avatu ai se tamaʻi mamoe poʻa e matuā lelei lava, faatoʻā atoa le tausaga, e faia ai le taulaga mū iā Ieova.
13 O le taulaga i meaʻai e lua vaesefulu o le fua o le efa* o le falaoamata lelei ua iai sina suāuu, o le taulaga lea iā Ieova ua faia i le afi, o se manogi lelei lea iā te ia.* O le taulaga i meainu e tasi vaefā o le sinu* o le uaina.
14 Aua tou te aai i se falaoa, ni fatu ua tao, po o ni fatu fou seʻia oo i lea aso, lea tou te avatu ai le taulaga i lo outou Atua. O le tulafono tumau lea mo outou ma o outou tupulaga o loo mulimuli mai, i mea uma ua outou nonofo ai.
15 “‘E ao ona outou faitau sapati e fitu e amata mai i le aso e uma ai le Sapati, mai i le aso na outou aumaia ai le fusi karite e faia ai le taulaga lūlū.+ E tatau ona fitu vaiaso atoatoa.
16 E ao ona outou faitau aso e 50+ mai i le aso e uma ai le Sapati lona fitu, ona outou avatu ai lea o le taulaga i meaʻai fou iā Ieova.+
17 Ia outou aumaia mai i mea ua outou nonofo ai o falaoa e lua e faia ai le taulaga lūlū. Ia faia mai i le lua vaesefulu o le fua o le efa* o le falaoamata lelei. E tatau ona tao faatasi ma le mea faafefete+ o uluaʻi fua matua ia iā Ieova.+
18 E ao ona outou aumaia falaoa faatasi ma tamaʻi mamoe poʻa e matuā lelei lava e fitu, e faatoʻā atoa tausaga o ia manu, o le tamaʻi povi poʻa e tasi ma mamoe poʻa e lua.+ E ao ona faia ai le taulaga mū iā Ieova faatasi ma taulaga i meaʻai ma taulaga i meainu e fai ma taulaga ua faia i le afi, o se manogi lelei lea iā* Ieova.
19 E ao ona outou avatu se tamaʻi ʻoti se tasi e fai ai le taulaga o agasala,+ ma tamaʻi mamoe poʻa e lua e taʻitasi tausaga o ia manu e fai ai le taulaga faifaatasi.+
20 E lūlū e le ositaulaga tamaʻi mamoe poʻa e lua i le isi itu ma le isi itu, faatasi ma falaoa o uluaʻi fua matua, o le taulaga lūlū i luma o Ieova. E tatau ona faia o ni mea paia iā Ieova mo le ositaulaga.+
21 I lea lava aso e tou te faia ai se faasilasilaga+ o se tauaofiaga paia mo outou. Aua lava neʻi outou faia ai so o se galuega mamafa. O le tulafono tumau lea mo outou ma o outou tupulaga o loo mulimuli mai, i mea uma ua outou nonofo ai.
22 “‘Pe a outou faia le seleselega i o outou fanua, aua e te selesele pito uma o lou fanua, aua foʻi e te aoina fua ua totoe o lau seleselega.+ E ao ona e tuu ia mea mo lē e mativa*+ ma le tagata ese ua aumau iā te outou.+ O aʻu o Ieova lo outou Atua.’”
23 Ua fetalai atili mai Ieova iā Mose e faapea:
24 “Ia e fai atu i le fanauga a Isaraelu e faapea, ‘I le masina lona fitu, i le aso muamua o le masina, e ao ona outou mālōlō lelei ai, o se aso faamanatu e faailoa atu e ala i le ilia o pū,+ o le tauaofiaga paia.
25 Aua lava tou te faia ai so o se galuega mamafa ma e ao ona outou avatu le taulaga iā Ieova ua faia i le afi.’”
26 Ua fetalai mai pea Ieova iā Mose e faapea:
27 “Peitaʻi o le aso lona sefulu o le masina lona fitu, o le Aso o le Togisala.+ E ao ona faia ai se tauaofiaga paia mo outou, ma e ao ona outou faapuapuagatia* outou lava,+ ma avatu le taulaga iā Ieova ua faia i le afi.
28 Aua tou te faia ai so o se galuega i lea lava aso, auā o le aso o le togisala e fai ai le togisala+ mo outou i luma o Ieova lo outou Atua.
29 O le tagata e lē faapuapuagatia o ia lava* i lea aso, e tatau ona fasiotia o ia.+
30 O se tasi e faia so o se galuega i lea aso, ou te fasiotia lava lea tagata.
31 Aua lava neʻi outou faia ai so o se galuega. O le tulafono tumau lea mo outou ma o outou tupulaga o loo mulimuli mai, i mea uma ua outou nonofo ai.
32 O le sapati lea e tou te mālōlō lelei ai, ma e tou te faapuapuagatia ai outou lava+ i le afiafipō o le aso lona iva o le masina. E ao ona outou tausia la outou sapati mai le afiafipō e oo i le isi afiafipō.”
33 Ua fetalai mai pea Ieova iā Mose e faapea:
34 “Ia e fai atu i le fanauga a Isaraelu, ‘O le aso lona 15 o le masina lona fitu, o le Tausamiga o Fale Lauvao* mo aso e fitu iā Ieova.+
35 O le aso muamua, o le tauaofiaga paia lea, ma aua lava neʻi faia ai so o se galuega mamafa.
36 E ao ona outou avatu le taulaga iā Ieova ua faia i le afi i aso e fitu. O le aso lona valu, ia faia ai la outou tauaofiaga paia,+ ma e ao ona outou avatu le taulaga iā Ieova ua faia i le afi. O le fonotaga paia lea. Aua lava neʻi outou faia ai so o se galuega mamafa.
37 “‘O aso o tausamiga+ ia iā Ieova, e ao ona outou faasilasila atu o ni tauaofiaga paia,+ ina ia avatu ai le taulaga iā Ieova ua faia i le afi: o le taulaga mū,+ o le taulaga i meaʻai,+ ma le taulaga i meainu+ e tusa ma le faasologa o aso taʻitasi.
38 O mea nei e faaopoopo i mea e avatu i sapati a Ieova,+ ma a outou meaalofa,+ o a outou taulaga o le tautoga,+ atoa foʻi ma a outou taulaga tauofo,+ e ao ona avatu iā Ieova.
39 Peitaʻi, i le aso lona 15 o le masina lona fitu, pe a uma ona outou aoaoina fua o o outou fanua, e ao ona outou faamanatu le tausamiga a Ieova i aso e fitu.+ O le aso muamua o le aso e mālōlō lelei ai, o le aso lona valu foʻi e mālōlō lelei ai.+
40 O le aso muamua e tou te ave ai fua o laau matagofie, o laulaau o laau pama,+ o lālā laau e tele ai laulaau, ma laau o le garava mai i le vanu,* ma e tou te olioli+ i luma o Ieova lo outou Atua i aso e fitu.+
41 E tou te faamanatu lenei tausamiga iā Ieova mo aso e fitu i tausaga taʻitasi.+ Talu ai o se tulafono tumau lea mo outou ma o outou tupulaga o loo mulimuli mai, e ao ona outou tausia i le masina lona fitu.
42 E ao ona outou nonofo i fale lauvao i aso e fitu.+ E ao ona nonofo uma ai tagatānuu o Isaraelu i fale lauvao,
43 ina ia iloa ai e o outou tupulaga o loo mulimuli mai,+ o faleʻie na ou faanonofo ai le fanauga a Isaraelu ina ua ou aumaia i latou mai i le atunuu o Aikupito.+ O aʻu o Ieova lo outou Atua.’”
44 Ua faapea lava ona fai atu Mose i le fanauga a Isaraelu e uiga i aso o tausamiga iā Ieova.
Faamatalaga Pito i Lalo
^ Epe., “le vā o afiafi e lua.”
^ O se isi ituaiga saito. O le upu Peretania, o le barley.
^ Po o le “manogi ua faamalieina ai lona finagalo.”
^ Po o le “manogi ua faamalieina ai.”
^ Po o “lē e puapuagatia.”
^ O le “faapuapuagatia o se tasi” e ono faasino atu i faasāsāaga eseese, e aofia ai le anapogi.
^ Pe atonu “e lē anapogi.”
^ Po o “Apitaga Lē Tumau.”
^ Po o le “ālia.”
