Ruta 3:1-18
3 Ua fai mai Naomi le tinā o lana tane iā te ia: “Si aʻu tama e, pe e lē tatau ea ona ou saʻilia sou aiga*+ ina ia e manuia ai?
2 Pe e tatou te lē aiga ea ma Poasa,+ o lē na e iai faatasi ma ana auauna fafine? O loo ia faamamāina le karite i le mea e soli ai saito i le pō a nanei.
3 Ia e faamamā lou tino ma uu i le uu manogi, ma fai sou ofu manaia ma e alu ifo i le mea e soli ai saito. Aua neʻi iloa oe e le tamāloa, seʻia uma ona ʻai o ia ma inu.
4 Pe a taoto o ia, ia e iloa le mea e taoto ai; ona e alu lea ma susuʻe le ufiufi o ona vae ma e taoto ai. O le a ia taʻu atu iā te oe le mea e fai.”
5 Ona tali atu lea o Ruta: “Ou te faia mea uma lava ua e fai mai ai.”
6 Ua alu ifo o ia i le mea e soli ai saito, ma faia mea uma lava na poloaʻi atu ai le tinā o lana tane.
7 O le taimi lea, ua ʻai Poasa ma inu, ma ua fiafia foʻi lona loto. Ona alu lea o ia ma taoto i tafatafa o le faaputuga karite. Mulimuli ane, ua alu atu lemū Ruta ma susuʻe le ufiufi o ona vae, ma taoto ai.
8 Ua oo i le vaeluapō, ua gatete le tamāloa. Ona ia nofo lea i luga ma vaaia ai se fafine o loo taoto i ona vae.
9 Ua fai mai o ia: “O ai ea oe?” Ae ua tali atu o ia: “O aʻu o Ruta lau auauna. Ia e faa‘afu i lau auauna i le pito o lou ofu,* auā o oe o sē e toe faatauina i matou.”+
10 Ona fai mai lea o ia: “Loʻu afafine e, ia faamanuia Ieova iā te oe. Ua sili atu lou alofa faamaoni i le taimi mulimuli lenei nai lo o le taimi muamua,+ i lou lē mulimuli atu i tauleleʻa, pe matitiva pe mauʻoa.
11 O lenei loʻu afafine e, aua e te fefe. O mea uma e te fai mai ai ou te faia lava,+ auā ua iloa uma e tagata o le aai,* o oe o le fafine e matuā lelei tele.
12 E moni o aʻu o sē e toe faatauina mai outou,+ ae e iai foʻi se isi e na te toe faatauina mai outou e vavalalata la outou faiā nai lo o aʻu.+
13 Ia nofo pea i inei i lenei pō, ma a oo i le taeao e na te toe faatauina oe, ua lelei lea! Ia toe faatauina e ia o oe.+ Ae afai e lē manaʻo e toe faatauina oe, ona ou toe faatauina lea o oe, ou te tautō iā Ieova le Atua soifua. Ia e taoto pea seʻia ao.”
14 Ua taoto pea o ia i ona vae seʻia oo i le taeao, ona tulaʻi lea a o le‘i malamalama lelei, ina neʻi iloa o ia e se tasi. Ua fai atu Poasa: “Aua neʻi iloa e se tasi, na sau se fafine i le mea e soli ai saito.”
15 Ua toe fai mai o ia: “Aumai le ofu o loo e pulupulu ai, ma fofola mai.” Ona ia fofola lea o le ofu, ma ua tuuina i ai e Poasa o fua o karite e ono* ma faaee i luga o Ruta, ona alu lea o Poasa i le aai.
16 Ua alu o ia i lona ala i le tinā o lana tane, o lē ua fai mai: “Laʻu tama e, o le ā se mea na tupu?”* Ona ia taʻu atu lea iā te ia o mea uma lava na faia e le tamāloa mo ia.
17 Ua toe fai atu o ia: “O fua nei o karite e ono na ia aumai, ma ia faapea mai, ‘Aua e te alu ae lē avea se mea mo le tinā o lau tane.’”
18 Ona fai mai lea o Naomi: “Inā nofo pea ia laʻu tama e, seʻia e iloa po o le ā le mea e tupu, auā e lē mālōlō le tamāloa seʻia ona faaiʻuina le mataupu i le asō.”
Faamatalaga Pito i Lalo
^ Epe., “se mea e mapu ai.”
^ Po o le “saunia se puipuiga mo lau auauna.”
^ Epe., “faitotoʻa.”
^ Epe., “o ai ea oe?”
