Numera 16:1-50
16 Ua auaufaatasi Koru+ le atalii o Isara,+ o le atalii o Koato,+ o le atalii o Levi,+ faatasi ma Tatano ma Apiramo, o atalii o Eliapo+ ma Onu le atalii o Peleto, o atalii ia o Reupena.+
2 Ua latou auaufaatasi e tetee atu iā Mose, o i latou atoa ma tane Isaraelu e toʻa 250, o taʻitaʻi o le faapotopotoga, o ē ua filifilia o le faapotopotoga, o tane aloa‘ia.
3 Ona latou faapotopoto lea e tetee atu+ iā Mose ma Arona ma ua faapea mai iā i laʻua: “Ua matou fiu iā te oulua! E paia le faapotopotoga atoa+ ma ua faatasi Ieova ma i latou.+ Aiseā ua oulua faasili ai oulua i le faapotopotoga a Ieova?”
4 Ua faalogo Mose i ia upu ona faapaʻū faō lea o ia.
5 Ona ia fai atu lea iā Koru ma ē uma e lagolagoina o ia e faapea: “O taeao o le a faailoa mai ai e Ieova po o ai lē e fai mo ia+ ma o ai foʻi e paia, ma o ai e ao ona faalatalata atu iā te ia.+ O lē e na te filifilia,+ o ia lea e faalatalata atu iā te ia.
6 O oe Koru ma ē uma e lagolagoina oe,+ ia outou faia lenei mea: Ia ave salefu,+
7 ma tuu i ai le afi ma avane i ai mea manogi, i luma o Ieova i le aso a taeao, ma o le tagata e filifilia e Ieova,+ o ia lea e paia. O outou atalii o Levi,+ ua lava loa lenā!”
8 Ua faapea atili atu Mose iā Koru: “O outou o atalii o Levi, faamolemole ia faalogo mai.
9 Po o se mea faatauvaa ea iā te outou le vavaeese o outou e le Atua o Isaraelu mai i le faapotopotoga o Isaraelu,+ ma faataga outou e faalatalata atu iā te ia ina ia galulue i le faleʻie paia o Ieova, ma tutū i luma o le faapotopotoga e auauna iā i latou,+
10 ma ua ia avatu oe faatasi ma ou uso uma o atalii o Levi e faalatalata atu iā te ia? Po o se mea tatau la ona outou taumafai fo‘i e maua ma le faiva o ositaulaga?+
11 O le mea lea ua outou tetee ai iā Ieova, o oe ma ē uma e lagolagoina oe ua faapotopoto faatasi. A o Arona, o ai o ia ua outou muimui ai iā te ia?”+
12 Mulimuli ane, ua auina atu e Mose se isi e aami mai Tatano ma Apiramo+ o atalii o Eliapo, ae ua la faapea mai: “E ma te lē ō atu!
13 Po o se mea faatauvaa ea lou aumaia o i matou mai i le laueleele o loo tafe ai le suāsusu ma le meli ma fasiotia i matou i le toafa?+ Po ua e manaʻo tele fo‘i e avea oe ma o matou pule?*
14 E te leʻi avea fo‘i i matou i se laueleele e tafe ai le suāsusu ma le meli,+ pe tuuina mai iā i matou ni tofi o fanua ma togāvine. Po ua e fia manaʻo ea e sali ese mata o ia tagata? E ma te lē ō atu!”
15 Ona matuā ita ai lea o Mose ma faapea atu iā Ieova: “Aua lava neʻi e silasila i a latou taulaga i meaʻai. Ou te leʻi avea sa latou asini se tasi, pe agaleaga atu i se tasi o i latou.”+
16 Ua faapea atu Mose iā Koru: “O oe ma ē uma e lagolagoina oe, ia outou tulaʻi i luma o Ieova a taeao, o oe ma i latou ma Arona.
17 Ia taʻitasi ma ave lana salefu, ma outou avane i ai mea manogi ma ia taʻitasi ma alu atu ma lana salefu i luma o Ieova, e 250 mea e faamū ai mea manogi, ia taʻitasi oe ma Arona ma ave lana salefu.”
18 Ua taʻitasi i latou ma ave lana mea e faamū ai mea manogi, ua tuu i ai le afi ma avane i ai mea manogi, ma tutū i luma o le faleʻie o le feiloaʻiga faatasi ma Mose ma Arona.
19 Ina ua faapotopoto mai e Koru ē e lagolagoina o ia+ i le faitotoʻa o le faleʻie o le feiloaʻiga e tetee iā i laʻua, ona faaali mai lea o le mamalu o Ieova i le faapotopotoga uma.+
20 Ua fetalai mai Ieova iā Mose ma Arona:
21 “Ia oulua ō ese mai i lenei vaega, ina ia ou faaumatia vave i latou.”+
22 Ona la faapaʻuʻū faō lea ma faapea atu: “Le Atua e, le Atua o le ola o tagata uma,*+ pe e te toʻatamaʻi ea i le faapotopotoga atoa ona o le agasala a le tagata e toʻatasi?”+
23 Ona fetalai mai lea o Ieova iā Mose:
24 “Ia e fai atu i le faapotopotoga e faapea, ‘Ia ō ese mai i autafa o faleʻie o Koru, Tatano, ma Apiramo!’”+
25 Ona ō atu lea o Mose ma toeaina+ o Isaraelu iā Tatano ma Apiramo.
26 Ua ia fai atu i le faapotopotoga: “Faamolemole ia outou ō ese mai i luma o faleʻie o ia tane leaga ma aua tou te fetagofi i so o sa latou mea, ina neʻi faaumatia outou ona o a latou agasala uma.”
27 Ua latou ō ese loa mai i itu uma o faleʻie o Koru, Tatano, ma Apiramo, ona ō mai lea i fafo o Tatano ma Apiramo, ua tutū i faitotoʻa o o la faleʻie faatasi ma a la avā, o o la atalii, ma a la fanau iti.
28 Ua fai atu Mose: “O nei mea e tou te iloa ai ua auina mai aʻu e Ieova e faia ia galuega uma, ae ou te lē faia ona o loʻu loto:
29 Afai e feoti ia tagata e pei o le feoti o tagata uma, ma faasalaina i latou e pei o le faasalaga e oo i tagata uma, o lona uiga la e lē o Ieova na auina mai aʻu.+
30 Ae afai o le a faia e Ieova se mea uigaese iā i latou, ma faamaga le gutu o le eleele ma folo i latou ma a latou mea uma, ma ō ifo i latou a o feola i le Tuugamau,* ona outou iloa ai lea ua matuā lē faaaloalo ia tane iā Ieova.”
31 Ina ua uma ona ia fai atu nei upu uma, ona māvaevae lea o le eleele i lalo ifo o i latou.+
32 Ua faamaga le gutu o le eleele ma folo i latou, o o latou aiga, o tagata uma na iā Koru+ ma a latou mea uma.
33 Ua latou ō ifo i lalo i le Tuugamau* a o feola i latou, ma ē uma ua iā i latou, ua tanumia i latou i le eleele ma faaumatia ai mai i le faapotopotoga uma.+
34 Ua feʻei i latou ma ua sosola ai tagata Isaraelu uma mai i lea mea, auā ua latou faapea ane: “Ua tatou fefefe ina neʻi folo i tatou e le eleele!”
35 Ona alu ifo lea o se afi mai iā Ieova+ ma faaumatia ai le toʻa 250 o tane o loo avatua mea manogi.+
36 Ua fetalai mai Ieova iā Mose:
37 “Ia e fai atu iā Eleasaro le atalii o Arona le ositaulaga, e ao ona ia aveina aʻe salefu+ mai i le afi auā e paia ia mea. Ia fai atu fo‘i iā te ia e faasalalau le afi i se mea mamao.
38 O salefu a tane o ē ua feoti ona o a latou lava agasala, ia faaaogā ia mea e faia ai ni ‘apamemea mafolafola manifinifi e ufiufi ai le fata faitaulaga,+ auā na latou avatuina ia mea i luma o Ieova, ma ua paia ai. E fai ia ma faailoga i le fanauga a Isaraelu.”+
39 Ona ave lea e Eleasaro le ositaulaga, o salefu ʻapamemea na avatu e i latou na susunuina, ma ua sasa ia mea ina ia ufiufi ai le fata faitaulaga,
40 e pei ona fetalai mai ai Ieova iā te ia e ala iā Mose. E fai lea ma faamanatuga i le fanauga a Isaraelu ina neʻi faalatalata atu se tagata ese e lē o se tasi o le fanau a Arona, e faamū mea manogi i luma o Ieova,+ ma aua neʻi pei se tasi o Koru ma ē na lagolagoina o ia.+
41 A o le aso na sosoo ai na muimui ai le faapotopotoga uma o le fanauga a Isaraelu iā Mose ma Arona+ e faapea: “Ua oulua fasiotia tagata o Ieova.”
42 Ina ua faapotopoto le faapotopotoga e tetee atu iā Mose ma Arona, ua latou liliu atu i le faleʻie o le feiloaʻiga; faauta! ua ufitia i le ao ma ua faaali mai ai le mamalu o Ieova.+
43 Ona ō atu lea o Mose ma Arona i luma o le faleʻie o le feiloaʻiga,+
44 ma ua fetalai mai Ieova iā Mose:
45 “Ia oulua ō ese mai i lea faapotopotoga, ae seʻi o‘u faaumatia vave i latou.”+ Ona la faapaʻuʻū faō ai lea.+
46 Ona fai atu lea o Mose iā Arona: “Ia e ave le mea e faamū ai mea manogi ma tuu i ai le afi mai i le fata faitaulaga,+ ma avane i ai ni mea manogi, ma ia e alu faavave i le faapotopotoga e fai le togisala mo i latou,+ auā ua toʻatamaʻi Ieova. Ua amata le mala!”
47 Ona ave loa lea e Arona o le mea e faamū ai mea manogi e pei ona fai atu ai Mose, ua ia tamoʻe atu i le mea o iai le faapotopotoga; faauta! ua amata le mala i le nuu. Ona ia tuu lea o mea manogi i luga o le mea e faamū ai mea manogi ma faia le togisala mo le nuu.
48 Ua ia tū pea i le vā o ē ua feoti ma ē o loo ola. Mulimuli ane ua taofia le mala.
49 E toʻa 14,700 i latou na feoti i le mala, e ese mai iā i latou na feoti ona o Koru.
50 Ua toe foʻi Arona iā Mose i le faitotoʻa o le faleʻie o le feiloaʻiga, ma ua taofia le mala.
Faamatalaga Pito i Lalo
^ Po o le “e pulepuletutū iā i matou?”
^ Epe., “le Atua o agaga o tagata ma mea uma.”
^ Po o “Seoli.” Tagaʻi i le Uiga o Upu.
^ Po o “Seoli.” Tagaʻi i le Uiga o Upu.
