O le Tusi i le Faapotopotoga i Roma 3:1-31
3 O le ā la se mea e sili ai le Iutaia, po o le ā foʻi le aogā o le peritomeina?
2 E tele mea e sili ai. Muamua lava, na tuuina atu iā i latou afioga paia a le Atua.+
3 Ae faapefea la pe afai e lē faatuatua nisi? Po ua lē aogā ai ea la le faamaoni o le Atua, ona o lo latou lē faatuatua?
4 E mautinoa e leai! Ae ia tuu atu le faamaoni i le Atua,+ e ui ina pepelo tagata uma,+ auā ua tusia: “Ina ia iloa lou amiotonu i au upu, ma e mālō ai pe a faamasinoina oe.”+
5 Peitaʻi, o le ā sa tatou upu pe afai ua faaalia i lumāmea le amiotonu a le Atua, ona o la tatou amiolētonu? Pe e amiolētonu ea le Atua pe a ia faaoo mai lona toʻasā? (Ou te tautala atu i upu a tagata.)
6 Ia aua lava neʻi faapea! Afai e amiolētonu le Atua, e faapefea la ona ia faamasinoina le lalolagi?+
7 Ae afai ua faasilisilia le faamaoni o le Atua ma tupu ai lona viiga ona o loʻu pepelo, aiseā la ua faamasinoina ai aʻu o se tagata agasala?
8 Aiseā e lē faapea atu ai, e pei ona tuua‘ia sesē i tatou e nisi tagata, ua tatou fai atu ai, “Inā tatou faia ia o mea leaga ina ia oo mai ai o mea lelei”? Ua tonu lava le faamasinoga i na tagata.+
9 Po o lona uiga la ua sili atu i matou? E leai lava! Auā ua uma ona tatou molia tagata Iutaia ma Eleni e faapea, e agasala uma lava;+
10 e pei ona tusia: “E leai se tagata amiotonu, e leai lava se tasi;+
11 e leai lava se tasi e iai le tofā mamao; e leai lava se tasi e saʻili i le Atua.
12 Ua liliuese tagata uma, ma ua lē aogā i latou uma; e leai se tasi e faaalia le agalelei, e leai lava ma se tasi.”+
13 “O o latou faa‘ī o se tuugamau ua faamaga; ua taufaasesē i latou i o latou laulaufaiva.”+ “Ua i lalo o o latou laugutu mea oona a le gata.”+
14 “Ua tumu foʻi o latou gutu i upu fetuu ma upu faatigā.”+
15 “Ua televavave o latou vae e sasaa le toto.”+
16 “Ua i o latou ala le faatafunaina ma le puapuagatia,
17 ma ua latou lē iloa le ala o le filemu.”+
18 “Ua leai so latou mataʻu i le Atua.”+
19 O lenei ua tatou iloa o mea uma ua fai mai ai le Tulafono, ua faatatau atu iā i latou o loo nonofo i le Tulafono, ina ia punitia ai gutu uma ma ia nofosala ai le lalolagi uma i luma o le Atua.+
20 O lea la, e lē taʻuamiotonuina se tagata i ona luma ona o galuega o le tulafono,+ auā o le tulafono ua iloa lelei ai le agasala.+
21 A o lenei, ua faaalia le amiotonu a le Atua e aunoa ma le tulafono,+ e pei ona molimau i ai le Tulafono ma le ʻau Perofeta,+
22 ioe, o le amiotonu lea a le Atua e ala i le faatuatua iā Iesu Keriso mo i latou uma o ē e faatuatua, auā e tutusa uma lava.+
23 Talu ai ua agasala tagata uma lava, ma ua lē ausia ai le mamalu o le Atua,+
24 ma o se meaalofa foa‘ifua+ le taʻuamiotonuina o i latou i lona agalelei faifua,+ ma ua faasaʻolotoina ai e ala i le togiola a Keriso Iesu.+
25 Ua tuuina mai o ia e le Atua e fai ma taulaga+ ina ia tatou lelei ai ma le Atua, e ala i le faatuatua i lona toto.+ Na faia lenei mea ina ia faaalia ai lana lava amiotonu, auā o le faapalepale o le Atua, na ia faamagaloina ai agasala ua mavae.
26 Ua faaalia ai lana lava amiotonu+ i le taimi nei, ma iloa ai lona amiotonu a o ia taʻuamiotonuina le tagata e faatuatua iā Iesu.+
27 Aiseā la e mimita ai? E leai se māfuaaga. E ala i lē fea tulafono? Po o galuega ea?+ E leai lava, ae e ala i le tulafono o le faatuatua.
28 Auā ua tatou manatu, ua taʻuamiotonuina le tagata i le faatuatua ae e lē o galuega o le tulafono.+
29 Po o ia ea o le Atua mo na o tagata Iutaia?+ Pe e lē o ia ea foʻi o le Atua o tagata o nuu ese?+ Ioe, o ia foʻi o le Atua o tagata o nuu ese.+
30 Talu ai e toʻatasi lava le Atua,+ e taʻuamiotonuina e ia tagata peritomeina+ ona o le faatuatua, atoa ma tagata e lē peritomeina+ ona o lo latou faatuatua.
31 Po ua tatou faalēaogā ea le tulafono e ala i lo tatou faatuatua? E leai lava! Nai lo o lea, ua tatou faamausalīina ai le tulafono.+
