O le Tusi i le Faapotopotoga i Roma 10:1-21
10 Le ʻauuso e, o le manaʻo lenei o loʻu loto ma laʻu talosaga i le Atua mo Isaraelu, ina ia faaolaina i latou.+
2 Auā ua ou molimau iā i latou, ua latou maelega i le Atua+ ae e lē tusa ai ma le poto saʻo.
3 Ona o lo latou lē iloaina o le amiotonu a le Atua+ ae ua latou saʻili e faatū la latou lava amiotonu,+ ua latou lē gauaʻi ai i le amiotonu a le Atua.+
4 Auā o le iʻuga o le Tulafono o Keriso lea,+ ina ia maua e i latou uma e faatuatua le amiotonu.+
5 Auā ua tusi Mose e faatatau i le amiotonu e tusa ai ma le Tulafono: “O le tagata e faia ia mea, e ola lava o ia ona o nei mea.”+
6 Ae e tusa ai ma le amiotonu lea e maua mai i le faatuatua, ua faapea mai: “Aua e te faapea ifo i lou loto,+ ‘O ai e alu aʻe i le lagi?’+ o lona uiga, ina ia ave ifo i lalo Keriso,
7 pe faapea, ‘O ai e alu ifo i le tō?’+ o lona uiga, ina ia ave aʻe Keriso mai i le oti.”
8 Ae o le ā ua fai mai ai? “Ua latalata mai iā te oe le upu, i lou lava gutu ma lou lava loto”;+ o “le upu” lea o le faatuatua, o loo tatou talaʻia.
9 Afai e te faalauiloa atu i lou lava gutu i luma o tagata o Iesu o le Alii,+ ma faatuatua i lou lava loto ua faatūina o ia e le Atua mai i le oti, e faaolaina ai oe.
10 Auā o le loto e faatuatua ai e maua ai le amiotonu, a o le gutu e taʻutino atu ai i luma o tagata,+ e maua ai le faaolataga.
11 Auā ua tusia i tusitusiga paia: “E leai se tasi e faatuatua iā te ia e faanoanoa.”*+
12 E leai se eseesega o le Iutaia ma le Eleni.+ E toʻatasi lava le Alii o tagata uma, o lē e foaʻi mai le tele o mea* i ē uma e valaau atu iā te ia.
13 Auā “e faaolaina i latou uma o ē e valaau i le suafa o Ieova.”*+
14 Ae e faapefea ona latou valaau atu iā te ia o lē e latou te lē o faatuatua i ai? E faapefea ona latou faatuatua iā te ia o lē e latou te lē o faalogo i ai? E faapefea foʻi ona latou faalogo pe a leai se tasi e talaʻi atu?
15 E faapefea ona latou talaʻi atu pe afai e leʻi aauina atu i latou?+ E pei ona tusia: “Maʻeu le matagofie o vae o ē e folafola atu le tala lelei o mea lelei!”+
16 Peitaʻi, e leʻi usiusitaʻi i latou uma i le tala lelei. Auā ua faapea mai Isaia: “Ieova* e, o ai ua faatuatua i le mea ua faalogo ai mai iā i matou?”*+
17 O lea, e tupu le faatuatua i mea ua faalogo i ai.+ O mea foʻi e faalogo i ai, o le upu lea e uiga iā Keriso.
18 Ae ou te fesili atu, Pe na faalogo ea i latou? Auā o le mea moni, “ua oo atu o latou leo i le lalolagi uma, ma la latou fe‘au i tulu‘iga o le lalolagi.”+
19 Ae ou te fesili atu foʻi, pe e leʻi iloa ea e Isaraelu?+ Na muamua ona faapea mai o Mose: “Ou te faatupu iā te outou le fuā e ala i le nuu e lē o se nuu; ou te faatupu foʻi iā te outou le ita tele e ala i se nuu vālea.”+
20 Ae ua lototele Isaia ma faapea mai: “Ua maua aʻu e i latou o ē e leʻi saʻili iā te aʻu;+ ua ou faailoa atu aʻu i ē e leʻi fesili mai mo aʻu.”+
21 Ae ua fetalai o ia e faatatau iā Isaraelu: “O le aso atoa na faaloaloa atu ai oʻu lima i se nuu faalogogatā ma le lotomaaa.”+
