Numera 10:1-36
10 Ua fetalai mai Ieova iā Mose e faapea:
2 “Ia e faia mo oe ni pū+ siliva se lua; e te faia e ala i le faaaogāina o le samala, ma faaaogā e faapotopoto mai ai le faapotopotoga ma le taimi e tapena ese ai faleʻie.
3 Pe a ilia uma pū e lua, e ao i le faapotopotoga atoa ona faapotopoto faatasi mai iā te oe i le faitotoʻa o le faleʻie o le feiloaʻiga.+
4 Pe a ilia na o le pū e tasi, e na o taʻitaʻi, o ulu o le faitau afe o tagata Isaraelu e faapotopoto faatasi mai iā te oe.+
5 “Pe a outou ilia faatetetete le leo o le pū, e ao iā i latou ua iai faleʻie i le itu i sasaʻe+ ona malaga ese.
6 Pe a outou ilia faatetetete le pū i le taimi lona lua, e ao iā i latou ua iai faleʻie i le itu i saute+ ona malaga ese. E ao ona latou ilia le pū i lea auala i taimi uma e malaga ese ai se vaega o i latou.
7 “Pe a faapotopotoina le faapotopotoga atoa, e ao ona outou ilia le pū,+ ae aua neʻi outou ilia faatetetete le leo.
8 E ao i ositaulaga o atalii ia o Arona ona ilia pū, ma o le ilia o ia pū+ e fai ma tulafono tumau mo outou ma o outou tupulaga o loo mulimuli mai.
9 “Pe afai tou te tau ma ē e faasauā iā te outou i lo outou laueleele, e ao foʻi ona outou ilia pū+ e sauni ai mo le taua, ma o le a manatuaina outou e Ieova lo outou Atua ma e faaolaina outou mai i o outou fili.
10 “O aso fo‘i tou te fiafia ai,+ o aso o a outou tausamiga,+ ma amataga o o outou masina, e tou te ilia ai pū i luga o a outou taulaga mū+ ma a outou taulaga faifaatasi;+ o le ilia o ia pū ua fai ma mea e manatua ai outou i luma o lo outou Atua. O aʻu o Ieova lo outou Atua.”+
11 I le tausaga lona lua, i le masina lona lua, i le aso 20 o le masina,+ ua alu aʻe ai le ao mai i luga o le faleʻie paia+ i le mea ua iai le atolaau o le feagaiga.*
12 Ua malaga ese le fanauga a Isaraelu mai i le toafa o Sinai e tusa ma le faasologa masani, ma ua latou ō pea+ seʻia oo ina tū le ao i le toafa o Parana.+
13 O le uluaʻi taimi lea ua latou malaga ese ai e tusa ma le faatonuga a Ieova e ala iā Mose.+
14 Ua muamua malaga ese se vaega o ituaiga e tolu o le fanauga a Iuta i a latou ʻautau, ma ua taʻitaʻia le ʻautau e Naasona+ le atalii o Aminatapu.
15 Ua taʻitaʻia e Netanielu+ le atalii o Suaro le ʻautau o le ituaiga o le fanauga a Isakara.
16 Ua taʻitaʻia e Eliapo+ le atalii o Horona le ʻautau o le ituaiga o le fanauga a Sepulona.
17 Ina ua tala i lalo le faleʻie paia,+ ona ō ai lea o atalii o Keresona+ ma atalii o Merari+ ma ave le faleʻie paia.
18 Ua malaga ese se vaega o ituaiga e tolu o le fanauga a Reupena i a latou ʻautau, ma ua taʻitaʻia le ʻautau e Elisura+ le atalii o Seturo.
19 Ua taʻitaʻia e Selumielu+ le atalii o Surisatai le ʻautau o le ituaiga o le fanauga a Simeona.
20 Ua taʻitaʻia e Eliasafo+ le atalii o Tuelu le ʻautau o le ituaiga o le fanauga a Kato.
21 Ona malaga ese lea o tagata o le aiga o Koato o ē e avea mea paia.+ E tatau ona māe‘a le faatūina o le faleʻie paia i le taimi e latou te taunuu atu ai.
22 Ua malaga ese se vaega o ituaiga e tolu o le fanauga a Efaraima i a latou ʻautau, ma ua taʻitaʻia le ʻautau e Elisama+ le atalii o Ameuta.
23 Ua taʻitaʻia e Kamalielu+ le atalii o Petasura le ʻautau o le ituaiga o le fanauga a Manase.
24 Ua taʻitaʻia e Apitano+ le atalii o Kitione le ʻautau o le ituaiga o le fanauga a Peniamina.
25 Ua malaga ese se vaega o ituaiga e tolu o le fanauga a Tanu e tusa ma a latou ʻautau e muliʻau i ituaiga uma, ma ua taʻitaʻia le ʻautau e Aisera+ le atalii o Amisatai.
26 Ua taʻitaʻia e Pagielu+ le atalii o Okirano le ʻautau o le ituaiga o le fanauga a Asera.
27 Ua taʻitaʻia e Akira+ le atalii o Enano le ʻautau o le ituaiga o le fanauga a Nafatali.
28 O le faasologa masani lea pe a malaga ese+ le fanauga a Isaraelu ma a latou ʻautau.
29 Ona fai atu lea o Mose iā Opapo, o le atalii o Reuelu*+ le Mitiana, le tamā o le avā a Mose: “O le a matou malaga ese atu i le mea na fetalai mai ai Ieova e faapea, ‘Ou te foaʻiina atu iā te outou.’+ Ia e sau tatou ō faatasi,+ ma matou te faia mea lelei iā te oe, auā ua folafola mai e Ieova mea lelei iā Isaraelu.”+
30 Ae ua ia faapea mai iā te ia: “Ou te lē alu atu, ae ou te toe foʻi i loʻu atunuu ma oʻu aiga.”
31 Ona ia faapea atu lea: “Faamolemole, aua e te tuua i matou, auā ua e iloa le toafa o le a faatutū ai o matou faleʻie, ia avea oe ma o matou ta‘ita‘iala.*
32 Afai tatou te ō faatasi,+ o mea lelei uma e faaali mai e Ieova iā i matou, e matou te faaali atu fo‘i iā te oe.”
33 Ona latou savavali ese lea mai i le mauga o Ieova+ mo se malaga e tusa ma le tolu aso, ma ua muamua atu i o latou luma le atolaau+ o le feagaiga a Ieova mo se malaga e tusa ma le tolu aso, ina ia saʻili se mea e latou te mapu ai.+
34 I le ao, ua iai le ao a Ieova+ i o latou luga a o latou savavali mai i le mea na faatutū ai o latou faleʻie.
35 O so o se taimi e ave ai le Atolaau, e faapea atu Mose: “Faamolemole Ieova e, inā tulaʻi ia+ ma faataapeape ou fili, ma ia sosola ese mai i ou luma o ē ua ʻinoʻino iā te oe.”
36 Ae pe a tuu i lalo le Atolaau, e faapea atu o ia: “Ieova e, ia e foʻi mai i le faitau afe* o tagata Isaraelu.”+
Faamatalaga Pito i Lalo
^ Epe., “Molimau.”
^ E faasino atu iā Ietero.
^ Po o “mata.”
^ Po o “i le mano ni mano.”
