Salamo 78:1-72
-
Tausiga a le Atua ma le leai o se faatuatua o Isaraelu
O le Masekila.* O le salamo a Asafo.+
78 Loʻu nuu e, ia outou faalogo mai i laʻu tulafono;*Ia uaʻi mai o outou taliga i upu a loʻu gutu.
2 Ou te tautala atu i se faataoto.
Ou te faailoa atu mea lilo o aso anamua.+
3 O mea na tatou faalogo i ai ma iloa,Na faamatala mai e o tatou tamā iā i tatou,+
4 E tatou te lē natia ia mea mai i a latou fanau;E tatou te faamatala atu i tupulaga o loo fāi mai,+O galuega mamana a Ieova ma lona malosi,+O mea ofoofogia na ia faia.+
5 Na ia faavaeina se faamanatuga iā Iakopo,Ma faatūina se tulafono iā Isaraelu;Na ia poloaʻia o tatou augātamāIna ia faailoa atu ia mea i a latou fanau,+
6 Ina ia iloa ai e le tupulaga o loo sosoo mai,O fanau o le a fananau mai.+
Ina ia latou faamatala atu fo‘i i a latou fanau.+
7 Ona latou faatuatua ai lea i le Atua.
E lē galo iā i latou galuega a le Atua+Ae e latou te tausia ana poloaʻiga.+
8 Ona lē pei lea o i latou o o latou augātamā,O le tupulaga faauamaaa ma fouvale,+O le tupulaga foʻi e le‘i mautonu* o latou loto+Ma e le‘i faamaoni o latou loto i le Atua.
9 Na faaauupegaina le fanauga a Efaraima i ‘aufana,Ae na latou solomuli i le aso o le taua.
10 E latou te leʻi tausia le feagaiga a le Atua,+Ma mumusu e savavali i lana tulafono.+
11 Na galo foʻi iā i latou ana mea na fai,+O ana galuega ofoofogia na ia faailoa atu iā i latou.+
12 Na ia faia mea mamana a o vaavaai i ai o latou augātamā+I le nuu o Aikupito, le vaipanoa o Soana.+
13 Na ia vaeluaina le sami ina ia faaui ane ai i latou,Na ia faia foʻi vai ia tū e pei o se pā puipui.*+
14 Na ia taʻitaʻia i latou e ala i se ao i le aoMa le pō atoa i le malamalama o le afi.+
15 Na ia vavāea papa i le toafa,Na ia faafeinu i latou ina ia malilie i vai e pei o vai loloto.+
16 Na ia faapuna mai vai e tafe mai i le papaMa faatafe ifo ai vai e pei o vaitafe.+
17 Ae ua latou agasala pea iā te iaE ala i le fouvale i Lē e Silisili Ese i le toafa;+
18 Na latou tofotofo i le Atua i o latou loto+E ala i le tagisā i meaʻai na latou faananau i ai.
19 Ona latou muimui lea i le Atua,Ua faapea ane: “Pe e mafai ea e le Atua ona laulau mai ni meaʻai i le toafa?”+
20 Faauta! Ua ia taia le papaIna ia tafe mai ai le vai ma tatafe mai ai ālia.+
“Pe e mafai fo‘i la ona ia foaʻi mai ni meaʻai,Pe saunia ni aano o manu mo lona nuu?”+
21 Ina ua faafofoga Ieova iā i latou, ona tupu lea o lona maʻemaʻeā;+Ona ia faaoo lea o le afi+ iā Iakopo,Ma ua oso aʻe lona toʻasā iā Isaraelu+
22 Auā e latou te leʻi faatuatua i le Atua;+E latou te leʻi maufaatuatuaina e mafai ona ia faaolaina i latou.
23 Ona ia poloaʻiina lea o le lagi puaoa i lugā,Ma ua ia tatala faitotoʻa o le lagi.
24 Na ia faatotō ifo pea i o latou luga le manai e aai ai;Na ia avatu iā i latou le saito mai i le lagi.+
25 Na aai tagata i meaʻai a ē e malolosi;*+Na ia tuuina atu iā i latou meaʻai e maoona ai.+
26 Na ia faaoso mai i le lagi le matagi mai i sasaʻeMa faaagi le matagi mai i saute i lona malosi.+
27 Na ia faatotō ifo aano o manu iā i latou e pei o le efuefu,O manufelelei foʻi e pei o le oneone o le sami.
28 Na ia faatotō ifo i totonu o lana togālauapi,Ua siʻomia ai ona faleʻie.
29 Ona latou aai faaloloto ai lea;Na ia avatu foʻi iā i latou mea na latou faananau i ai.+
30 A o leʻi faamalieina atoatoa mea na latou tuʻinanau i ai,A o iai pea i o latou gutu a latou meaʻai,
31 Ona oso aʻe lea o le toʻatamaʻi o le Atua iā i latou.+
Ua ia fasiotia o latou tagata malolosi;+Ua ia faaumatia tauleleʻa o Isaraelu.
32 E ui i nei mea, ae na latou agasala pea+Ma lē faatuatua i ana galuega ofoofogia.+
33 Ona ia faaiʻuina lea o o latou aso e pei o se savili,+Ma o latou tausaga i se mala faafuase‘i.
34 Ae ina ua ia fasiotia nisi o i latou, ona latou sa‘ili atu lea iā te ia;+Ua latou toe foʻi ma saʻili i le Atua,
35 E latou te manatua o le Atua o lo latou Papa,+Ma o le Atua Silisili Ese, o Lē e togiolaina i latou.*+
36 Ae ua latou taumafai e faasesē o ia i a latou upu,Ma pepelo iā te ia i o latou laulaufaiva.
37 E leʻi tumau o latou loto iā te ia;+E latou te leʻi faamaoni foʻi i lana feagaiga.+
38 Peitaʻi, sa alofa mutimutivale o ia;+Na ia faamagalo a latou mea sesē ma lē faaumatia ai i latou.+
Na masani ona ia taofia lona toʻasā,+Nai lo o le faatupu o lona toʻatamaʻi atoatoa.
39 Auā na ia manatua ua na o ni tagata lava i latou,+O se matagi e agi atu ma e lē toe fo‘i mai.*
40 Na masani ona latou fouvale iā te ia i le toafa,+Ma faatigā iā te ia i le toafa!+
41 Na latou tofotofo pea lava pea i le Atua,+Ma na latou faatigā foʻi i Lē e Paia o Isaraelu.
42 E latou te leʻi manatua lona mana,*I le aso na ia laveaʻiina* ai i latou mai i le fili,+
43 Lea na ia faaalia ai ana faailoga i Aikupito+Ma ana vavega i le vaipanoa o Soana,
44 Lea na ia liua ai fo‘i alāvai o le Naila i le toto,+Ina ia lē mafai ai ona latou feinu mai i o latou vaitafe.
45 Na ia aauina atu foʻi le tele o lago taufeū ina ia faatama‘ia ai i latou+Ma rane ina ia fano ai i latou.+
46 Na ia avatu fua o o latou fanua i sē akerise ua fia aai,Ma fua o a latou galuega i sē akerise e matuā tele.+
47 Na ia faaumatia o latou vine i le uatoʻa+Ma o latou laau o le sukamoru i uatoʻa.
48 Na ia tuuina atu a latou manu ave avega i le uatoʻa+Ma a latou lafumanu i uila.*
49 Na ia faaoo atu iā i latou lona toʻasā aasa,O le maʻemaʻeā, o le toʻatamaʻi, ma mafatiaga,Na aauina mai foʻi ʻau o agelu e aumaia mala.
50 Na ia saunia se ala mo lona toʻasā.
E leʻi faasaoina e ia i latou mai i le oti;Ma na ia tuuina atu i latou* i le faamaʻi.
51 Ona i‘u ai lea i lona taia o ulumatua uma o Aikupito,+O o latou ulumatua na fananau i faleʻie o Hamo.
52 Ona ia aumaia lea o lona nuu e pei o se lafu mamoe,+Ma taʻitaʻia i latou e pei o se lafu i le toafa.
53 Na ia taʻitaʻia i latou ma le saogalemu,Ma e leʻi fefefe i latou;+Ua ufitia e le sami o latou fili.+
54 Ma na ia aumaia i latou i lona laueleele paia,+O le vaega maugā na maua e lona aao taumatau.+
55 Na ia tutuliesea nuu mai i o latou luma;+Na ia vaevaeina atu iā i latou se tofi e ala i se fua;+Ona ia faanonofo ai lea o ituaiga o Isaraelu i o latou fale.+
56 Ae ua latou tofotofo pea ma fouvale i le Atua Silisili Ese;+E latou te leʻi ua‘i atu i ana faamanatuga.+
57 Ua liliuese fo‘i i latou ma faa‘ole‘ole e pei o o latou augātamā.+
E lē maufaatuatuaina i latou e pei o se ʻaufana ua piʻo.+
58 Na latou faatigā pea iā te ia i a latou mea maualuluga,+Ma na latou faatupu lona to‘asā* i a latou faatusa ua tā.+
59 Ua faafofoga mai i ai le Atua ma tupu ai lona maʻemaʻeā,+Ma ia matuā teena ai Isaraelu.
60 Na i‘u ina lafoaʻia e ia le faleʻie paia o Sailo,+O le faleʻie na ia afio ai faatasi ma tagata.+
61 Na ia tuuina atu le faailoga o lona malosi ia ave faapagota;Ma lona matagofie i le lima o le fili.+
62 Na ia tuuina atu lona nuu i le pelu,+Ma na matuā toʻasā o ia i lona tofi.
63 Na faaumatia e le afi ona tauleleʻa,Ma e le‘i usuina fo‘i pese o faaipoipoga mo ana taupou.*
64 Na fasia ana ositaulaga i le pelu,+E leʻi fetagisi foʻi a latou lava avā.+
65 Ona maleifua mai lea o Ieova e peiseaʻī na tofā,+E pei o se tagata malosi+ ua ala mai sa inu tele i le uaina.
66 Na ia fasia ona fili mai i tua;+Na ia faalumaina i latou e faavavau.
67 Na ia teena le faleʻie o Iosefa;E na te leʻi filifilia le ituaiga o Efaraima.
68 Ae ua ia filifilia le ituaiga o Iuta,+O le mauga o Siona, lea ua ia alofa i ai.+
69 Ua ia fausia lona malumalu ia tumau e pei o le lagi,*+E pei o le lalolagi na ia faavaeina e faavavau.+
70 Na ia filifilia lana auauna o Tavita+Ma aumaia o ia mai i lotoā o mamoe,+
71 Mai i le tausia o mamoe o loo fesusui a latou tama;Na ia faia o ia ma leoleo mamoe iā Iakopo, o lona nuu,+Ma Isaraelu, o lona tofi lea.+
72 Na ia leoleoina i latou ma le faamaoni o lona loto,+Na ia taʻitaʻia fo‘i ma le poto i latou.+
Faamatalaga Pito i Lalo
^ Tagaʻi i le Uiga o Upu.
^ Po o le “faatonuga.”
^ Epe., “leʻi saunia.”
^ Po o “se mea maupuʻepuʻe.”
^ Po o “agelu.”
^ Po o “Lē e faia le tauimasui mo i latou.”
^ Po o le “E alu ese le ola ma e lē toe foʻi mai.”
^ Epe., “aao.”
^ Epe., “faaolaina.”
^ Pe atonu “i le maualuga o le fiva.”
^ Epe., “o latou ola.”
^ Po o le “fuā.”
^ Epe., “Ma e le‘i viia ana taupou.”
^ Epe., “e pei o mea maualuluga.”
