Nauma 1:1-15
1 O le feʻau e faasaga iā Nineva:+ O le tusi o le faaaliga a Nauma* le Elekosi:
2 O Ieova o le Atua e finagalo e tapuaʻi atu tau lava o ia,*+ ma o lē e faia le tauimasui;E faia e Ieova le tauimasui ma e nofosauni e faaali mai lona toʻasā.+
E tauimasui Ieova i ē e ita iā te ia,Ma e tumau ona toʻasā o ia i ona fili.
3 O Ieova e telegese lona toʻasā+ ma e tele lona mana,+Ae e lē taofia lava e Ieova le faaoo mai o le faasalaga e tatau ai.+
O lona ala o se matagi e faatamaʻia ai ma o se afā,Ma o ao o le pefu ia o ona aao.+
4 E na te aʻoaʻia le sami+ ma faamātūtūina ai;E na te faamātūtūina foʻi vaitafe uma.+
E mamae Vasana ma Karamelu,+E mamae foʻi fuga o Lepanona.
5 E gatete mauga ona o ia,Ma e liusuāvai aʻega.+
E lūlūina le lalolagi ona o ona fofoga,Atoa ma le laueleele ma i latou uma o loo nonofo ai.+
6 O ai sē e mafai ona tū atu i luma o lona toʻasā?+
O ai foʻi e mafai ona tū e tetee atu i le aasa o lona ita tele?+
E sasaa ifo lona toʻatamaʻi e pei o le afi,E nutililii foʻi papa ona o ia.
7 O Ieova e lelei o ia,+ o le ‘olo malosi i aso o le puapuaga.+
E na te silafia* i latou o loo sulufaʻi atu iā te ia.+
8 E na te faaumatia atoa lona* aai i le tafega e lofia ai,Ma e tuliloaina ona fili e le pōuliuli.
9 O le ā se mea ua outou faufau e tetee ai iā Ieova?
E faaoo mai lava e ia le faaumatiaga atoatoa.
E lē tupu faalua mai le puapuaga.+
10 Auā e filia faatasi i latou e pei o laau tuitui,Ma e pei i latou o ē ua onanā i le pia;*Ae e faaumatia i latou e pei o tagutugutu ua mamago.
11 E sau mai iā te oe o lē e faufau i mea leaga e tetee ai iā Ieova,E faufautua i mea e lē aogā.
12 O le fetalaiga lenei a Ieova:
“E ui lava ina atoatoa lo latou malosi ma toʻatele,Ae e faaumatia lava i latou ma mavae atu.*
Na ou faapuapuagatia oe,* ae ou te lē toe faapuapuagatia iā te oe.
13 O lenei, ou te gagauina le amo a le fili mai iā te oe,+Ma ou te motusi ou noanoaga.
14 Ua poloaʻi mai Ieova e faatatau iā te oe,*‘E lē toe faaauauina lou igoa.
Ou te faatamaʻia ou faatusa ua tā ma tupua uʻamea mai i le fale* o ou atua.
Ou te faia se tuugamau mo oe, auā ua e lē aogā lava.’
15 Faauta! Ua i luga o mauga o vae o lē e aumaia le tala lelei,O lē e folafolaina atu le filemu.+
Iuta e, ia faamanatu au tausamiga,+ ia avatu mea na e tautō ai,Auā e lē toe ui atu lava iā te oe le tagata lē aogā.
E matuā faaumatia lava o ia.”
Faamatalaga Pito i Lalo
^ Lona uiga “Lē e Faamāfanafana.”
^ Po o le “tuutoina atoatoa atu iā te ia.”
^ Po o le “tausia.”
^ E faasino atu iā Nineva.
^ Po o le “pia e faia i le saito.”
^ Pe atonu “ma e ui ane ai o ia.”
^ E faasino atu iā Iuta.
^ E faasino atu iā Asuria.
^ Po o le “malumalu.”
