Numera 25:1-18
25 Ua nonofo Isaraelu i Setima,+ ona amata lea ona faia e tagata o amioga lē mamā taufeusuaʻiga ma afafine o tagata Moapi.+
2 Ua valaaulia e fafine tagata e ō atu i taulaga ua faia i o latou atua,+ ona aai lea o tagata o le nuu i taulaga ma ifo i o latou atua.+
3 O lea, ua aufaatasi tagata Isaraelu i le tapuaʻiga iā Paala o Peoro;+ ona matuā toʻasā ai lea o Ieova iā Isaraelu.
4 Ua fetalai mai Ieova iā Mose: “Ia pupuʻe ta‘ita‘i* uma o lenei nuu, ma fasiotia i latou ma faatautau o latou tino i le ao teatea* i luma o Ieova, ina ia liliuese ai le toʻasā tele o Ieova mai iā Isaraelu.”
5 Ona fai atu lea o Mose i faamasino o Isaraelu:+ “Ia taʻitasi outou ma fasioti ona tagata o ē ua aufaatasi i le tapuaʻiga iā Paala o Peoro.”+
6 Ae i lenā taimi, ua sau ai se tasi o le fanauga a Isaraelu ma aumai se fafine Mitiana+ e latalata i le mea ua iai ona uso, a o vāai i ai Mose atoa ma le faapotopotoga uma o le fanauga a Isaraelu, a o fetagisi i latou i le faitotoʻa o le faleʻie o le feiloaʻiga.
7 Ua vaai atu i ai Fineaso+ le atalii o Eleasaro, o le atalii o Arona le ositaulaga, ona tulaʻi loa lea o ia mai i le faapotopotoga ma ave le tao i lona lima.
8 Ua mulimuli atu o ia i le tane o Isaraelu i le faleʻie, ua tui ma ua ati ai iā i laʻua, o le tane o Isaraelu atoa ma le fafine i ona totogasā. Ona taofia ai lea o le mala i le fanauga a Isaraelu.+
9 O i latou na feoti i le mala e toʻa 24,000.+
10 Ona fetalai mai lea o Ieova iā Mose:
11 “Ua liliuese e Fineaso+ le atalii o Eleasaro, o le atalii o Arona le ositaulaga, loʻu ita tele i le fanauga a Isaraelu, e ala i lona lē lagolagoina o lo latou lē faamaoni iā te aʻu.+ O le mea lea ua ou lē faaumatia ai le fanauga a Isaraelu ona o loʻu maumauaʻi e tapuaʻi mai tau lava o aʻu.*+
12 O le mea lea ia e fai atu ai, ‘Ou te tuuina atu iā te ia laʻu feagaiga o le filemu.
13 Ia fai ma feagaiga o le faiva o ositaulaga e tumau mo ia ma lana fanau pe a mavae atu o ia,+ talu ai na te leʻi lagolagoina le lē faamaoni i lona Atua,+ ma na ia faia foʻi le togisala mo le fanauga a Isaraelu.’”
14 O le igoa foʻi o le tane Isaraelu na fasiotia faatasi ma le fafine Mitiana, o Semeri le atalii o Salu, o se taʻitaʻi o le ʻauaiga o se tasi o tamā mai i le ituaiga o Simeona.
15 A o le igoa o le fafine Mitiana o lē na fasiotia, o Kosepi le afafine o Suro;+ o ia foʻi o se ta‘ita‘i o se ʻauaiga o se tasi o tamā mai i Mitiana.+
16 Mulimuli ane, ua fetalai mai Ieova iā Mose:
17 “Ia faatigā i tagata Mitiana ma fasiotia i latou,+
18 auā ua latou faatigā iā te outou i a latou gaoioiga faaʻoleʻole na latou faia iā te outou i le mataupu iā Peoro,+ ma le mataupu iā Kosepi le afafine o se tasi o taʻitaʻi Mitiana, o lo latou tuafafine lea na fasiotia+ i le aso na tupu ai le mala, ona o le mataupu iā Peoro.”+
Faamatalaga Pito i Lalo
^ Epe., “ulu.”
^ Epe., “i luma o le lā.”
^ Po o le “e tuutoina atoatoa mai iā te aʻu.”
