Numera 12:1-16
12 Ua faitio Miriama ma Arona iā Mose ona o lana avā mai i Kuso, auā na ia faiavā i se fafine Kuso.+
2 Ua la faapea ane: “Pe e na o Mose ea ua fetalai mai ai Ieova? Po ua lē fetalai mai foʻi o ia e ala iā i taʻua?”+ Ua faafofoga i ai Ieova.+
3 O Mose, o le tagata e sili ona agamalu i tagata uma*+ ua i luga o le fogāeleele.
4 Ona fetalai faafuaseʻi mai lea o Ieova iā Mose ma Arona ma Miriama: “Inā ō atu ia outou e toʻatolu i le faleʻie o le feiloaʻiga.” Ona ō atu ai lea o i latou e toʻatolu.
5 Ona afio ifo lea o Ieova i le ao faaniutū+ ma ua tū i le faitotoʻa o le faleʻie ma valaau mai iā Arona ma Miriama. Ona la ō atu ai lea.
6 Ua ia fetalai mai: “Faamolemole, ia faalogo mai i aʻu upu. Afai e iai se perofeta a Ieova o iā te outou, ou te faailoa atu aʻu iā te ia e ala i se faaaliga,+ ma ou te tautala atu iā te ia i se miti.+
7 Ae ou te le‘i faia faapea i laʻu auauna o Mose! Ua faamaoni o ia i le vaavaaia o loʻu aiga atoa.+
8 E ma te faafesaga‘i pe a ou tautala atu iā te ia,+ ma ou faailoa manino atu iā te ia, e lē ala i ni tupua;* ma e na te vaaia le faatasi mai o Ieova. Aiseā ua oulua lē fefefe ai e faitio i laʻu auauna o Mose?”
9 Ona matuā toʻasā ai lea o Ieova iā i laʻua, ma ua ia afio ese ai.
10 Ua alu ese le ao mai i le faleʻie, faauta! ua taia Miriama i le lepela, ua paʻepaʻe e pei o le kiona.+ Ona faliu atu lea o Arona iā Miriama, ma vaaia ua taia o ia i le lepela.+
11 Ona fai mai loa lea o Arona iā Mose: “Auē loʻu alii e! Faamolemole, aua neʻi faasalaina i maʻua i lenei agasala! Ua ma gaoioi ma le lē mafaufau.
12 Faamolemole, aua neʻi tuua o ia e pei o se pepe ua oti, o lē ua palagia le tasi itu o lona tino ina ua fanau mai!”
13 Ona alaga lea o Mose iā Ieova e faapea: “Faamolemole le Atua e, faamolemole ia faamālōlō i loʻu tuafafine!”+
14 Ua tali mai Ieova iā Mose: “Pe afai e feanu saʻo lava lona tamā i ona foliga, pe e lē faamāina ai ea o ia i aso e fitu? Ia faanofoesea o ia i tua o le togālauapi+ mo aso e fitu, pe a mavae lea ona toe taliaina ai lea o ia.”
15 Ona faanofoesea lea o Miriama i tua o le togālauapi mo aso e fitu,+ ma e leʻi malaga ese le nuu seʻia toe talia Miriama.
16 Mulimuli ane, ua malaga ese le nuu mai i Haserota+ ma ua faatutū o latou faleʻie i le toafa o Parana.+
Faamatalaga Pito i Lalo
^ Po o le “e matuā sili atu lona lotomaulalo nai lo o se isi tagata.”
^ Po o “i ni upu lilo; i ni faataoto.”