Numera 18:1-32
18 Ona fetalai mai lea o Ieova iā Arona: “O oe ma ou atalii, ma le aiga o lou tamā faatasi ma oe, e tou te tali atu pe a solia so o se poloaʻiga e faatatau i le mea paia,+ ma o oe ma ou atalii faatasi ma oe, e tou te tali atu pe a solia so o se poloaʻiga e faatatau i la outou faiva o ositaulaga.+
2 Ia faalatalata mai foʻi ou uso o le ituaiga o Levi, o le ituaiga o lou tamā, ina ia aufaatasi ma fesoasoani iā te oe+ ma ou atalii i luma o le faleʻie i le mea ua iai le atolaau o le feagaiga.*+
3 Ia latou tausia a latou tiute tauave iā te oe ma le faleʻie atoa.+ Peita‘i, e lē tatau ona latou faalatalata i mea e faaaogā i le mea paia ma le fata faitaulaga, neʻi feoti i latou atoa foʻi ma outou.+
4 E latou te aufaatasi ma oe ma tausia a latou tiute tauave i le faleʻie o le feiloaʻiga ma auaunaga uma o le faleʻie, ma e sā ona faalatalata atu iā te outou se tagata ese.*+
5 E ao ona outou tausia la outou tiute tauave i le mea paia+ ma le fata faitaulaga,+ ina neʻi toe oo le toʻasā+ i le fanauga a Isaraelu.
6 Ua ou aumaia ou uso, o le ʻau sa Levī mai i le fanauga a Isaraelu, o se meaalofa mo outou.+ O i latou ia ua avatu iā Ieova e faia le galuega o le faleʻie o le feiloaʻiga.+
7 E ao iā te oe ma ou atalii ona faataunuu o outou tiute o ni ositaulaga, e tusa ai ma le fata faitaulaga, ma mea uma ua i tua o le ʻie puipui;+ ia outou faia lenei auaunaga.+ Ua ou avatu iā te outou le auaunaga o le faiva o ositaulaga e fai ma meaalofa iā te outou, e fasiotia se tagata ese* e faalatalata atu i ai.”+
8 Ua toe fetalai mai Ieova iā Arona: “Ou te avatu iā te oe le pule i foaʻi ua faia iā te aʻu.+ Ua ou avatu iā te oe ma ou atalii e fai ma a outou tufaaga o mea paia uma ua foa‘i e le fanauga a Isaraelu, e fai ma au vaega tumau.+
9 E fai mo oe ia mea mai i taulaga e sili ona paia ua faia i le afi: o taulaga uma ua latou faia, e aofia ai a latou taulaga i meaʻai,+ ma a latou taulaga o agasala,+ ma a latou taulaga o le nofosala,+ ia e latou te aumaia iā te aʻu. O le mea e sili ona paia mo oe ma ou atalii.
10 E tatau ona e ʻaina i se nofoaga e sili ona paia.+ E mafai ona aai ai tane uma lava. O se mea paia lea iā te oe.+
11 O au mea ia: o le foaʻi+ o la latou meaalofa faatasi ma taulaga lūlū+ uma a le fanauga a Isaraelu. Ua ou tuuina atu ia mea iā te oe ma ou atalii ma ou afafine faatasi ma oe, e fai ma tufaaga tumau.+ E aai ai ē uma e mamā o lou aiga.+
12 “O le suāuu e sili ona lelei, ma le uaina fou aupito i lelei, o fatu ma uluaʻi fua,+ o mea ia e latou te avatu iā Ieova ou te avatua iā te oe.+
13 O uluaʻi fua ua matua o lo latou laueleele e latou te avatu iā Ieova, e fai mo oe.+ E aai ai i latou uma e mamā i lou aiga.
14 “O mea uma ua taofia mo se fuafuaga paia i Isaraelu, e ao ona avea ma au lava mea.+
15 “O ulumatua uma a tagata ma manu,+ ia o le a latou avatu iā Ieova, e fai mo oe. Peitaʻi e tatau ona e toe totogi atu lava ulumatua a tagata,+ ma e tatau ona e fesuiaʻi ulumatua a manu lē mamā.+
16 E ao ona e faatau mai i le tau e toe faatau mai ai, e amata mai i le masina agaʻi i luga le matua, e tusa ma le tau faatulagaina e lima sekeli* siliva+ e tusa ma le fua masani o le mea paia.* E 20 kire.*
17 E na o le povi poʻa ulumatua, po o le mamoe poʻa ulumatua, po o le ʻoti ulumatua e te lē fesuiaʻia.+ O ni manu paia. O toto o ia manu e te sausau i luga o le fata faitaulaga,+ ma le gaʻo o ia manu e te susunu e fai ai le taulaga i le afi, o se manogi lelei lea iā* Ieova.+
18 Ia ave mo oe aano o ia manu. E pei ona faia i le fatafata o le taulaga lūlū ma le alagavae taumatau, ia ave ma oe.+
19 O foaʻi paia uma ia o le a avatu e le fanauga a Isaraelu iā Ieova,+ ou te tuuina atu mo oe ma ou atalii ma ou afafine faatasi ma oe, o se tufaaga tumau.+ O le feagaiga tumau o le masima* i luma o Ieova, mo oe ma lau fanau faatasi ma oe.”
20 Ua fetalai atili mai Ieova iā Arona: “E leai sou tofi i lo latou laueleele, e leai foʻi sou fanua i le laueleele ua iā i latou.+ E fai aʻu ma ou tofi i le fanauga a Isaraelu.+
21 “Faauta! ua ou tuuina atu i atalii o Levi le tasi vaesefulu+ o mea i Isaraelu, e fai ma tofi ona o la latou galuega o loo faia, o le galuega o le faleʻie o le feiloaʻiga.
22 E sā ona toe faalatalata atu le fanauga a Isaraelu i le faleʻie o le feiloaʻiga, neʻi agasala ai ma feoti.
23 E tatau i le ʻau sa Levī ona faaauau la latou galuega o le faleʻie o le feiloaʻiga, ma o le a latou tali atu i mea sesē e faia e tagata faasaga i le mea paia.+ O le tulafono tumau lea mo outou ma o outou tupulaga o loo mulimuli mai, e lē maua so latou tofi i le fanauga a Isaraelu.+
24 O le tasi vaesefulu o mea a le fanauga a Isaraelu ia latou te foaʻi atu iā Ieova o se foaʻi tauofo, ou te avatua i le ʻau sa Levī e fai ma o latou tofi. O le mea lea ua ou fai atu ai iā te i latou, ‘E lē maua so latou tofi i le fanauga a Isaraelu.’”+
25 Ona fetalai mai lea o Ieova iā Mose:
26 “E ao ona e fai atu i le ʻau sa Levī, ‘E tou te maua mai i le fanauga a Isaraelu, le tasi vaesefulu o mea ua ou avatu iā te outou mai iā i latou, e fai mo outou tofi+ ma e ao ona outou foaʻi atu mai i lenā tasi vaesefulu, le tasi vaesefulu e fai ma foa‘i iā Ieova.+
27 E ao ona taʻua o a outou foaʻi, e pei o fatu i le mea e soli ai saito+ ma e pei foʻi o le tele o le uaina ma le suāuu o le olive.
28 O le auala lea e tou te faia ai foaʻi iā Ieova mai i le tasi vaesefulu o mea tou te maua mai i le fanauga a Isaraelu, ma e mai i na mea e ao ona outou avatu iā Arona le ositaulaga, le foaʻi mo Ieova.
29 O meaalofa uma ua avatu iā te outou,+ ia outou fai atu ai foaʻi o mea eseese iā Ieova, o mea uma e sili ona lelei, o le mea paia lea.’
30 “E ao ona e fai atu iā i latou, ‘Pe a outou foaʻi atu le mea e aupito sili ona lelei o na mea, o mea e totoe ai e mo outou le ʻau sa Levī, e pei o saito mai i le mea e soli ai a outou saito, ma e pei foʻi o fua e maua mai i le mea e soli ai a outou uaina ma olive.
31 E mafai ona outou ʻaina i so o se nofoaga, o outou ma o outou aiga, auā o lo outou totogi lea mo la outou galuega i le faleʻie o le feiloaʻiga.+
32 E tou te lē agasala i lenei mea pe a outou foaʻi atu mea e sili ona lelei mai i ia mea, aua foʻi tou te faaleagaina mea paia a le fanauga a Isaraelu, neʻi outou feoti.’”+
Faamatalaga Pito i Lalo
^ Epe., “Molimau.”
^ O se tasi e lē mai i le aiga o Arona.
^ O se tasi e lē mai i le aiga o Arona.
^ Po o le “e tusa ma le sekeli paia.”
^ Po o le “manogi ua faamalieina ai.”
^ E faasino atu i se feagaiga tumau ma e lē mafai ona suia.
