Levitiko 26:1-46
26 “‘Aua tou te faia mo outou ni atua e lē aogā,+ aua tou te faatūina se tupua ua tā+ po o se poutū paia mo outou, aua foʻi tou te faia se maa ua teuteuina+ i lo outou atunuu ina ia ifo atu i ai;+ auā o aʻu o Ieova o lo outou Atua.
2 Ia outou tausia oʻu sapati ma matuā faaaloalo* i loʻu faleʻie paia. O aʻu o Ieova.
3 “‘Pe afai tou te savavali pea i aʻu tulafono ma tausia aʻu poloaʻiga ma outou faia ia mea,+
4 ona ou faatotō ifo lea o le timu iā te outou i le taimi e tatau ai,+ e fua mai ai le laueleele,+ ma e fua mai foʻi laau o le fanua.
5 E oo atu lava le soliga o a outou saito i le taimi e selesele ai a outou vine, e oo atu foʻi le seleseleina o a outou vine i le taimi e lūlū ai fatu; ma e tou te aai i a outou meaʻai ma maoona ai, ma e tou te nonofo ma le saogalemu i lo outou fanua.+
6 Ou te tuuina le filemu i le atunuu+ ma e tou te taooto e aunoa ma se isi e faamataʻu mai iā te outou;+ ou te taofia manufeʻai o le atunuu mai i le osofaʻia o outou, ma e leai se tasi e faasagatau mai ma le pelu iā te outou.
7 E tou te tuliloa i o outou fili, ma e tou te faatoʻilaloina i latou i le pelu.
8 E tuliloa le toʻa 100 e le toʻalima o outou, e tuliloa le toʻa 10,000 e le toʻa 100 o outou, ma e faatoʻilaloina o outou fili i o outou luma i le pelu.+
9 “‘Ou te manatu mamafa* iā te outou, ou te faauluolaina outou ma faatoʻateleina,+ ou te tausia foʻi laʻu feagaiga ma outou.+
10 A o outou aai lava i fuata tuai o le tausaga ua mavae, e ao ona outou aumaia i fafo le fuata tuai ina ia teu ai le fuata fou i le fale.
11 Ou te tuuina loʻu faleʻie paia i le ogatotonu o le mea tou te nonofo ai,+ ma ou te lē teena outou.
12 Ou te savali faatasi ma outou ma e fai aʻu ma o outou Atua,+ ma e fai outou ma oʻu nuu.+
13 O aʻu o Ieova lo outou Atua, o lē na aumaia outou mai i le laueleele o Aikupito ina ia lē toe nofo pologa outou i tagata Aikupito, ma na ou gauia a outou amo ma mafai ona outou savavali saʻo ai.*
14 “‘Peitaʻi, afai tou te lē faalogo mai iā te aʻu pe tausia foʻi ia poloaʻiga uma,+
15 afai tou te teena aʻu tulafono,+ afai foʻi tou te ʻinoʻino i iʻuga o aʻu faamasinoga ma lē tausia ai aʻu poloaʻiga uma, ma outou solia laʻu feagaiga,+
16 ona ou faia ai lea o ia mea iā te outou: Ou te faasala outou i le tuuina atu iā te outou o ia mea e atuatuvale ai, o le māmāpala ma le maualuga o le fiva, ia e māfua ai le tauaso ma matuā vaivai ai le tino. E lūlūina fua a outou fatu, auā e ʻaina e o outou fili.+
17 Ou te teena outou, ma e faatoʻilaloina outou e o outou fili;+ e faasauā iā te outou o i latou e ʻinoʻino iā te outou,+ ma e tou te sosola ae e leai se tasi e tuliloaina outou.+
18 “‘Afai e tou te lē faalogo mai iā te aʻu e ui i ia mea, ona ou faaopoopo faafitu ai lea ona aʻoaʻi iā te outou ona o a outou agasala.
19 Ou te gausia lo outou faamaualuga ua malosi tele, ou te faia ou lagi e pei o le uʻamea,+ ma lou lalolagi e pei o le ʻapamemea.
20 E faama‘imau fua lo outou malosi, auā e lē fua mai ni fua i lo outou laueleele,+ ma e lē fua mai foʻi laau o le fanua.
21 “‘Ae afai o le a outou savavali pea e tetee mai iā te aʻu, ma mumusu e faalogo mai iā te aʻu, ona ou faaopoopo faafitu ai lea o mala iā te outou e tusa ma a outou agasala.
22 Ou te aauina atu iā te outou+ o manufeʻai, ia e toesea ai a outou fanau ma outou faanoanoa ai,+ e fano ai a outou manu lalata ma faaitiitia ai le aofaʻi o outou, ma e gaogao foʻi o outou ala.+
23 “‘Peitaʻi, afai o le a outou lē taliaina laʻu aʻoaʻiga+ e ala i ia mea, ma outou savavali pea e tetee mai iā te aʻu,
24 ona ou savali lea e tetee atu iā te outou; o aʻu foʻi, o le a ou taia faafitu outou ona o a outou agasala.
25 O le a ou faaoo iā te outou le pelu e taui atu ai ona o lo outou solia o le feagaiga.+ Afai tou te lalafi lava i o outou aai, ou te auina atu le faamaʻi iā te outou,+ ma e tuuina atu foʻi outou i lima o o outou fili.+
26 Pe a ou matuā faaitiitia le aofa‘iga* o a outou falaoa,*+ ona tao lea e fafine e toʻasefulu a outou falaoa i le ogaumu e tasi, ma tufatufa atu e tusa ma le mamafa o le falaoa;+ ma e tou te aai ae e tou te lē maoona.+
27 “‘Afai e tou te lē faalogo mai lava iā te aʻu e ui i ia mea, ma outou savavali pea e tetee mai iā te aʻu,
28 ona ou matuā tetee atu lea iā te outou,+ ma ou te aʻoaʻia faafitu outou ona o a outou agasala.
29 O le a outou aai i tino o o outou atalii, ma e tou te aai foʻi i tino o o outou afafine.+
30 O le a ou faaumatia a outou mea maualuluga paia+ ma aveesea a outou fata faitaulaga e faamū ai mea manogi, ou te lafo o outou tino oti i luga o tino o a outou tupua inosia,*+ ma ou te liliuese ona o lo‘u ʻinoʻino iā te outou.+
31 Ou te tuuina atu foʻi o outou aai i le pelu+ ma faatafunaina ai a outou mea paia, e lē oo mai foʻi iā te aʻu le manogi lelei* o a outou taulaga.
32 O aʻu lava ou te matuā faatafunaina le laueleele,+ e matuā ofo foʻi o outou fili o ē e nonofo ai.+
33 Ou te faataapeapeina outou i atunuu,+ ou te seʻi aʻe le pelu e tuliloa atu iā te outou;+ e faatafunaina lo outou atunuu,+ ma e faatamaʻia o outou aai.
34 “‘O lea taimi, o le a faaatoatoaina ai le totogi o sapati o le laueleele i aso uma e gaogao ai, pe a outou iai i le laueleele o o outou fili. I lenā taimi o le a mapu ai le laueleele,* auā e ao ona faaatoatoaina o totogi o ona sapati.+
35 O aso uma e gaogao ai le laueleele e mapu ai, ona e leʻi mapu le laueleele i le taimi o o outou sapati, a o outou nonofo ai.
36 “‘A o i latou e sao mai,+ o le a ou faavaivaia o latou loto i atunuu o o latou fili; ma e sosola i latou ona o le gasē o se laulaau ua lelea, e sosola foʻi i latou e pei ona sosola o tagata mai i le pelu, ma e paʻuʻū i latou e aunoa ma se tasi e tuliloaina.+
37 O le a paʻuʻū foʻi i latou o le tasi i luga o le isi e peiseaʻī o ē sosola mai i le pelu e ui e leai se isi o tuliloaina i latou. E lē mafai ona outou tetee atu i o outou fili.+
38 O le a fano foʻi outou i isi atunuu,+ ma o le a outou feoti ai i le laueleele o o outou fili.
39 A o i latou ua totoe iā te outou, o le a faaumatia i le atunuu o o outou fili+ ona o a outou agasala. Ioe, o le a faaumatia i latou ona o agasala a o latou tamā.+
40 O le a latou taʻutino mai a latou agasala,+ faapea agasala ma le lē faamaoni a o latou tamā, ma ta‘utino lo latou lē faamaoni e ala i le savavali e tetee mai iā te aʻu.+
41 O le a ou savali fo‘i e tetee atu iā i latou,+ e ala i le aumaia o i latou i le laueleele o o latou fili.+
“‘Atonu o le a iʻu ina faamaulalo ai o latou loto e lē o peritomeina,*+ ma totogi atu a latou agasala.
42 Ona ou manatua lea o laʻu feagaiga ma Iakopo,+ o laʻu feagaiga ma Isaako,+ ma ou te manatua ai laʻu feagaiga ma Aperaamo,+ ou te manatua ai foʻi le laueleele.
43 I lea taimi a o latou tuulafoaʻiina le laueleele, ua faaatoatoaina ai le totogi o ona sapati,+ ma faatafunaina e aunoa ma i latou, ma ua latou totogi atu a latou agasala, auā ua latou teena iʻuga o aʻu faamasinoga, ma ʻinoʻino i aʻu tulafono.+
44 E ui i nei mea uma, a o iai i latou i le laueleele o o latou fili, ou te lē tuulafoaʻia atoatoa i latou pe ʻinoʻino iā i latou+ ma ou faaumatia ai i latou, ma faalēaogāina ai laʻu feagaiga+ ma i latou, auā o aʻu o Ieova o lo latou Atua.
45 Ona o i latou, ou te manatua ai le feagaiga na faia ma o latou augātamā,+ o ē na ou aumaia mai i le atunuu o Aikupito i luma o isi atunuu,+ ina ia faailoa atu iā i latou o aʻu o lo latou Atua. O aʻu o Ieova.’”
46 O aiāiga, o iʻuga o faamasinoga, ma tulafono ia ua faavae e Ieova i le vā o ia ma le fanauga a Isaraelu, i le mauga o Sinai e ala mai iā Mose.+
Faamatalaga Pito i Lalo
^ Epe., “ma matataʻu.”
^ Epe., “liliu atu.”
^ Po o le “savavali ma ea i luga o outou ulu.”
^ Po o “meaʻai.”
^ Epe., “tootoo.” Atonu e faasino atu i tootoo na faaaogā e tautau ai falaoa lapotopoto.
^ O le faaupuga Eperu atonu e fesootaʻi atu i le upu mo le “otaotavale,” ma o se faaupuga e faaalia ai le ʻinoʻino.
^ Po o le “manogi e faamalieina ai.”
^ Po o le “tausia ai e le laueleele le sapati.”
^ Po o “lo latou lotomaaa.”
