Salamo 27:1-14
O le salamo a Tavita.
27 O Ieova o loʻu malamalama+ ma loʻu faaolataga.
O ai ea ou te mataʻu i ai?+
O Ieova o le malosi ia o loʻu ola.+
O ai ea ou te fefe i ai?
2 Ina ua osofaʻia aʻu e ē e fai mea leaga ina ia ʻaina aʻu,+Na tautevateva ma paʻuʻū oʻu fili ma ē e tetee mai iā te aʻu.
3 E ui ina tolauapi se ʻau e faasagatau mai iā te aʻu,Ae e lē fefe ai loʻu loto.+
E ui ina faasagatau mai iā te aʻu i se taua,Ae e tumau pea ona ou mautinoa i le Atua.
4 E tasi lava le mea ua ou talosaga atu ai iā Ieova,O le mea lea o loo oʻu naunau i ai,Ina ia ou nofo i le fale o Ieova i aso uma o loʻu ola,+E vaavaai atu ai i le matagofie o IeovaMa vaai atu ma le fiafia* i lona malumalu.*+
5 Auā e na te faalafi iā te aʻu i lona paolo i le aso o le puapuaga;+E na te natia aʻu i le mea lilo o lona faleʻie;+E na te tuu foʻi aʻu i le papa maualuga.+
6 O lenei ua faaeaina loʻu ulu i luga o oʻu fili uma o loo siʻomiaina aʻu;Ou te faia taulaga ma le alaga fiafia i lona faleʻie;Ou te usuina viiga* iā Ieova.
7 Ieova e, ia e faafofoga mai pe a ou valaau atu;+Ia e finagalo malie mai ma tali mai iā te aʻu.+
8 Ua fai ifo loʻu loto e faatatau iā te oe:
“Ia outou saʻili mai iā te aʻu.”
Ieova e, ou te saʻili atu lava iā te oe.+
9 Aua e te natia ou fofoga mai iā te aʻu.+
Aua e te auina ese atu lau auauna i lou toʻasā.
O oe o loʻu fesoasoani;+Le Atua o lo‘u faaolataga, aua e te tuulafoaʻiina aʻu pe tuua aʻu.
10 E tusa pe tuulafoa‘ia aʻu e loʻu lava tamā ma loʻu lava tinā,+Ae e talia lava aʻu e Ieova.+
11 Ieova e, ia e faatonu mai aʻu i lou ala,+Ia e taʻitaʻi iā te aʻu i le ala o le amio saʻo ona o oʻu fili.
12 Aua neʻi tuuina atu aʻu i ē e ita mai iā te aʻu,*+Auā ua tulaʻi mai iā te aʻu o ē e molimau pepelo,+Ma ua latou faamata‘u a‘u i faiga sauā.
13 O fea ou te iai pe ana ou lē faatuatuaOu te vaai i le lelei o Ieova i le nuu o tagata ola?*+
14 Ia faamoemoe atu iā Ieova;+Ia lototele ma ia faamalosia lou loto.+
Ioe, ia faamoemoe atu iā Ieova.
Faamatalaga Pito i Lalo
^ Po o le “Ma vaai ma manatunatu.”
^ Po o le “faleʻie paia.”
^ Po o le “tā ma usuina pese.”
^ Po o “i le mana‘o o ē e ita mai iā te a‘u.”
^ Pe atonu “E mautinoa ou te faatuatua ou te vaai i le lelei o Ieova i le nuu o tagata ola.”
