Numera 31:1-54
31 Ona fetalai mai lea o Ieova iā Mose:
2 “Ia faaoo atu le tauimasui+ i tagata Mitiana+ ona o le fanauga a Isaraelu. Mulimuli ane e faatasia atu oe i ou tagata.”*+
3 Ua fai atu Mose i le nuu e faapea: “Ia faaauupegaina ni tamāloloa mai iā te outou mo le taua* ina ia latou faasagatau iā Mitiana, ma faaoo le tauimasui a Ieova iā Mitiana.
4 Ia e aauina atu le toʻa 1,000 mai i ituaiga taʻitasi o ituaiga uma o Isaraelu ina ia ō atu e tau.”
5 Ona saunia lea o le toʻa 1,000 mai i ituaiga taʻitasi mai i le faitau afe o Isaraelu,+ e toʻa 12,000 ua faaauupegaina mo le taua.*
6 Ona aauina atu lea o i latou e Mose e ta‘itoʻaafe mai i ituaiga taʻitasi e ō i le taua, atoa ma Fineaso+ le atalii o Eleasaro le ositaulaga mo le ‘autau, ua i lona lima foʻi o mea paia ma pū mo le taua.+
7 Ua latou tau ma Mitiana e pei ona poloaʻi mai ai Ieova iā Mose, ma ua latou fasiotia tane uma lava.
8 E aofia ai i ē na latou fasiotia o tupu o Mitiana, o Evi, o Rekima, o Suro, o Huro, ma Repa, o tupu ia e toʻalima o Mitiana. Ua latou fasiotia foʻi i le pelu o Palaamo+ le atalii o Peoro.
9 Ae ua ave faapagota e tagata Isaraelu o fafine Mitiana ma a latou fanau. Ua latou faoa foʻi a latou manu lalata uma, o lafumanu uma, ma a latou oloa uma.
10 Ua latou susunuina i le afi o latou aai uma na latou nonofo ai, ma o latou togālauapi uma.*
11 Ua latou ave le vete* uma ma mea uma na faoa, o tagata atoa foʻi ma manu.
12 Ona latou aumaia lea o pagota, o mea na faoa, ma le vete iā Mose ma Eleasaro le ositaulaga, ma le faapotopotoga o le fanauga a Isaraelu, i le togālauapi i le fanua laugatasi o le toafa o Moapi,+ e lata ane i Ioritana e faafesagaʻi ma Ieriko.
13 Ona ō atu lea o Mose ma Eleasaro le ositaulaga, ma taʻitaʻi uma o le faapotopotoga, e feiloaʻi ma i latou i tua o le togālauapi.
14 Ae ua matuā ita Mose i tamāloloa ua tofia o le ʻautau, o taʻitaʻi o le taʻitoʻaafe ma taʻitaʻi o le taʻitoʻaselau o ē na ō mai i le taua.
15 Ona fai atu lea o Mose iā i latou: “Po ua outou faasaoina fafine uma?
16 Vaai outou! O i latou ia na faapogaia ai le lē faamaoni+ o le fanauga a Isaraelu iā Ieova, ona o le tala a Palaamo, e tusa ai ma le mataupu iā Peoro,+ ma na oo mai ai le mala i le faapotopotoga a Ieova.+
17 Ia fasiotia loa tama tama uma mai i tamaiti, ma fasiotia fafine uma na feusuaʻi ma ni tamāloloa.
18 Ae ia faasao teine muli uma e leʻi feusua‘i ma ni tamāloloa.+
19 Ia outou nonofo i tua o le togālauapi mo aso e fitu. O outou uma na fasiotia se tasi, ma outou uma na paʻi i se isi ua fasiotia,+ e ao ona outou faamamā iā te outou+ i le aso lona tolu ma le aso lona fitu, o outou ma a outou pagota.
20 Ia outou faamamāina ofu uma, o mea uma e faia i paʻu, o mea uma e faia i fulufulu ʻoti, ma mea uma e faia mai i laau.”
21 Ua fai atu foʻi Eleasaro le ositaulaga, i tamāloloa o le ʻautau o ē na ō atu i le taua: “O le tulafono lenei na poloaʻi mai ai Ieova iā Mose,
22 ‘Tau lava o le auro, o le siliva, o le ʻapamemea, o uʻamea, o ʻapa ma pulu,*
23 o mea uma e lē mū i le afi, e ao ona outou tuu i le afi ina ia faamamā ai. Peita‘i, e ao foʻi ona faamamāina i le vai.+ O mea uma e mū i le afi, e ao ona outou tuu i le vai.
24 E ao ona outou tatā o outou ofu i le aso lona fitu ma ia mamā ai, ona mafai ai lea ona outou ō mai i le togālauapi.’”+
25 Ona fetalai mai lea o Ieova iā Mose:
26 “Ia faitau le aofaʻi o mea na faoa, o tagata na ave faapagota, atoa foʻi ma manu; ia faia lenei mea faatasi ma Eleasaro le ositaulaga, ma ulu o aiga o le faapotopotoga.
27 Ia e vaevae mea na faoa i ni vaega se lua, iā i latou na auai i le taua ma le faapotopotoga atoa.+
28 Ina ia fai ma lafoga mo Ieova, e ao ona e aumai mai i fitafita na ō atu i le taua, le tagata e toʻatasi mai i tagata e toʻa 500, ma le manu e tasi mai i povi e 500 ma asini ma mamoe.
29 E ao ona e aumaia ia mai i la latou vaega, ma avatu iā Eleasaro le ositaulaga, e fai ma foaʻi iā Ieova.+
30 E ao ona e aumaia mai i le vaega na avatu i le fanauga a Isaraelu le tagata e toʻatasi mai i tagata e toʻa 50, ma le manu e tasi mai i povi e 50, o asini ma mamoe, ma manu lalata eseese, ma avatu ia i le ʻau sa Levī,+ o ē o loo tausia tiute tauave i le faleʻie paia o Ieova.”+
31 Ua faia e Mose ma Eleasaro le ositaulaga, e pei ona poloaʻi mai ai Ieova iā Mose.
32 O le vete, o mea na totoe o mea na faoa e tagata i le taua, e 675,000 mamoe,
33 e 72,000 povi,
34 ma asini e 61,000.
35 O le aofaʻi o fafine e leʻi feusua‘i ma ni tamāloloa,+ e to‘a 32,000.
36 O le vaega ua fai mo i latou na ō atu i le taua, e tusa ma le 337,500 mamoe.
37 O le lafoga mo Ieova mai i mamoe, e 675.
38 E 36,000 le aofaʻi o povi, ma o le lafoga mo Ieova mai i ia manu e 72.
39 E 30,500 asini, ma o le lafoga mo Ieova mai i ia manu e 61.
40 E 16,000 le aofaʻi o tagata, ma o le lafoga mo Ieova mai i ia tagata e toʻa 32 tagata.
41 Ona avatu lea e Mose o le lafoga e fai ma foaʻi mo Ieova iā Eleasaro le ositaulaga,+ e pei ona poloaʻi mai ai Ieova iā Mose.
42 O mea nei mai i le vaega a le fanauga a Isaraelu, lea na vaea e Mose mai i mea a tagata na ō i le taua:
43 o mamoe e 337,500,
44 o povi e 36,000,
45 o asini e 30,500,
46 ma tagata e toʻa 16,000.
47 Ona avatu lea e Mose mai i le vaega a le fanauga a Isaraelu, le tagata e toʻatasi mai i tagata e toʻa 50, ma le manu e tasi mai i manu e 50, ma ua avatu ai i le ʻau sa Levī,+ o ē o loo tausia tiute tauave i le faleʻie paia o Ieova,+ e pei ona poloaʻi mai ai Ieova iā Mose.
48 Ua faalatalata mai iā Mose tane ua tofia e taʻitaʻia vaega* o le ʻautau,+ o taʻitaʻi ia o le taʻitoʻaafe ma taʻitaʻi o le taʻitoʻaselau,
49 ma ua latou fai mai iā Mose: “Ua faitauina e au auauna le aofaʻi o tamāloloa o le taua na iai i la matou vaavaaiga, ma e leai se isi ua leiloa mai iā i matou.+
50 Seʻi o matou taʻitasi ma avatu mea ua maua e le tagata lava ia e fai ma foaʻi iā Ieova, o teuga o auro, o tauvae filifili, o taulima, o mama, o tautaliga, ma isi teuga, ina ia fai ai le togisala mo i matou i luma o Ieova.”
51 Ona talia lea e Mose ma Eleasaro le ositaulaga, o auro uma mai iā i latou ma teuga uma.
52 O auro uma o le foaʻi ua latou avatu iā Ieova, e 16,750 sekeli,* o mea ia mai i taʻitaʻi o le taʻitoʻaafe ma taʻitaʻi o le taʻitoʻaselau.
53 Ua taʻitasi ma ave e tamāloloa o le ʻautau o mea ua faoa mo ia lava.
54 Ona talia lea e Mose ma Eleasaro le ositaulaga, o auro mai i taʻitaʻi o le taʻitoʻaafe ma taʻitaʻi o le taʻitoʻaselau, ma avatu na mea i totonu o le faleʻie o le feiloaʻiga, e fai ma faamanatuga mo le fanauga a Isaraelu i luma o Ieova.
Faamatalaga Pito i Lalo
^ O se faaupuga faafatusolo lea mo le oti.
^ Po o “mo le ʻautau.”
^ Po o “mo le ʻautau.”
^ Po o “togālauapi ua siʻomia i pā.”
^ Tagaʻi i le Uiga o Upu.
^ O se ituaiga o uʻamea e vaivai toe faaʻefuʻefu lanu moana, e liusuāvaigofie pe a faavevela i se afi.
^ Epe., “vaega e taʻitoʻaafe.”
