Sakaria 3:1-10
3 Ona ia faaali mai lea iā te aʻu o Iosua+ le ositaulaga sili, o loo tū i luma o le agelu a Ieova, ma Satani+ o loo tū i lona itu taumatau e tetee atu iā te ia.
2 Ua fai atu le agelu a Ieova iā Satani: “Satani e, ia aʻoaʻia malosi oe e Ieova,+ ioe, ia aʻoaʻia malosi oe e Ieova, o lē ua filifilia Ierusalema!+ Pe e lē o le tamāloa ea lenei o le ogālaau ua mumū na seʻi mai i le afi?”
3 Ua ofu Iosua i ofu eleelea ma o loo tū i luma o le agelu.
4 Ua faapea atu le agelu iā i latou o loo tutū i ona luma, “Ia tatala ese lona ofu eleelea.” Ona ia faapea atu lea iā te ia, “Vaai, ua ou aveesea lou sesē* mai iā te oe, ma o le a faaofuina oe i ofu matagofie.”+
5 Ona ou fai atu lea: “Ia tuu se pulou ʻie mamā i lona ulu.”+ Ona latou tuu lea o le pulou ʻie mamā i lona ulu ma faaofu iā te ia i ofu; a o loo tū mai le agelu a Ieova.
6 Ona faapea atu lea o le agelu a Ieova iā Iosua:
7 “O le fetalaiga lenei a Ieova o ʻau, ‘Afai e te savali i oʻu ala ma faia ou tiute tauave i oʻu luma, ona e faamasino ai lea i loʻu nuu+ ma tausia* oʻu lotoā; ma ou te avatu iā te oe le saʻolotoga e te sau ai i oʻu luma faatasi ma ē o loo tutū mai.’
8 “‘Iosua e, le Ositaulaga Sili, faamolemole ia faalogo mai, o oe ma au aumea o ē o loo nonofo i ou luma, auā o nei tagata e fai ma faailoga; faauta! ou te aumaia laʻu auauna+ o Tātupu!+
9 Ia vaai i le maa ua ou tuuina i luma o Iosua! E fitu mata o le maa e tasi; ma ou te vane ai se tusitusiga,’ ua fetalai mai ai Ieova o ʻau, ‘ma o le a ou aveeseina le mea sesē na faia e lenā atunuu i le aso e tasi.’+
10 “‘I lenā aso,’ ua fetalai mai ai Ieova o ʻau, ‘e taʻitasi outou ma valaaulia lou tuaoi e sau i lalo o lou vine ma lalo o lou mati.’”+
