Levitiko 4:1-35
-
Taulaga o agasala (1-35)
4 Ua fetalai mai foʻi Ieova iā Mose:
2 “Ia fai atu i le fanauga a Isaraelu, ‘Afai e agasala se tasi e aunoa ma le mafaufauina,+ i lona faia o so o se mea ua poloaʻi mai Ieova e aua le faia:
3 “‘Afai e agasala+ le ositaulaga ua faauuina+ ma nofosala ai le nuu, e ao ona ia aumaia iā Ieova se tamaʻi povi poʻa e matuā lelei lava mo lana agasala na fai, e fai ai le taulaga o agasala.+
4 E na te aumaia le povi poʻa i le faitotoʻa o le faleʻie o le feiloaʻiga+ i luma o Ieova, ma faaee lona lima i luga o le ulu o le povi poʻa, ma e na te fasia le povi poʻa i luma o Ieova.+
5 Ona ave lea e le ositaulaga ua faauuina+ se vaega o le toto o le povi poʻa, ma avatu i totonu o le faleʻie o le feiloaʻiga;
6 e fufui e le ositaulaga lona tamatamaʻilima i le toto,+ ma sausau faafitu sina vaega o le toto+ i luma o Ieova, i luma o le ʻie puipui o le mea paia.
7 E ave foʻi e le ositaulaga sina vaega o le toto ma tuu i luga o seu o le fata faitaulaga e faamū ai mea manogi lelei+ i luma o Ieova, lea e i totonu o le faleʻie o le feiloaʻiga; a o le toto o loo totoe o le povi poʻa e na te sasaa i lalo o le fata faitaulaga e fai ai taulaga mū,+ lea o loo i luma o le faitotoʻa o le faleʻie o le feiloaʻiga.
8 “‘E na te aveesea gaʻo uma o le povi poʻa e fai ai le taulaga o agasala, e aofia ai le gaʻo ua ufiufi ai gaʻau, ma gaʻo e pipii i gaʻau,
9 ma fatugaʻo e lua ma le gaʻo i luga o na mea e lata i suilapalapa. E na te aveesea foʻi gaʻo o le ate faatasi ma fatugaʻo.+
10 E tutusa ma mea e aveesea mai i le povi poʻa ina ia fai ai le taulaga faifaatasi.+ E susunuina e le ositaulaga ia mea i luga o le fata faitaulaga e fai ai taulaga mū.
11 “‘A o le paʻu o le povi poʻa, o ona aano, o lona ulu, o ona vae,* o ona gaʻau, ma ona otaota,+
12 o lona uiga o le povi poʻa atoa lea, e tatau ona ia faatonu le aveina i tua o le togālauapi, i se nofoaga mamā i le mea e sasaa i ai lefulefu,* ma e ao ona ia susunu ai i le afi ua faia i fafie.+ E ao ona susunu i le mea e sasaa ai lefulefu.
13 “‘Afai ua nofosala le faapotopotoga uma o Isaraelu i le faia o se agasala e aunoa ma le mafaufauina,+ ma ua latou lē iloa ua latou solia se tasi o mea na poloaʻi mai ai Ieova e aua le faia,+
14 ma a oo ina latou iloa le agasala ua latou faia, e ao i le faapotopotoga ona aumaia se tamaʻi povi poʻa e fai ai le taulaga o agasala, ma ia aumaia i luma o le faleʻie o le feiloaʻiga.
15 E faaee e toeaina o le faapotopotoga o latou lima i luga o le ulu o le povi poʻa i luma o Ieova, ma e fasia le povi poʻa i luma o Ieova.
16 “‘E ao i le ositaulaga ua faauuina ona aumaia se vaega o le toto o le povi poʻa i totonu o le faleʻie o le feiloaʻiga.
17 E fufui e le ositaulaga lona tamatamaʻilima i le toto, ma sausau faafitu sina vaega i luma o Ieova, i luma o le ʻie puipui.+
18 E na te tuu sina vaega o le toto i luga o seu o le fata faitaulaga+ lea o loo i luma o Ieova, i totonu o le faleʻie o le feiloaʻiga; a o le toto o loo totoe e na te sasaa i lalo o le fata faitaulaga e fai ai taulaga mū, lea o loo i luma o le faitotoʻa o le faleʻie o le feiloaʻiga.+
19 E na te aveesea ona gaʻo uma ma susunuina i luga o le fata faitaulaga.+
20 E tatau ona ia faia le mea lava lea e tasi i le povi poʻa e pei ona faia i le isi povi poʻa mo taulaga o agasala. O le auala lea e na te faia ai, ma e ao i le ositaulaga ona faia se togisala mo i latou+ ona faamagaloina ai lea o i latou.
21 E ao ona ia faatonu le aveina o le povi poʻa i tua o le togālauapi ma susunu ai, e pei ona ia susunuina o le povi muamua.+ O le taulaga o agasala mo le faapotopotoga.+
22 “‘Pe a agasala se taʻitaʻi+ e aunoa ma le mafaufauina, i lona faia o se tasi o mea na poloaʻi mai ai Ieova lona Atua e aua le faia ma ua nofosala ai o ia,
23 po ua ia iloa foʻi lana agasala ua fai lea ua ia solia ai se tasi o poloaʻiga, ona ia aumaia lea o se tamaʻi ʻoti poʻa e matuā lelei lava e fai ai lana taulaga.
24 E faaee lona lima i luga o le ulu o le tamaʻi ʻoti ma fasia i le mea e fasi ai manu mo taulaga mū i luma o Ieova.+ O le taulaga lea o agasala.
25 E ave e le ositaulaga sina vaega o le toto o le taulaga o agasala i lona tamatamaʻilima, ma tuu i luga o seu+ o le fata faitaulaga lea e fai ai taulaga mū, a o le toto o loo totoe e na te sasaa i lalo o le fata faitaulaga lea e fai ai taulaga mū.+
26 E ao ona ia susunuina ona gaʻo uma i luga o le fata faitaulaga e pei o le gaʻo o le taulaga faifaatasi;+ ma e faia e le ositaulaga le togisala mo ia ona o lana agasala, ona faamagaloina ai lea o ia.
27 “‘Pe a faia e se tagata o le lautele se agasala e aunoa ma le mafaufauina, ma ua nofosala ai i le solia o se tasi o mea na poloaʻi mai ai Ieova e aua le faia,+
28 po ua ia iloa foʻi lana agasala ua fai, ona ia aumaia lea o se tamaʻi ʻoti fafine e matuā lelei lava e fai ai le taulaga mo lana agasala.
29 E faaee lona lima i luga o le ulu o le manu lea e fai ai le taulaga o agasala, ma fasia le manu e fai ai le taulaga o agasala i le nofoaga lava e tasi e fai ai le taulaga mū.+
30 E ave e le ositaulaga sina vaega o le toto i lona tamatamaʻilima, ma tuu i luga o seu o le fata faitaulaga lea e fai ai taulaga mū, a o le toto o loo totoe, e na te sasaa i lalo o le fata faitaulaga.+
31 Ona ia aveese lea o le gaʻo uma+ e pei ona ia aveeseina o le gaʻo o le taulaga faifaatasi,+ ma e susunuina e le ositaulaga i luga o le fata faitaulaga e avea o se manogi lelei iā* Ieova; ma e faia e le ositaulaga le togisala mo ia, ona faamagaloina ai lea o ia.
32 “‘Ae afai e na te aumaia se tamaʻi mamoe e fai ai lana taulaga mo agasala, e ao ona ia aumaia se tamaʻi mamoe fafine e matuā lelei lava.
33 E faaee lona lima i luga o le ulu o le manu e fai ai taulaga o agasala, ma fasia o se taulaga o agasala i le mea e fasi ai manu e fai ai taulaga mū.+
34 E ave e le ositaulaga sina vaega o le toto o le taulaga o agasala i lona tamatamaʻilima, ma tuu i luga o seu o le fata faitaulaga lea e fai ai taulaga mū,+ a o le toto o loo totoe e na te sasaa i lalo o le fata faitaulaga.
35 E na te aveesea ona gaʻo uma e pei ona aveese o gaʻo mai i le tamaʻi mamoe poʻa o le taulaga faifaatasi, ma e susunuina e le ositaulaga ia mea i luga o le fata faitaulaga e pei o taulaga iā Ieova ua faia i le afi;+ ma e faia e le ositaulaga le togisala mo ia ma lana agasala ua fai, ona faamagaloina ai lea o ia.+
Faamatalaga Pito i Lalo
^ E faasino atu i le vaega pito i lalo o le tulivae agaʻi i lalo.
^ Po o “lefulefu ua gaʻoa,” e faasino atu i lefulefu ua gaʻoa mai i taulaga.
^ Po o le “manogi ua faamalieina ai.”
