Sakaria 1:1-21
1 O le masina lona valu i le tausaga lona lua o le nofoaiga a Tariu,+ na oo mai ai le afioga a Ieova i le perofeta o Sakaria,*+ o le atalii o Perekia, o le atalii o Ito, ua faapea mai:
2 “Na matuā toʻasā Ieova i o outou tamā.+
3 “Ia fai atu iā i latou, ‘O le mea lenei ua fetalai mai ai Ieova o ʻau: “‘Ia foʻi mai iā te aʻu,’ ua fetalai mai ai Ieova o ʻau, ‘ona ou foʻi atu lea iā te outou,’+ ua fetalai mai ai Ieova o ʻau.”’
4 “‘Aua neʻi pei outou o o outou tamā o ē na faalauiloa atu i ai e perofeta anamua e faapea: “O le fetalaiga lenei a Ieova o ʻau, ‘Faamolemole, inā liliuese mai* i o outou ala leaga ma a outou galuega leaga.’”’+
“‘Ae e leʻi faalogo i latou ma e leʻi uaʻi mai iā te aʻu,’+ ua fetalai mai ai Ieova.
5 “‘O fea o iai nei o outou tamā? Pe na faavavau fo‘i ona feola le ‘auperofeta?
6 Peitaʻi, o aʻu upu ma aʻu tulafono na ou poloaʻi atu ai i aʻu auauna le ʻauperofeta, pe e le‘i vāai ea i ai o outou tamā i le faataunuuga?’+ Ona latou foʻi mai lea iā te aʻu, ma faapea mai: ‘Ua feutaga‘i Ieova o ʻau ma i matou e tusa ma o matou ala ma a matou galuega, e pei ona ia finagalo e fai.’”+
7 O le aso 24 o le masina lona 11, o le masina lea o Sapata,* i le tausaga lona lua o le nofoaiga a Tariu,+ na oo mai ai le afioga a Ieova i le perofeta o Sakaria, o le atalii o Perekia, o le atalii o Ito, e faapea:
8 “Na ou vaai i se faaaliga i le pō. Sa iai se tagata o loo tiʻetiʻe i se solofanua mūmū, o loo tū pea o ia i le vā o laau o le atasi ua iai i le vanu; ma i tua atu o ia o loo iai ni solofanua e mūmū, mūmū eena, ma papaʻe.”
9 Ona ou fai atu lea: “Loʻu alii e, o ai i latou nei?”
Ua tali mai le agelu o loo ma talanoa: “Ou te faaali atu iā te oe po o ai i latou nei.”
10 Ona faapea mai lea o le tagata o loo tū i le vā o laau o le atasi: “O i latou nei ua aauina mai e Ieova e fesavaliaʻi solo i le lalolagi.”
11 Ua latou faapea atu i le agelu a Ieova o lē o loo tū i le vā o laau o le atasi: “Ua matou fesavaliaʻi solo i le lalolagi, faauta foʻi! o loo nonofo fifilemu le lalolagi uma.”+
12 Ona faapea atu lea o le agelu a Ieova: “Ieova o ʻau e, o le ā le umi e te taofia ai lou alofa mutimutivale mai iā Ierusalema ma aai o Iuta,+ o ē na e to‘asā i ai i nei tausaga e 70?”+
13 Ua tali mai Ieova i le agelu o loo ma talanoa, i upu agalelei ma upu faamāfanafanaloto.
14 Ona faapea mai lea iā te aʻu o le agelu o loo ma talanoa: “Ia alaga atu e faapea, ‘O le fetalaiga lenei a Ieova o ʻau: “Ua ou matuā maumaua‘i e puipuia Ierusalema ma Siona.+
15 Ua ou matuā to‘asā lava i atunuu o ē o loo nonofo fifilemu,+ auā na itiiti loʻu to‘asā i loʻu nuu,+ ae ua latou faateleina le leaga o le malaia.”’+
16 “O lea, o le fetalaiga lenei a Ieova, ʻ“Ou te fo‘i atu i Ierusalema ma le alofa mutimutivale,+ ma e fausia ai loʻu fale,”+ ua fetalai mai ai Ieova o ʻau, “e faataoto atu foʻi le fua faalava i luga o Ierusalema.”’+
17 “Ia toe alaga atu e faapea, ‘O le fetalaiga lenei a Ieova o ʻau: “E toe tutumu oʻu aai i mea lelei; e toe faamāfanafana foʻi e Ieova o Siona+ ma toe filifilia Ierusalema.”’”+
18 Ona ou tepa aʻe lea ma iloa ai seu e fā.+
19 O lea, ua ou fesili atu i le agelu o loo ma talanoa: “O ā nei mea?” Ua ia tali mai iā te aʻu: “O seu nei na faataapeapeina Iuta,+ Isaraelu,+ ma Ierusalema.”+
20 Ona faaali mai lea e Ieova iā te aʻu o tufuga e toʻafā.
21 Ua ou fesili atu: “O ā mea e ō mai i latou nei e fai?”
Ua ia faapea mai: “O seu* ia na matuā faataapeapeina Iuta ma lē mafai ai e se isi ona ea i luga lona ulu. E ō mai nei tufuga e faamataʻu iā i latou, e lafo i lalo seu o atunuu na sii i luga o latou seu e faasagatau i le atunuu o Iuta, ina ia faataapeapeina ai o ia.”
Faamatalaga Pito i Lalo
^ Lona uiga “Ua Manatua e Ieova.”
^ Po o le “inā foʻi mai ia mai.”
^ Tagaʻi i le Uiga o Upu.
