Ruta 4:1-22
4 Ua alu aʻe Poasa i le faitotoʻa o le aai+ ma nofo ai i inā. Vaai! ua alu ane le tagata na taʻua e Poasa e na te toe faatauina le tofi.+ Ona fai atu lea o Poasa iā te ia:* “Seʻi e afe mai, ma nofo i inei.” Ona afe ane lea o ia, ma nofo i lalo.
2 Ona aami lea e Poasa o toeaina e toʻasefulu o le aai,+ ma faapea atu: “Inā nonofo ia i lalo i inei.” Ona latou nonofo lea i lalo.
3 Ua fai atu Poasa i lē e toe faatauina le tofi:+ “O le fasi fanua o lo tatou uso o Elimeleka,+ o le a faatau atu e Naomi, o lē ua toe foʻi mai i fanua o Moapi.+
4 Ae ua ou manatu e tatau ona faailoa atu iā te oe lenei mea, ‘Ia e faatauina lenei fanua i luma o ē o nonofo mai, faapea toeaina o loʻu nuu.+ Afai e te toe faatauina, inā faatau ia; ae afai e te lē toe faatauina, ia e taʻu mai iā te aʻu ina ia ou iloa ai, auā o oe e iai le aiā e toe faatauina ai, o aʻu foʻi ou te pito atu iā te oe.’” Ona tali mai lea o ia: “Ua ou malie e toe faatau le fanua.”+
5 Ua fai atu Poasa: “O le aso e te faatau mai ai le fanua mai iā Naomi, e te faatau mai ai foʻi iā Ruta le fafine Moapi, o le avā a le tamāloa ua oti, ina ia faatumauina ai le igoa o le tamāloa ua oti i lona tofi.”+
6 Ona fai mai lea o lē e toe faatauina mai le tofi: “E lē mafai ona ou toe faatau mai mo aʻu, ina neʻi faalēaogā ai loʻu tofi. Ua ou tuuina atu iā te oe le aiā e toe faatauina mai ai le tofi, auā e lē mafai ona ou toe faatauina mai.”
7 O le tū masani lea i Isaraelu i aso ua mavae, e tusa ai ma le aiā o le toe faatau mai ma le toe faatau atu, ina ia faamaonia ai so o se fefaataua‘iga: E tatala ese e se tamāloa lona seevae+ ma avatu i le isi tagata, o le auala lea na faamaonia ai se maliega i Isaraelu.
8 Ina ua faapea mai iā Poasa lē e toe faatauina le tofi: “Inā faatau ia mo oe,” ona ia tatala ese lea o lona seevae.
9 Ona fai atu lea o Poasa i toeaina ma le nuu uma: “O outou o molimau+ i lenei aso, ua ou toe faatauina mai mea uma lava na iā Elimeleka, ma mea uma foʻi na iā Kiliona ma Maalona mai iā Naomi.
10 Ua ou faatau foʻi e fai ma aʻu avā o Ruta le fafine Moapi, le avā a Maalona, ina ia faatumauina ai le igoa o le tamāloa ua oti i lona tofi,+ ma ia lē motusia ai le igoa o lē ua oti mai i ona uso ma lona nuu.* O le asō ua fai ai outou ma molimau.”+
11 Ua fai mai le nuu uma o ē sa i le faitotoʻa o le aai faapea ma toeaina: “O i matou lava o molimau! Ia faamanuia e Ieova le fafine o le a e faaipoipo i ai* ia pei o Rasela ma Lea, o ē sa avea ma tinā o le aiga o Isaraelu.+ Ia e manuia i Efarata+ ma ia ta‘uleleia oe* i Peteleema.+
12 Ia avea foʻi lou aiga e pei o le aiga o Faresa+ lea na fanaua e Tamara mai iā Iuta, e ala mai i le fanau o le a foaʻi atu e Ieova iā te oe mai i lenei fafine talavou.”+
13 Ona ave lea e Poasa o Ruta, ua fai ma ana avā, ua momoe ma ia. Ua tō o ia i le faamanuia a Ieova, ma ua fanau mai ai se tama tama.
14 Ua fai mai fafine iā Naomi: “Ia vivii atu iā Ieova, o lē ua foaʻi atu iā te oe i le asō o lē e toe faatauina mai outou. Ia faalauiloa atu lona* igoa i Isaraelu.
15 Ua fai o ia* ma lē ua faafouina lou ola ma tausia oe i lou soifua matua, auā ua fanau le avā a lau tama, o lē e alofa iā te oe,+ ma ua sili atu o ia iā te oe nai lo o le fanau tama e toʻafitu.”
16 Ua aumai e Naomi le tamaitiiti ma afisi i lona fatafata, ma tausi iā te ia.
17 Ona faaigoa lea o ia e fafine o le tuaoi. Ua latou faapea mai, “Ua fanau mai se tama iā Naomi,” ona latou faaigoa lea o ia o Opeta.+ O ia o le tamā o Iese,+ o le tamā lea o Tavita.
18 O le gafa lenei* o Faresa:+ na fanaua e Faresa o Esarona;+
19 na fanaua e Esarona o Rama; na fanaua e Rama o Aminatapu;+
20 na fanaua e Aminatapu+ o Naasona; na fanaua e Naasona o Salemona;
21 na fanaua e Salemona o Poasa; na fanaua e Poasa o Opeta;
22 na fanaua e Opeta o Iese;+ ma na fanaua e Iese o Tavita.+
Faamatalaga Pito i Lalo
^ E lē o taʻua le igoa o lea tagata.
^ Epe., “mai i le faitotoʻa o le aai o lona nuu.”
^ Epe., “faalauiloa se igoa.”
^ Epe., “Ia faia e Ieova le avā e sau i lou aiga.”
^ E faasino atu i le tamaitiiti.
^ E faasino atu i le tamaitiiti.
^ Epe., “O augātupulaga nei.”
