O le Tusi i le Faapotopotoga i Roma 1:1-32
1 O aʻu o Paulo o le pologa a Keriso Iesu, ua valaauina e avea ma aposetolo, ua tofia* mo le tala lelei a le Atua,+
2 lea na ia muaʻi folafola mai i Tusitusiga Paia e ala i ana perofeta,
3 e faatatau i lona Alo, o lē na fanau mai i le aiga o Tavita+ i le itu faaletino.
4 O lē na folafolaina mai o le Alo o le Atua+ e tusa ma le mana o le agaga paia, e ala i le toetū mai i le oti,+ ioe, o Iesu Keriso lea o lo tatou Alii.
5 E ala iā te ia ua tatou maua ai le agalelei faifua ma le tofiga o ni aposetolo,+ ina ia usiusitaʻi atunuu uma+ i le faatuatua ona o lona suafa,
6 ua valaauina foʻi outou mai i ia atunuu ina ia avea ma soo o Iesu Keriso.
7 O laʻu tusi lenei iā i latou uma o i Roma ua alofagia e le Atua, o ē ua valaauina e avea ma le ʻaupaia:
Tau ina ia iā te outou le agalelei faifua ma le filemu mai le Atua lo tatou Tamā, ma le Alii o Iesu Keriso.
8 E muamua lava ona ou faafetai i loʻu Atua e ala iā Iesu Keriso ona o outou uma, auā ua taʻua lo outou faatuatua i le lalolagi atoa.
9 O le Atua o loo oʻu faia i ai le auaunaga paia ma loʻu agaga atoa, e tusa ma le tala lelei i lona Alo, o loo molimau o ia i loʻu taʻua e lē aunoa o outou i aʻu tatalo,+
10 ma ou te ʻaiʻoi atu foʻi iā te ia pe a tusa ai ma lona finagalo, ina ia mafai ona ou alu atu iā te outou.
11 Auā ua ou matuā naunau lava e fia feiloaʻi ma outou, ina ia ou avatu ni meaalofa faaleagaga e faatumauina ai outou;
12 ma ia tatou fefaalaeiauaʻi ai+ i le faatuatua, o outou atoa ma aʻu.
13 Ae ou te manaʻo ina ia outou iloa le ʻauuso e, e tele lava taimi na ou fuafua ai e alu atu iā te outou, ina ia ou maua ni fua mai iā te outou e pei foʻi o isi nuu uma, ae ua taofia aʻu e oo mai i le taimi nei.
14 Ua iai loʻu tiute tauave* i tagata Eleni atoa ma nuu ese,* o ē e atamamai atoa ma ē e lē malamalama;
15 o lea, ua ou naunau tele ai e folafola atu le tala lelei iā te outou foʻi i Roma.+
16 Ou te lē mā i le tala lelei;+ ona o le mana lea o le Atua e faaolaina ai ē uma ua faatuatua,+ e muamua i tagata Iutaia+ atoa ma Eleni.+
17 Auā ua iloa e i latou o ē e faatuatua, o le mea lenei ua faaalia ai le amiotonu a le Atua,+ ma ua faamalosia ai lo latou faatuatua, auā ua tusia: “O lē e amiotonu, e ola o ia i le faatuatua.”+
18 Ua faaalia le toʻasā o le Atua+ mai i le lagi i amioga faalēmataʻu ma amioga lē tonu uma a tagata, o ē ua taofiofia ma le lē tonu le upu moni,+
19 auā ua manino iā i latou mea e mafai ona iloa e faatatau i le Atua, ona ua faailoa atu e le Atua iā i latou.+
20 Auā o ona uiga lē vaaia, ua vaaia lava ia talu ona foafoaina le lalolagi, ona ua mafai ona vaaia i mea na faia,+ e oo foʻi i lona mana e faavavau+ ma lona tulaga o le Atua,+ o lea ua lē mautali ai i latou.
21 E ui lava ina latou iloa le Atua, ae e latou te leʻi faamamaluina o ia pe e faafetaia foʻi o ia, ua faavaleaina o latou mafaufau ma ua faapouliuligia o latou loto ua vālea.+
22 Ua vālea i latou e ui ina faapea mai ua atamamai i latou,
23 ua latou fesuiaʻi foʻi le mamalu o le Atua o lē e soifua pea lava, ina ia pei o le faatusa o le tino o le tagata e pala, ma manufelelei, o manu vaefā, ma manu fetolofi.+
24 O lea, ona o tuʻinanauga o o latou loto, ua tuu ai pea i latou e le Atua i amioga lē mamā, ina ia faaleagaina ai o latou tino.
25 Na latou fesuiaʻia le upu moni a le Atua ma le upu pepelo, ma na latou tapuaʻi ma avatu le auaunaga paia i mea na foafoaina, ae e lē o Lē na foafoaina nei mea uma, o lē e viia e faavavau. Amene.
26 O le mea lea ua tuu ai pea i latou e le Atua i o latou tuʻinanauga matagā i feusuaʻiga,+ auā ua fesuiaʻi e fafine tū e masani ai, i tū e lē masani ai.+
27 E faapena foʻi tane, ua latou tuua tū* e masani ai ma fafine, ae ua mū i le tuʻinanau e feusuaʻi ma isi tane+ ma faia amioga matagā, ma faasala* ai i latou i mea sesē ua latou faia.+
28 Talu ai e latou te leʻi mananaʻo e iloa lelei le Atua, na tuu ai pea i latou e le Atua i o latou mafaufauga leaga e faia mea e lē tatau.+
29 Ua tutumu i latou i le amiolētonu uma lava,+ o le amioleaga, o le matapeʻapeʻa,*+ o le faalēmataʻu, o le matauʻa,+ o le fasioti tagata,+ o le femisaaʻi, o le taufaasesē,+ ma le taulamalama,+ o ē e faitatala,
30 o ē e taumuimui,+ o ē e ʻinoʻino i le Atua, o le fiasili, o le faamaualuga, o le gugutu, o ē e fafau i mea leaga, o le lē usitaʻi i mātua,+
31 o le lē malamalama,+ o le lē tausisi i maliega, o le lē lotoaiga, ma le lē alofa mutimutivale.
32 E ui lava ina latou iloa lelei le poloaʻiga tonu mai le Atua e faapea, e tatau ona oti i latou o ē e faia mea faapena,+ ae ua latou faia pea na mea, ma ua fiafia foʻi i ē ua faia na mea.
Faamatalaga Pito i Lalo
^ Ele., “vavaeese.”
^ Ele., “Ua ou nofo aitalafu.”
^ Po o “tagata e lē o ni Eleni.”
^ Po o “feusuaʻiga.”
^ Po o le “tauia.”
^ Po o le “manaʻo tele.”
