Numera 21:1-35
21 Ua logotala le tupu o Arata,+ o se tagata Kanana e nofo i Nekepi,* ua ō mai tagata Isaraelu i le ala o Atarima, ona ia tau lea ma Isaraelu ma ave faapagota nisi o i latou.
2 Ona faia lea e tagata Isaraelu o lenei tautoga iā Ieova: “Afai e te tuuina mai lava lenei nuu i o matou lima, matou te matuā faaumatia o latou aai.”
3 Ua faafofoga Ieova i le leo o tagata Isaraelu ma tuuina atu tagata Kanana iā i latou; ua latou matuā faaumatia i latou ma o latou aai. O lea ua latou taʻua ai lea mea o Horema.*+
4 A o latou malaga ese mai i le mauga o Horo,+ i le ala i le Sami Ulaula ina ia ui i autafa o Etoma,+ ua lē lavavā tagata ona o le faigāmalaga.
5 Ua faaauau ona faitio tagata i le Atua ma Mose+ e faapea: “Aiseā ua oulua aumaia ai i matou mai i Aikupito ina ia feoti i le toafa? Ua leai ni meaʻai po o ni vai,+ ma ua matou ʻinoʻino i lenei meaʻai e lē manaia.”+
6 Ona auina mai lea e Ieova o gata uogo i le nuu, ma ua ū ai pea tagata e ia gata, ua feoti ai foʻi le toʻatele o tagata Isaraelu.+
7 Ua ō mai le nuu iā Mose ma faapea mai: “Ua matou agasala, ona ua matou faaseā iā Ieova atoa ma oe.+ Ia faatoga atu iā Ieova ina ia aveese ia gata mai iā i matou.” Ona faatoga atu lea o Mose mo le nuu.+
8 Ua fetalai mai Ieova iā Mose: “Ia e faia se faatusa o se gata uogo ma tuu i luga o le pou. Afai e ū e se gata se tasi, e ao ona ia vaavaai atu i le gata ona ola ai pea lea o ia.”
9 Ona faia loa lea e Mose o se gata mai i le ʻapamemea+ ma tuu i luga o le pou;+ ma a ū le tagata e se gata, e vaavaai atu o ia i le gata ʻapamemea, ona ola ai pea lea o ia.+
10 Ua mavae lea ona malaga ese lea o le fanauga a Isaraelu mai i lea mea ma faatutū o latou faleʻie i Opoto.+
11 Ua latou malaga ese mai i Opoto ma faatutū o latou faleʻie i Ie-aperima+ i le toafa o loo feagai ma Moapi, i le itu i sasa‘e.
12 Ua latou malaga ese mai i inā ma faatutū o latou faleʻie e lata ane i le vanu* o Sareta.+
13 Ua latou ō ese mai i lea mea ma faatutū o latou faleʻie e latalata ane i Arinona,+ o loo i le toafa e alu atu i le tuaoi o tagata Amorī, auā o Arinona o le tuaoi o Moapi, i le vā o Moapi ma tagata Amorī.
14 O le mea lea ua ta‘ua ai i le tusi o Taua a Ieova “Vaepa* i Sufo ma vanu* o Arinona,
15 e oo atu vanu ma ona ālia i le nuu o Aro ma tau i le tuaoi o Moapi.”
16 Ona latou malaga atu lea i Pere. O le vaieli lea ua fetalai mai ai Ieova iā Mose: “Ia faapotopoto mai le nuu ma ou te avatu le vai iā te i latou.”
17 Ona pepese ai lea o tagata Isaraelu i lenei pese:
“Le vaieli e, Inā e puna aʻe ia! (Ia tali* atu i ai!)
18 O le vaieli na eli e perenise, ua elia e tamālii o le nuu,Ua eli i le tootoo o le taʻitaʻi, ma o latou lava tootoo.”
Ua latou tuua le toafa ma malaga atu i Matanaa,
19 ua latou tuua Matanaa ma malaga atu i Nalielu, ma mai i Nalielu e oo atu i Pamota.+
20 Ua latou tuua Pamota ma malaga atu i le vanu ua iai i le laufanua o Moapi,+ i le tumutumu o Peseka,+ e i luga aʻe o Iesimoni.*+
21 Ona aauina atu lea e Isaraelu o avefeʻau iā Sekono le tupu o tagata Amorī ma faapea atu:+
22 “Seʻi o matou ui atu i lou laueleele. E matou te lē afe ane i se fanua po o se togāvine. E matou te lē feinu foʻi i se vai o se vaieli. E matou te malaga i le Auala a le Tupu seʻia o matou sopoʻia lou laueleele.”+
23 Ae ua lē faatagaina e Sekono Isaraelu e ui ane i lona laueleele. Nai lo o lea, ua faapotopoto e Sekono ona tagata uma ma ō atu e faafetaui Isaraelu i le toafa, ma ua oo atu i Iaesa, ona tau lea ma Isaraelu.+
24 Peita‘i, ua fasiotia o ia e Isaraelu i le pelu+ ma ua fai foʻi mo i latou lona laueleele,+ e amata mai i Arinona+ e oo atu i Iapoka,+ e latalata i tagata Amonī, auā o Iasaru+ o le tuaoi lea o tagata Amonī.+
25 Ua maua foʻi e Isaraelu ia aai uma, ma ua latou nonofo i aai uma o tagata Amorī,+ i Hesepona ma ona tamaʻi aai uma.
26 Auā o Hesepona o le aai o Sekono le tupu o tagata Amorī, o ia foʻi lea na tau ma le tupu o Moapi ma aveese mai iā te ia ona laueleele uma e oo lava i Arinona.
27 O le mea lea ua iai se alagāupu faatauemu e faapea:
“Ō mai ia i Hesepona.
Ia fausia le aai o Sekono ma ia malosi lona faavae.
28 Auā ua alu aʻe se afi mai i Hesepona, o le afi mumū mai i le aai o Sekono.
Ua mū ai Aro i Moapi, o alii o mea maualuluga i Arinona.
29 Oi talofa iā te oe Moapi! O le a faaumatia lava oe, O tagata o Kimosa!+
O le a ia faia ona atalii ma ē e maumausolo ma ona afafine o le a ave faapagota e Sekono le tupu o tagata Amorī.
30 Ia tatou osofaʻia i latou;E faaumatia lava Hesepona e oo atu i Tipona;+Ia tatou faatafuna i latou e oo atu i Nofa;E sosolo le afi e oo atu i Metepa.”+
31 Ua nonofo Isaraelu i laueleele o tagata Amorī.
32 Ona aauina faalilolilo atu lea e Mose o nisi e mataʻi Iasaru.+ Ua latou mauaina ona tamaʻi aai ma tutuliese tagata Amorī na i lea mea.
33 Mulimuli ane ua latou liliu ma ō aʻe i le ala i Vasana. Ona sau lea o Oko+ le tupu o Vasana ma ona tagata uma ina ia faafetaui i latou i le taua i Eterei.+
34 Ua fetalai mai Ieova iā Mose: “Aua e te fefe iā te ia,+ auā ou te tuuina atu o ia i lou lima atoa ma ona tagata uma ma ona laueleele;+ e te faia iā te ia le mea e pei ona e faia iā Sekono le tupu o tagata Amorī, o lē sa nofo i Hesepona.”+
35 Ua latou fasiotia o ia ma ona atalii ma ona tagata uma, seʻia oo ina lē toe iai se isi e totoe o ona tagata,+ ona latou ave lea mo i latou o lona laueleele.+
Faamatalaga Pito i Lalo
^ Po o “le itu i saute.”
^ Lona uiga “O le Mea ua Faaumatia.”
^ Po o le “ālia.”
^ E foliga mai o se nofoaga e lē mautinoa le mea o iai. E lata ane i vanu o Arinona.
^ Po o “ālia.”
^ Po o le “pese.”
^ Pe atonu “o le toafa.”
