Sakaria 8:1-23
8 Ua toe oo mai foʻi le afioga a Ieova o ʻau e faapea:
2 “O le fetalaiga lenei a Ieova o ʻau, ‘Ua ou matuā maumauaʻi+ e puipuia Siona, ua ou matuā maumauaʻi e puipuia o ia ma le ita tele.’”
3 “O le fetalaiga lenei a Ieova, ‘O le a ou toe foʻi atu i Siona+ ma nofo i Ierusalema;+ o le a taʻua Ierusalema o le aai o le faamaoni,+ e taʻua foʻi le mauga o Ieova o ʻau, o le mauga paia.’”+
4 “O le fetalaiga lenei a Ieova o ʻau, ‘O le a toe nonofo toeaina ma loomatutua i nofoaga faitele o Ierusalema, e ta‘itasi le tagata ma lona tootoo i lona lima ona o le tele o ona tausaga.*+
5 E faatumulia foʻi nofoaga faitele o le aai i tama ma teine o loo taaalo ai.’”+
6 “O le fetalaiga lenei a Ieova o ʻau, ‘E ui ina foliga mai e matuā faigatā i ē ua totoe o lenei nuu i na aso, ae pe e matuā faigatā ea foʻi iā te a‘u?’ ua fetalai mai ai Ieova o ʻau.”
7 “O le fetalaiga lenei a Ieova o ʻau, ‘O aʻu lava ou te faaola i oʻu tagata mai i atunuu o le itu i sasa‘e ma le itu i sisifo.*+
8 O le a ou aumaia i latou, ma o le a nonofo i latou i Ierusalema;+ e fai i latou ma oʻu nuu, e fai foʻi aʻu ma o latou Atua+ i le faamaoni ma le amiotonu.’”
9 “O le fetalaiga lenei a Ieova o ʻau, ‘Ia malolosi o outou lima,*+ o outou o ē o loo faalogo i nei aso i nei upu mai i fofoga o le ʻauperofeta,+ o upu lava e tasi ia na fai atu i le aso na faataatia ai le faavae o le fale o Ieova o ʻau, ina ia fausia le malumalu.
10 Auā a o leʻi oo i na aso, sa leai ni totogi o tagata po o manu;+ ma e leʻi saogalemu le feoa‘i solo o tagata ona o le fili, auā na ou faaoso tagata uma ia tetee le tasi i le isi.’
11 “‘Ae i le taimi lenei, ou te lē toe feutaga‘i ma ē ua totoe o lenei nuu e pei o aso anamua,’+ ua fetalai mai ai Ieova o ʻau.
12 ‘Auā o le a lūlūina le fatu o le filemu; e fua mai e le vine ona fua ma e fua mai foʻi e le laueleele ona fua,+ e faatotō ifo e le lagi lona sau; ma ou te avatua foʻi i ē o totoe o lenei nuu o nei mea uma e fai ma o latou tofi.+
13 E pei ona ta‘ua outou e atunuu pe a faia a latou faamalaia,+ le aiga e o Iuta ma le aiga e o Isaraelu, e faapea foʻi ona ou faaola iā te outou, ma e fai outou ma faamanuiaga.+ Aua tou te fefefe!+ Tau ina ia malolosi o outou lima.’*+
14 “Auā o le fetalaiga lenei a Ieova o ʻau, ʻ“E faapei ona ou manatu e faia le mea leaga iā te outou ona ua faatigā mai o outou augātamā iā te aʻu,” ua fetalai mai ai Ieova o ʻau, “ma ou te leʻi faanoanoa ai,+
15 e faapea foʻi ona ou manatu i lenei taimi e faia le mea lelei iā Ierusalema ma le aiga o Iuta.+ Aua tou te fefefe!”’+
16 “‘O mea nei e ao ona outou faia: Ia tautatala i le mea moni o le tasi i le isi,+ ma e tatau ona faaauiluma le upu moni ma le filemu+ e faamasinoga e faia i faitotoʻa o pā o o outou aai.
17 Aua tou te fafau aʻe i o outou loto ni mea leaga e fai e le tasi i le isi,+ aua foʻi tou te fiafia i se tautoga pepelo;+ auā o mea uma ia ou te ʻinoʻino i ai,’+ ua fetalai mai ai Ieova.”
18 Ua toe oo mai foʻi iā te aʻu le afioga a Ieova o ʻau e faapea:
19 “O le fetalaiga lenei a Ieova o ʻau, ‘O le anapogi o le masina lona fā,+ o le anapogi o le masina lona lima,+ o le anapogi o le masina lona fitu,+ ma le anapogi o le masina lona sefulu,+ o le a fai ma mea e fiafia ma olioli ai mo le aiga o Iuta, o tausamiga ia e olioli ai.+ O lea, ia fiafia i le upu moni ma le filemu.’
20 “O le fetalaiga lenei a Ieova o ʻau, ‘O le a toe ō mai lava nuu ma ē o nonofo i aai e tele;
21 ma o le a ō atu tagata o le tasi aai i tagata o le isi aai ma faapea atu: “Ioe, seʻi o tatou ō ia, ma ‘ai‘oi atu mo le finagalo malie o Ieova ma saʻili atu foʻi iā Ieova o ʻau. Ou te alu foʻi aʻu.”+
22 E ō mai foʻi nuu e tele ma atunuu malolosi e saʻili iā Ieova o ʻau i Ierusalema,+ ma ‘ai‘oi atu mo le finagalo malie o Ieova.’
23 “O le fetalaiga lenei a Ieova o ʻau, ‘O ia aso o le a fetagofi atu ai tagata e toʻasefulu mai i gagana uma a atunuu eseese,+ ioe, latou te fetagofi atu lava i le ofu* o le tagata Iutaia, ma faapea atu: “E matou te fia ō ma outou,+ auā ua matou faalogo o loo iā te outou le Atua.”’”+
Faamatalaga Pito i Lalo
^ Epe., “ona o le tele o aso.”
^ Po o le “mai i le laueleele e oso aʻe ai le lā ma le laueleele e goto i ai le lā.”
^ Po o le “Ia lototetele.”
^ Po o le “Ia lototetele.”
^ Po o “le pito ofu.”
