Salamo 22:1-31
I le faatonu o le ʻaufaimusika o le “ʻAila o le Vaveao.”* O le pese a Tavita.
22 Loʻu Atua e, loʻu Atua e, aiseā ua e tuulafoa‘ia ai aʻu?+
Aiseā ua e taumamao ai mai i le faaolaina o aʻu,Ma taumamao mai i la‘u tagi faataiō atu?+
2 Loʻu Atua e, ua ou valaau atu pea iā te oe i le ao, ae e te lē tali mai;+Atoa foʻi ma le pō, ua ou lē mapu lava.
3 Ae e paia oe,+Ua si‘osi‘omia oe* i viiga a Isaraelu.
4 Na faatuatua iā te oe o matou tamā;+Na faatuatua i latou, ma na e lavea‘ia pea i latou.+
5 Na latou alalaga atu iā te oe, ma na faasaoina ai i latou;Na latou faatuatua iā te oe, ma e latou te leʻi faanoanoa* ai.+
6 Ua na o aʻu o se anufe ae e lē o se tagata,Ua tauemua e tagata* ma ua inosia e le nuu.+
7 Ua ula mai i latou uma ua vāai mai iā te aʻu;+Ua latou ‘ata‘ata aamu ma lialia‘i o latou ulu ma le tauemu:+
8 “Na faalagolago o ia iā Ieova. Ia lavea‘ia e Ia o ia!
Ia faasaoina e Ia o ia, auā ua matuā pele o ia iā te Ia!”+
9 O oe na e aumaia aʻu mai i le manava,+O Lē na ou saogalemu ai a o oʻu susu i loʻu tinā.
10 Na tuuina atu aʻu e te tausia* talu ona ou fanau mai;O oe lava o loʻu Atua talu ona ou iai i le manava o loʻu tinā.
11 Aua e te taumamao ese mai iā te aʻu, auā ua latalata mai puapuaga+Ma ua leai se isi e fesoasoani mai.+
12 Ua siʻosiʻomia aʻu e le tele o tamaʻi povi poʻa;+Ua vagavagaia aʻu e povi po‘a malolosi o Vasana.+
13 Ua faamamaga mai o latou gutu iā te aʻu,+E pei o se leona tagi ua saeia se manu.+
14 Ua sasaa atu aʻu e pei o le vai;Ua see oʻu ivi uma.
Ua pei loʻu loto o se gaʻo;*+Ua matuā liusuāvai i totonu o aʻu.+
15 Ua leai soʻu malosi, ua pei o se taʻega ipu omea;+Ua pipii aʻe loʻu laulaufaiva i oʻu tainifo;+Ua e ave ifo aʻu i le efuefu o le oti.+
16 Ua siʻosiʻomia aʻu e o‘u fili e pei o taʻifau.+O le faapotopotoga lea o ē e fai mea leaga,+Ua latou osofaʻia oʻu lima ma oʻu vae e pei o se leona.+
17 E mafai ona ou faitau oʻu ivi uma.+
Ua latou vaavaai mai ma pulatoʻa mai iā te aʻu.
18 Ua latou tufatufa oʻu ofu iā i latou,Ma ua latou fai le vili* i loʻu ofu.+
19 A o oe Ieova e, aua e te taumamao ma aʻu.+
O oe o loʻu malosi; ia vave ona e fesoasoani mai iā te aʻu.+
20 Ia e laveaʻi iā te aʻu mai i le pelu,Ia lavea‘i lo‘u ola tāua* mai i lima o taʻifau;+
21 Ia faaola mai iā te aʻu mai i le gutu o le leona+ ma seu o povi poʻa o le vao;Ia e tali mai ma faaola mai iā te aʻu.
22 Ou te taʻutaʻu atu lou suafa i oʻu uso;+Ou te vivii atu iā te oe i totonu o le faapotopotoga.+
23 Ia vivii atu iā te ia, o outou o ē e matataʻu iā Ieova!
O outou uma le fanau a Iakopo, ia outou faamamaluina o ia!+
Ia matata‘u iā te ia, o outou uma le fanau a Isaraelu.
24 Auā e lē ʻinoʻino o ia pe ta‘ufaatauvaa le tigā o lē ua puapuagatia;+E na te lē natia ona fofoga mai iā te ia.+
E faafofoga mai o ia pe a ia tagi atu iā te ia mo se fesoasoani.+
25 Ou te vivii atu iā te oe i totonu o le faapotopotoga tele;+Ou te avatua foʻi i luma o ē e matataʻu iā te ia o mea na ou tautō ai.
26 E aai ma faamalieina o ē e agamalu;+O ē e sa‘ili iā Ieova e vivii atu iā te ia.+
Tau ina ia e fiafia i le olaga* e faavavau.
27 E manatua e tuluʻiga uma o le lalolagi ma liliu atu iā Ieova.
E ifo foʻi i ou luma aiga uma o atunuu.+
28 Auā o Ieova o le Tupu;+O loo ia pulea atunuu.
29 E aai i latou uma o ē e tamaoaiga* o le lalolagi ma latou ifo;E tootutuli i ona luma o i latou uma o ē e ō ifo i le efuefu;E leai se tasi o i latou e mafai ona faasaoina o latou ola.
30 E auauna iā te ia ē e tupuga mai iā i latou;E faalogo le tupulaga o loo fai mai e faatatau iā Ieova.
31 E latou te ō mai ma taʻu mai lana amiotonu.
E latou te ta‘u atu i tagata o le a fananau mai mea ua ia faia.
Faamatalaga Pito i Lalo
^ Atonu o se fati po o se ituaiga musika.
^ Po o “Ua e tiʻetiʻe.”
^ Po o le “māsiasi.”
^ Po o “O se luma i tagata.”
^ Epe., “tuuina atu aʻu iā te oe.”
^ E foliga mai o le ga‘o lea e maua mai i lagomeli.
^ Tagaʻi i le Uiga o Upu.
^ Epe., “E na o aʻu lava e toʻatasi,” e faasino atu i lona ola.
^ Epe., “Tau ina ia tātā pea lou fatu.”
^ Epe., “o ē e puputa.”
