Salamo 55:1-23
I le faatonu o le ʻaufaimusika; ia faaaogā ma meafaifaaili e iai uaua. O le Masekila.* O le salamo a Tavita.
55 Le Atua e, ia e faafofoga mai i laʻu tatalo,+Aua foʻi e te lē amanaʻia laʻu talosaga atu mo lou alofa mutimutivale.*+
2 Ia e faafofoga mai ma tali mai iā te aʻu.+
Ua ou fememeaʻi i loʻu popole,+Ma ua ou atugalu ai,
3 Ona o faamatalaga a le filiMa omiga mai i lē e amioleaga.
Auā ua latou faaoo mai iā te aʻu o mea e tigā ai,Ma ua latou ʻinoʻino pea iā te aʻu ona o lo latou ita.+
4 Ua matuā tigā lava loʻu loto i totonu iā te aʻu,+Ma ua lofitūina aʻu i le fefe i le oti.+
5 Ua oo mai iā te aʻu le mataʻu ma le gatete,Ma ua ou matuā gatete lava.
6 Ua ou faapea ifo: “E! pe ana iai ni oʻu apaʻau e pei o se lupe,
Ou te lele ese ma ou nofo i se mea saogalemu.
7 Faauta! Ou te sola mamao ese lava.+
Ou te nofo ai foʻi i le toafa.+ (Selā)
8 Ou te faatopetope atu i le mea ou te sao aiMai i le matagi malosi ma le afā.”
9 Ieova e, ia e faafenuminumiaʻi i latou ma faalēaogā a latou taupulepulega,*+Auā ua ou vaaia faiga sauā ma femisaaʻiga i le aai.
10 Ua latou savavali faataamilo i le pā i le ao ma le pō;Ua iai i totonu le amioleaga ma faafitauli.+
11 Ua iai foʻi le malaia i totonu o le aai;Ua lē ō ese lava mai i lona nofoaga faitele o sauāga ma faiga taufaasesē.+
12 Auā e lē o se fili na faifai mai iā te aʻu;+Semanū e mafai ona ou faapalepale i ai.
E lē o se fili na tetee mai iā te aʻu;Semanū e mafai ona ou lafi mai iā te ia.
13 A o oe lava, o le tagata e pei o aʻu,*+O laʻu lava uō ou te masani lelei ai.+
14 Na māfana la ta faauōga;Na masani foʻi ona ta savavali faatasi ma tagata e toʻatele i le fale o le Atua.
15 Ia oo iā i latou le faatafunaga!+
Ia latou ō ifo foʻi i le Tuugamau* a o feola;Auā ua iai le leaga i mea e latou te nonofo ai, ma i totonu o i latou.
16 A o aʻu, ou te valaau atu i le Atua;Ma e faaolaina aʻu e Ieova.+
17 I le afiafi, i le taeao, ma le aoauli, ou te popole ma ou ōi,*+Ma e faafofoga mai o ia i loʻu leo.+
18 E na te laveaʻi* ma faatoʻafilemu aʻu mai i ē ua faasagatau mai iā te aʻu,Auā ua matuā toʻatele i latou ua faasagatau mai iā te aʻu.+
19 E faafofoga mai le Atua ma tali mai iā i latou,+O Lē o loo afio i le nofoālii talu mai anamuā.+ (Selā)
E mumusu i latou e faia ni suiga,O ē e lē matataʻu i le Atua.+
20 Ua ia* osofa‘ia ē o loo nonofo filemu ma ia;+Ua ia solia lana feagaiga.+
21 E sili atu ona molemole ana upu nai lo o le pata,+Peitaʻi ua manaʻo lona loto e tau.
E sili atu foʻi ona mālū ana upu nai lo o le suāuu,Peitaʻi ua pei o ni pelu maʻai.+
22 Ia lafo atu ou popolega uma* iā Ieova,+O ia e na te tausia oe.+
E na te lē tuua lava le tagata amiotonu ia tautevateva.+
23 Ae o oe le Atua e, e te ave ifo i latou i le lua e sili ona loloto.+
O tagata ua nofosala i le toto ma ē e taufaaʻoleʻole, e feoti i latou a o leʻi taitai o latou olaga.+
A o aʻu, ou te faatuatua atu iā te oe.
Faamatalaga Pito i Lalo
^ Tagaʻi i le Uiga o Upu.
^ Po o le “Aua foʻi e te lafi pe a ou tatalo atu mo se fesoasoani.”
^ Po o le “faafenumiaʻi la latou gagana.”
^ Po o “le tagata e tutusa ma aʻu.”
^ Po o “Seoli.” Tagaʻi i le Uiga o Upu.
^ Po o le “faataiō.”
^ Epe., “faaolaina.”
^ E faasino atu i lē na la uō sa taʻua i fuaiupu e 13 ma le 14.
^ Po o “lau avega.”
