Sakaria 7:1-14
7 O le tausaga lona fā o le nofoaiga a le tupu o Tariu, na oo mai ai le afioga a Ieova iā Sakaria+ i le aso fā o le masina lona iva, o le masina lea o Kiselu.*
2 Ua aauina atu e tagata Peteli o Salese, o Reke-meleki ma ona tagata ina ia ‘ai‘oi atu mo le finagalo malie o Ieova,
3 ua fai atu i ositaulaga o le fale* o Ieova o ʻau ma perofeta e faapea: “Po ou te tagi ea i le masina lona lima+ ma lē ʻai ai, e pei ona ou faia i le tele o tausaga?”
4 Ua toe oo mai foʻi iā te aʻu le afioga a Ieova o ʻau e faapea:
5 “Ia fai atu i tagata uma o le atunuu ma ositaulaga, ‘Ina ua outou anapopogi ma tagiauē i le masina lona lima ma le masina lona fitu+ mo tausaga e 70,+ pe na outou anapopogi moni ea mo aʻu?
6 Ina ua outou aai ma feinu, pe e tou te le‘i aai ea mo outou ma feinu mo outou lava?
7 Pe e lē tatau ea ona outou usiusitaʻi i afioga na folafola mai e Ieova e ala i perofeta na muamua mai,+ a o ʻainā ma filemu Ierusalema faatasi ma ona aai ua siʻomia o ia, ma a o ʻainā foʻi Nekepi* ma Sefila?’”*
8 Ua toe oo mai le afioga a Ieova iā Sakaria e faapea:
9 “O le fetalaiga lenei a Ieova o ʻau, ‘Ia outou faamasino i le faamasinotonu,+ ma ia feutaga‘i le tasi i le isi i le alofa faamaoni+ ma le alofa mutimutivale.
10 Aua neʻi fai mea faapiʻopiʻo i le fafine ua oti lana tane, po o le tama ua leai se tamā,*+ o le tagata ese+ po o lē ua mativa;+ ma aua neʻi faufau i o outou loto se mea leaga e fai e le tasi i le isi.’+
11 Ae na mumusu pea i latou e faalogo,+ ma na ū mai o latou tua ma le faauamaaa,+ ma faataligatuli ina ia lē faalogo ai.+
12 Na faamaaa e i latou o latou loto e pei o se taimane,*+ ma lē usiusitaʻi ai i le tulafono* ma afioga na auina mai e Ieova o ʻau e ala i lona agaga, lea na ala mai i ana perofeta na muamua mai.+ O le mea lea na tupu tele ai le toʻasā o Ieova o ʻau.”+
13 “‘E pei ona le‘i faalogo i latou ina ua ou* valaau atu,+ e faapea foʻi ona ou lē faalogo ina ua latou valaau mai,’+ ua fetalai mai ai Ieova o ʻau.
14 ‘Ona ou faataapeapeina lea o i latou i se matagi malosi i atunuu uma na latou lē iloa,+ ma sa tuufua le laueleele i o latou tua, e leai se tasi na ui ane ai pe toe foʻi mai i ai;+ auā na latou liua le laueleele matagofie i se mea e fefefe ai.’”
Faamatalaga Pito i Lalo
^ Po o le “malumalu.”
^ Po o “le itu i saute.”
^ Po o “le fanua maulalo?”
^ Po o le “ua mātuaoti.”
^ Pe atonu “o se maa malō,” e pei o se maa samira.
^ Po o “le faatonuga.”
^ Epe., “ia.”
