O le Tusi i le Faapotopotoga i Roma 16:1-27
16 Ou te faailoa atu iā te outou lo tatou tuafafine o Fipe, o ia o se auauna i le faapotopotoga i Kenikerea,+
2 ina ia outou talia o ia o se soo o le Alii e faapei ona tatau i le ʻaupaia, ma outou fesoasoani iā te ia i so o se mea e na te manaʻomia,+ auā na ia fesoasoani i le toʻatele, e aofia ai ma aʻu.
3 E momoli atu oʻu alofaaga iā Piseka* ma Akula,+ o ē na matou galulue faatasi o ni soo o Keriso Iesu,
4 o ē na lamatia o la ola ona o aʻu,+ ou te faafetai atu iā i laʻua, e lē na o aʻu ae atoa foʻi ma faapotopotoga uma i nuu ese.
5 Ia alofa atu foʻi i le faapotopotoga o loo i lo la fale.+ Ia alofa atu foʻi iā Epaineto o lē e pele iā te aʻu, o se tasi o uluaʻi soo o Keriso i Asia.
6 Ia alofa atu iā Maria, o lē na galue mamafa mo outou.
7 Ia alofa atu foʻi iā Aneroniko ma Iunia, o oʻu aiga+ ma o ē na matou falepuipui faatasi, o tane o ē ua ta‘uleleia e aposetolo, ma o ē na muamua avea ma soo o Keriso nai lo o aʻu.
8 E momoli atu oʻu alofaaga iā Amepelia o lē e pele iā te aʻu, o se soo o le Alii.
9 Ia alofa atu iā Upano o lē o loo tatou galulue faatasi o ni soo o Keriso, ma Sataku o lē e pele iā te aʻu.
10 Ia alofa atu iā Apele, o lē ua taʻuleleia ona o se soo o Keriso. Ia alofa atu foʻi iā i latou i le aiga o Arisopulo.
11 Ia alofa atu iā Herotiona o lē e ma te aiga. Ia alofa atu foʻi iā i latou i le aiga o Nakiso o soo o le Alii.
12 Ia alofa atu iā Tufaina ma Tufosa, o fafine o loo galulue malolosi o soo o le Alii. Ia alofa atu iā Peseti o lē e pele iā i tatou, auā na galue malosi o ia o se soo o le Alii.
13 Ia alofa atu iā Rufo o lē ua filifilia o se soo o le Alii, ma lona tinā, o loʻu tinā foʻi lea.
14 Ia alofa atu iā Asugerito, Fegona, Herema, Pateropa, Hereme, ma le ʻauuso o loo latou faatasi.
15 Ia alofa atu iā Filoloko ma Iulia, o Nereu ma lona tuafafine, ma Olumepa, ma le ʻaupaia uma o loo latou faatasi.
16 Ia faafeiloaʻi e le tasi le isi i le sogi paia. O loo alolofa atu foʻi faapotopotoga uma a Keriso iā te outou.
17 Le ʻauuso e, ou te ʻaiʻoi atu iā te outou ina ia mataalia i ē e faatupu fevaevaeaʻiga ma mea e tautevateva ai e lē tusa ma mea ua outou aʻoaʻoina, ma ia ʻaloese mai iā i latou.+
18 O tagata faapena e lē o ni pologa a lo tatou Alii o Keriso, ae e pologa i o latou lava manava, ma ua latou faasesēina ē e lotomamā, e ala i a latou upu faaʻoleʻole ma le taufaasee.
19 Ua iloa e tagata uma lo outou usiusitaʻi, o le mea lea ua ou olioli ai ona o outou. Ae ou te manaʻo ina ia outou atamamai i mea lelei, ae ia mamā mai i mea leaga.+
20 Ua lē o toe umi ona tuʻimomomoina lea o Satani+ i lalo o o outou vae, e le Atua o lē e na te aumaia le filemu. Tau ina ia iā te outou le agalelei faifua o lo tatou Alii o Iesu.
21 O loo alofa atu iā te outou Timoteo o lē o loo ma galulue faatasi, faapea foʻi Lukio, Iasona, ma Sosepatero, o oʻu aiga.+
22 O aʻu o Tesio, o lē o loo tusia lenei tusi, ou te alofa atu foʻi iā te outou i le Alii.
23 O loo alofa atu iā te outou Kaio+ o lē o loo talimālō iā te aʻu ma le faapotopotoga atoa. O loo alofa atu foʻi Erato le teutupe o le aai,* faapea ma Kuato lona uso.
24 * ——
25 Ia viia le Atua o lē e mafai ona faatumauina outou e tusa ai ma le tala lelei ua ou folafolaina atu ma le talaʻiga a Iesu Keriso, e tusa ma le faaaliga o le mea lilo paia+ ua leva ona natia
26 a o lenei ua faaalia mai ma faailoa atu i nuu uma e ala i valoaga i Tusitusiga Paia, e tusa ai ma poloaʻiga a le Atua e faavavau, ina ia faatupuina le usiusitaʻi e ala i le faatuatua;
27 ia faamamaluina le Atua atamai e toʻatasi,+ e ala iā Iesu Keriso e faavavau. Amene.
