Sakaria 5:1-11
5 Ona ou toe tepa aʻe lea ma iloa ai se tusi tāʻai ua lele.
2 Ua ia fesili mai iā te aʻu: “O le ā se mea ua e vaai atu i ai?”
Ua ou tali atu: “O loo oʻu vaai atu i se tusi tāʻai ua lele, o lona umī e 20 kupita,* a o lona lautele e 10 kupita.”
3 Ona ia faapea mai lea iā te aʻu: “O le fetuu lenei o loo alu atu i le fogāeleele uma lava, auā o i latou uma o loo gāoi+ e pei ona tusia i le tasi itu o le tusi tāʻai, ua sao mai i le faasalaga; ma o i latou uma ua faia le tautoga+ e pei ona tusia i le isi itu o le tusi tāʻai, ua sao mai i le faasalaga.
4 O le fetalaiga lenei a Ieova o ʻau: ‘Ua ou auina atu le fetuu ma e ulu atu i le fale o le tagata gaoi, ma le fale o le tagata na tautō pepelo i loʻu igoa; ma e tumau i totonu o lenā fale ma faatamaʻia ai le fale, o ona laupapa ma ona maa.’”
5 Ua toe faalatalata mai iā te aʻu le agelu o loo ma talanoa ma faapea mai iā te aʻu: “Ia tepa aʻe faamolemole, ma vaai i le mea o loo alu atu.”
6 Ona ou fesili atu lea: “O le ā lea mea?”
Ua ia tali mai: “O le ato o le efa* lenā o loo alu atu.” Ua ia toe faapea mai: “O o latou foliga na i le lalolagi atoa.”
7 Ua ou vaaia fo‘i ua siitia i luga le ufi lapotopoto ua faia i le pulu,* ma o loo nofo ai se fafine i totonu o le ato.
8 Ua ia faapea mai foʻi: “O le Amioleaga lenei.” Ona ia toe lafo lea o le fafine i totonu o le ato o le efa, ma lafo le ufi pulu i le gutu o le ato.
9 Ua ou tepa aʻe ma vaaia ni fafine se toʻalua o loo ō mai, ma o loo felelei mai i le matagi. Ua iai o la apaʻau e pei o apaʻau o le kasita. Ua la sii aʻe le ato i le vā o le lalolagi ma le lagi.
10 Ona ou fesili atu lea i le agelu o loo ma talanoa: “O fea o le a la ave i ai le ato o le efa?”
11 Ua tali mai o ia: “I le laufanua o Senara*+ ina ia fausia ai se fale mo le fafine; ma pe a uma ona saunia lea fale, ona tuu ai lea o ia i inā i le mea e tatau ona iai o ia.”
Faamatalaga Pito i Lalo
^ Epe., “le efa,” o loo faasino atu i se ato e faaaogā e fua ai le efa. O le efa e tusa ma le 22 lita. Tagaʻi i le Faa. E14.
^ O se uʻamea e vaivai toe faaʻefuʻefu lanu moana, e liusuāvaigofie.
^ E faasino atu iā Papelonia.