Salamo 107:1-43
107 Ia faafetai atu iā Ieova, auā e lelei o ia;+E tumau e faavavau lona alofa faamaoni.+
2 Ia faapea lava ona fai mai o ē ua toe faafoʻisia* e Ieova,O ē ua ia toe faafoʻisia mai i le lima* o le fili,+
3 O ē na ia faapotopoto faatasi mai i atunuu,+E mai i sasa‘e ma sisifo,*E mai i mātū ma saute.+
4 Na fesēa‘i i latou i le fanua valevalenoa i le toafa;E latou te leʻi maua se auala i se aai e nonofo ai.
5 Na fia aai i latou ma fia feinu;Na toeitiiti lava a feoti.
6 Na latou alalaga atu pea iā Ieova i o latou puapuaga;+Na ia laveaʻi iā i latou mai i o latou mafatiaga.+
7 Na ia taʻitaʻia i latou ina ia savavali i le ala saʻo,+Ma ō atu ai i se aai e nonofo ai.+
8 Le nuu e, ia faafetai atu iā Ieova+ ona o lona alofa faamaoniMa ana galuega ofoofogia mo le fanau a tagata.+
9 Auā ua ia faamalieina le tagata ua fia inuMa faamaʻona i mea lelei le tagata ua fia ʻai.+
10 Ua nonofo nisi i le pogisa tele,O pagota ua puapuagatia ma noanoatia i uʻamea.
11 Auā ua latou fouvale i afioga a le Atua;Ua latou lē faaaloalo foʻi i fautuaga a Lē e Silisili Ese.+
12 O le mea lea ua ia faamaulaloina ai o latou loto i mea faigatā;+Ua tautevateva i latou, ma ua leai se tasi e fesoasoani iā i latou.
13 Na latou alalaga atu iā Ieova mo se fesoasoani i o latou puapuaga;Na ia faaola iā i latou mai i o latou mafatiaga.
14 Ua ia aumaia i latou mai i le pogisa tele,Ma ua ia motusi ese o latou noanoataga.+
15 Le nuu e, ia faafetai atu iā Ieova ona o lona alofa faamaoni+Ma ana galuega ofoofogia mo le fanau a tagata.
16 Auā ua ia gauia faitotoʻa ʻapamemea,Ma ia lepetia faamau uʻamea.+
17 Ua latou vālea ma puapuagatia+Ona o a latou solitulafono ma a latou mea sesē.+
18 Ua lē toe manogi iā i latou* mea‘ai uma lava;Ua latalata i latou i faitotoʻa o le oti.
19 E latou te alalaga atu iā Ieova mo se fesoasoani i o latou puapuaga;Na ia faaola iā i latou mai i o latou mafatiaga.
20 Na ia auina atu lana afioga ma faamālōlōina i latou+Ma lavea‘ia i latou mai i lua na tatanu ai i latou.
21 Le nuu e, ia faafetai atu iā Ieova ona o lona alofa faamaoniMa ana galuega ofoofogia mo le fanau a tagata.
22 Ia latou ofo atu taulaga o le faafetai+Ma folafola atu ana galuega ma le alaga fiafia.
23 O i latou ua folau i le sami i vaa,O ē ua faia fefaataua‘iga i le vasa tele,+
24 Ua latou vāai i galuega a IeovaMa ana galuega ofoofogia i mea loloto;+
25 Ua fetalai ane o ia, ona agi mai ai lea o le matagi malosi,+Ma ua siisii ai galu o le sami.
26 Ua latou ō aʻe i le lagi;Ua latou ō ifo i mea loloto.
Ua liusuāvai foʻi lo latou lototele ona o mala na faalolo‘i ane.
27 Ua latou taavavale ma tautevateva e pei o se tagata onā,Ua lē aogā fo‘i o latou tomai uma.+
28 Ona latou alalaga atu lea iā Ieova i o latou puapuaga,+Ma ua ia lavea‘ia i latou mai i o latou mafatiaga.
29 Ua ia faatoʻafilemu le afā;Ua malū galu o le sami.+
30 Ua latou olioli auā ua malū,Ma ua ia taʻitaʻia i latou i le taulaga na latou manana‘o ai.
31 Le nuu e, ia faafetai atu iā Ieova ona o lona alofa faamaoniMa ana galuega ofoofogia mo le fanau a tagata.+
32 Ia latou faaneenee atu iā te ia i le faapotopotoga o lona nuu,+Ma ia latou vivii atu iā te ia i le potopotoga* a toeaina.
33 Ua ia liua vaitafe e avea ma toafa,Ma vaipuna e avea ma fanua naumati,+
34 O fanua lafulemu e avea ma fanua lafulafuā,+Ona o le amioleaga o i latou o loo nonofo ai.
35 Ua ia liua le toafa e avea ma vailepa ua tutupu ai ū,Ma le fanua naumati e avea ma vaipuna.+
36 Na ia faanonofo i inā o ē ua fia aai,+Ina ia latou faatumauina ai se aai e nonofo ai.+
37 Ua latou lūlū fatu i fanua ma totō togāvine,+Ina ia fua mai ai ni fua se tele.+
38 Ua ia faamanuia i latou ma matuā faatoʻateleina ai;E leʻi faaitiitia foʻi e ia a latou lafumanu.+
39 Ae ua toe faaitiitia i latou ma faalumainaOna o sauāga, o puapuaga, ma faanoanoaga.
40 Ua ia ‘ino‘ino i tamālii,Ma tuu atu i latou e feoaʻi solo i mea tuufua e lē o iai se auala.+
41 Ae ua ia puipuia* le tagata mativa mai i le sauāina+Ma faato‘atele o latou aiga e pei o se lafu mamoe.
42 E vāai i ai tagata amio saʻo ma olioli ai;+A o ē e amiolētonu uma e mapuni o latou gutu.+
43 O lē e atamai, e tausia e ia nei mea uma+Ma iloilo toto‘a galuega o le alofa faamaoni o Ieova.+
Faamatalaga Pito i Lalo
^ Po o le “toe faatauina.”
^ Po o le “malosi.”
^ Po o le “E mai i le itu e oso aʻe ai le lā ma le itu e goto i ai.”
^ Po o le “Ua ʻinoʻino i latou i.”
^ Epe., “saofaʻiga.”
^ Po o le “faaeaina,” e faasino atu i le lē mafai ona āu i ai o se tasi.
