O le Tusi i le Faapotopotoga i Roma 12:1-21
12 O le mea lea le ʻauuso e, ou te ʻaiʻoi atu iā te outou i le alofa mutimutivale o le Atua, ia tuuina atu o outou tino+ o le taulaga ola, e paia,+ ma e mālie i le Atua, ia faia le auaunaga paia ma lo outou mafaufau lelei.+
2 Aua tou te mulimuli i lenei faiga o mea a le lalolagi,* ae ia liliu e ala i le suia o o outou mafaufau,+ ina ia faamaonia e outou lava+ po o le ā le finagalo o le Atua, lea e lelei, e mālie, ma e lelei atoatoa.
3 Auā e ala i le agalelei faifua ua foaʻiina mai iā te aʻu, ou te fai atu ai iā te outou taʻitoʻatasi, ina ia aua neʻi faasili le manatu o se tasi iā te ia lava,+ i lo o le mea e tatau ona manatu i ai, ae ia mafaufau lelei, ia taʻitasi ma faia e tusa ma le tele o le faatuatua+ ua tuuina mai e le Atua iā te ia.
4 Auā e pei ona tele o tatou itutino i le tino e tasi,+ ae e lē tutusa uma gaoioiga e faia e itutino taʻitasi,
5 e faapena foʻi i tatou, e ui ina tatou toʻatele, ae e tasi le tino i lo tatou autasi ma Keriso, ma o i tatou o itutino e faalagolago le tasi i le isi.+
6 Talu ai e eseese meaalofa ua tatou maua e tusa ma le agalelei faifua ua tuuina mai iā i tatou,+ po o le faia o valoaga, seʻi o tatou faia valoaga e tusa ma le faatuatua ua tuuina mai iā i tatou;
7 po o le auaunaga, seʻi o tatou faia lenei auaunaga; po o lē e aʻoaʻo atu, ia aʻoaʻo atu o ia;+
8 po o lē e faalaeiau* atu, ia faalaeiau* atu o ia;+ o lē e foaʻi atu, ia faia ma le matamau;+ o lē e pule,* ia faia ma le filigā;+ o lē e alofa mutimutivale, ia faia ma le lotofiafia.+
9 Aua tou te faatagā alofa.+ Ia ʻinoʻino i le leaga;+ ia pipii i le lelei.
10 Ia matuā alofa faapelepele le tasi i le isi i le alofa faaleuso. Ia tausolomua ona faaaloalo le tasi i le isi.+
11 Ia toʻaʻaga,* ae aua le paiē.*+ Ia maelega i la le agaga.+ Ia outou pologa mo Ieova.*+
12 Ia olioli i le faamoemoe. Ia tutumau i puapuaga.+ Ia finafinau i le tatalo.+
13 Ia tufatufa atu i le ʻaupaia mea e tusa ai ma o latou manaʻoga.+ Ia faaalia le agaga talimālō.+
14 Ia faamanuia atu pea i ē ua sauā mai;+ ia faamanuia atu ae aua le fetuu atu.+
15 Ia olioli faatasi ma ē o loo olioli; ia fetagisi faatasi ma ē o loo fetagisi.
16 Ia manatu i isi e pei ona outou manatu ifo iā te outou lava; aua tou te manatu i mea silisili, ae ia taʻitaʻia faatasi ma mea faatauvaa.+ Aua tou te faafiapopoto.+
17 Aua le taui atu le leaga i le leaga i se tasi.+ Ia manatunatu i mea e lelei i le vaaiga a tagata uma.
18 Afai e mafai iā te outou, ia nonofo filemu ma tagata uma.+
19 Le ʻaupele e, aua tou te tauimasui, ae ia tuu atu i le toʻasā;*+ auā ua tusia: “ʻO aʻu e faia le tauimasui; ou te taui atu lava,’ ua fetalai mai ai Ieova.”*+
20 Ae “afai e fia ʻai lou fili, ia fafaga iā te ia; afai e fia inu o ia, ia avatu i ai se meainu; auā a e faia lenei mea, e faaputu ai pea malala ola i luga o lona ulu.”*+
21 Aua le faatoʻilaloina oe i le leaga, ae ia faatoʻilaloina pea le leaga i le lelei.+
Faamatalaga Pito i Lalo
^ Tagaʻi i le Uiga o Upu.
^ Po o “lē e taʻimua.”
^ Po o le “apoapoaʻi.”
^ Po o le “apoapoaʻi.”
^ Po o le “Aua le faifaiaga i a outou galuega.”
^ Po o le “filigā; maelega.”
^ E faasino atu i le toʻasā o le Atua.
^ E faasino atu i le taumafai e suia uiga o le tagata ma faavaivaia lona lotomaaa.
