Sakaria 6:1-15
6 Ua ou toe tepa aʻe ma iloa atu ni kariota se fā ua ō mai i le vā o mauga e lua, o mauga foʻi o mauga ʻapamemea ia.
2 O le kariota muamua o loo toso e solofanua mūmū, ma o le kariota lona lua o loo toso e solofanua uliuli.+
3 O le kariota lona tolu o loo toso e solofanua papaʻe, ma o le kariota lona fā o loo toso e solofanua e ilailā ma felanulanuaʻi.+
4 Ona ou fesili atu lea i le agelu o loo ma talanoa: “Loʻu alii e, o ā ia mea?”
5 Ua tali mai le agelu iā te aʻu: “O agaga+ ia e fā o le lagi ua ō atu ina ua uma ona tutū i luma o le Alii o le lalolagi uma.+
6 O le kariota o loo toso e solofanua uliuli, e alu atu i le atunuu i mātū;+ o solofanua papaʻe e ō atu i le laueleele i tua atu o le sami; ma o solofanua e ilailā e ō atu i le atunuu i saute.
7 A o solofanua felanulanuaʻi, ua fia ō atu e fesavaliaʻi i le lalolagi.” Ona ia faapea atu lea: “Inā ō ia ma fesavaliaʻi i le lalolagi.” Ona amata ai lea ona latou fesavaliaʻi i le lalolagi.
8 Ona ia alaga mai lea iā te aʻu ma faapea mai: “Vaai i ē o loo ō atu i le atunuu i mātū, o i latou na ua mālōlō ai le agaga o Ieova i le atunuu i mātū.”
9 Ua toe oo mai le afioga a Ieova iā te aʻu e faapea:
10 “Ia ave mai iā Heletai, Topia, ma Ietaia o mea na latou aumaia mai i ē na ave faapagota; ma e ao ona e alu i lea aso i le fale o Iosia le atalii o Sefanaia, faatasi ma i latou na ō mai mai i Papelonia.
11 Ia e ave foʻi siliva ma auro ma fai ai se pale,* ma tuu i le ulu o Iosua+ le atalii o Iosatako, le ositaulaga sili.
12 Ia e fai atu iā te ia,“‘O le fetalaiga lenei a Ieova o ʻau: “O le tagata lenei, o lona igoa o Tātupu.+ E tupu aʻe o ia mai i le mea e pogai mai ai, ma e na te fausia le malumalu o Ieova.+
13 O le a fausia e ia le malumalu o Ieova, e na te mauaina foʻi le mamalu. E nofo o ia i lona nofoālii ma pule ai, e fai foʻi o ia ma ositaulaga i lona nofoālii,+ ma o le a ia faataunuuina ia tofiga e lua* mo le filemu.*
14 O le a fai le pale* ma faamanatuga mo Helema, o Topia, o Ietaia,+ ma Heni le atalii o Sefanaia, i le malumalu o Ieova.
15 E ō mai fo‘i i latou mai i mea mamao ma faia se sao i le fausiaina o le malumalu o Ieova.” O le a outou iloa ai, na auina mai aʻu iā te outou e Ieova o ʻau. E oo lenei mea pe afai e tou te matuā faalogo i le siʻufofoga o Ieova lo outou Atua.’”
Faamatalaga Pito i Lalo
^ Po o “se pale matagofie.”
^ E faasino atu i ona tofiga o se pule ma se ositaulaga.
^ Po o le “ma o le a sologa lelei mea uma i ia tofiga e lua.”
^ Po o “le pale matagofie.”
