Malaki 3:1-18
3 “Faauta! Ou te auina atu laʻu avefeʻau, ma e faalaulelei* e ia se ala i oʻu luma.+ E faafuaseʻi ona oo mai i Lona malumalu+ le Alii moni, o lē o loo outou saʻilia, ma e oo mai foʻi le avefeʻau o le feagaiga, o lē ua outou fiafia i ai. Faauta! O le a afio mai lava o ia,” ua fetalai mai ai Ieova o ʻau.
2 “A o ai sē e na te lavā tatali le aso o lona afio mai, o ai foʻi sē e mafai ona tū atu pe a faaali mai o ia? Auā e tusa o ia ma le afi a lē e tunu auro,* e pei foʻi o le fasimoli*+ a le tagata tā ofu.
3 E nofo o ia o lē e tunu ma faamamā i le siliva+ ma e na te faamamāina atalii o Levi; e na te faamamāina i latou e pei ona faamamā o le auro ma le siliva, ona fai ai lea o i latou ma nuu o Ieova e avatuina le taulaga e fai ma meaalofa i le amiotonu.
4 Ona faafiafiaina* ai lea o Ieova i taulaga e fai ma meaalofa a Iuta ma Ierusalema, e pei o aso ua mavae ma e pei foʻi o tausaga anamuā.+
5 “Ou te faalatalata atu iā te outou i le faamasinoga, e vave foʻi ona fai aʻu ma molimau faasaga i faataulāitu,+ o ē e mulilulua, o ē e tautō pepelo,+ o ē e fai mea piʻopiʻo i le tagata faigaluega,+ le fafine ua oti lana tane, ma le tama ua leai se tamā,*+ ma ē e lē fia fesoasoani i le tagata ese.*+ Ua latou lē matataʻu iā te aʻu,” ua fetalai mai ai Ieova o ʻau.
6 “Auā o aʻu o Ieova; ou te lē liliu lava.*+ O outou foʻi o le fanauga a Iakopo; e leʻi oo mai lo outou iʻuga.
7 Talu mai aso o o outou augātamā ua outou liliuese ai mai i aʻu poloaʻiga ma lē tausia ai.+ Ia foʻi mai iā te aʻu ona ou foʻi atu lea iā te outou,”+ ua fetalai mai ai Ieova o ʻau.
Ae ua outou fai mai: “E faapefea ona matou toe foʻi atu?”
8 “Pe e gaoia ea e tagata mea a le Atua? Ae ua outou gaoia aʻu mea.”
Ua outou fai atu: “O le ā le auala ua matou gaoia ai au mea?”
“E ala i le lē aumaia o sefuluaʻi ma foaʻi.
9 Ua malaia lava outou,* auā ua outou gaoia aʻu mea, ioe, o le mea lenā o loo faia e le nuu atoa.
10 Ia aumai sefuluaʻi uma i le fale teuoloa,+ ina ia iai ni meaʻai i loʻu fale;+ faamolemole, ia outou tofotofo mai iā te aʻu i lenei mea,” ua fetalai mai ai Ieova o ʻau, “ina ia iloa ai po ou te lē tatalaina ea faitotoʻa o le lagi+ ma liligi ifo i o outou luga faamanuiaga, seʻia oo ina leai se mea e tou te matitiva ai.”+
11 “Ou te aʻoaʻia malosi iniseti faalafuā ona o outou, ma e lē faatamaʻiaina ai fua o lo outou laueleele, pe faaleagaina ai le vine i o outou fanua ma lē fua mai ai,”+ ua fetalai mai ai Ieova o ʻau.
12 “E faaamuia atunuu uma iā te outou,+ auā o le a fai outou ma atunuu e fiafia i ai,” ua fetalai mai ai Ieova o ʻau.
13 “Ua matuā mamafa a outou upu ua faia mai iā te aʻu,” ua fetalai mai ai Ieova.
Ae ua outou fai atu: “O ā a matou tala na faia faasaga iā te oe?”+
14 “Ua outou fai ane, ‘E lē aogā ona auauna i le Atua.+ O le ā le aogā e tatou te tausia ai a tatou matafaioi iā te ia, ma savavali ma le faanoanoa i luma o Ieova o ʻau?
15 O lenei ua tatou manatu e fiafia tagata faamaualuluga. E taulau manuia fo‘i tagata e faia amioga leaga.+ Ua latou tofotofo i le Atua e aunoa ma le mā ma latou sao mai ai.’”
16 I lea taimi, e fetalanoaaʻi ai ē e matataʻu iā Ieova, e taʻitasi ma lana uō, ma e uaʻi mai pea Ieova ma faafofoga mai i ai. Ona tusia ai lea o le tusi e faamanatu ai i ona luma+ mo ē e matataʻu iā Ieova, ma ē e manatunatu loloto i* lona suafa.+
17 “E fai lava i latou ma oʻu nuu,”+ ua fetalai mai ai Ieova o ʻau, “i le aso ou te faia ai i latou ma o‘u nuu faapitoa.*+ Ou te alofa mutimutivale iā i latou, e pei ona alofa mutimutivale o se tamā i lona atalii, o lē o loo auauna iā te ia.+
18 O le a outou toe iloa ai le eseesega o le tagata amiotonu ma le tagata amioleaga,+ o le eseesega foʻi o lē o loo auauna i le Atua ma lē e lē o auauna iā te ia.”
Faamatalaga Pito i Lalo
^ Po o le “saunia.”
^ O le faaupuga i le gagana Eperu e faasino atu i isi uʻamea ae e lē na o auro na faamamāina ai.
^ O se ituaiga o fasimoli e fai mai i lefulefu.
^ Po o le “faamalieina.”
^ Po o “ē ua solia aiā tatau a le tagata ese.”
^ Po o le “ua mātuaoti.”
^ Po o le “ou te leʻi liliu lava.”
^ Pe atonu “I le malaia ua outou faamalaia mai ai iā te aʻu.”
^ Po o le “manatunatu i.” Pe atonu “faatāua.”
^ Po o “aʻu oloa tāua.”
