Tanielu 10:1-21
10 O le tausaga lona tolu o le nofoaiga a Kuresa+ le tupu o Peresia, na tuuina atu ai se faaaliga iā Tanielu, o lē ua igoa iā Peletisara;+ e moni lava le feʻau, ma e faatatau atu i se fetauaʻiga tele. Na ia malamalama i le feʻau, ma na faamalamalamaina iā te ia mea na ia vaaia.
2 O aʻu o Tanielu, i na aso na ou faavauvau ai+ mo vaiaso atoatoa e tolu.
3 E leai se meaʻai lelei na ou ʻai ai, ma e leai se aano o se manu po o se uaina na oo i loʻu gutu, ou te leʻi uuina foʻi aʻu i le suāuu mo vaiaso atoatoa e tolu.
4 I le aso 24 o le masina muamua, a o oʻu iai i le auvai o le vaitafe tele o Tikarise,*+
5 na ou tepa aʻe ma vaaia ai se tamāloa ua ofu i le ʻie lino,+ ma ua fusi lona sulugātiti i le fusi auro mai i Upasa.
6 Ua pei lona tino o le tasesa,+ o ona fofoga ua pei o le uila, o ona mata ua pei o sulu ua mumū, o ona lima ma ona vae ua pei o le ʻapamemea matuā iila,+ o le leo o ana upu ua pei o leo o le motu o tagata e toʻatele.
7 O aʻu o Tanielu, e na o aʻu na vaai i le faaaliga; a o tagata na matou faatasi e leʻi vāai i le faaaliga.+ Peitaʻi, na oo iā i latou le gatete tele ma ua latou sosola ai ma lalafi.
8 Ona tuua ai lea na o aʻu, ma ina ua ou vaai i lenei faaaliga tele, ona leai lea o se malosi o totoe iā te aʻu, ua matuā fole oʻu foliga ma ua leai lava soʻu malosi.+
9 Ua ou lagona le leo o ana upu; ae ina ua ou faalogo ua tautala o ia, ona ou matuā moegase faō ai lea i le eleele.+
10 Ae ua paʻi mai se lima iā te aʻu,+ ona mafai ai lea ona ou tootuli i oʻu tulivae ma oʻu alofilima.
11 Ua ia faapea mai iā te aʻu:
“Tanielu e, o oe o le tagata ua matuā faapelepeleina,*+ ia e uaʻi i upu o le a ou tautala atu ai iā te oe. Ia e tulaʻi i le mea na e tū ai, auā ua auina mai aʻu iā te oe.”
Ina ua ia fai mai iā te aʻu nei upu, ona ou tū ai lea i luga ma le gatete.
12 Ua ia toe faapea mai iā te aʻu: “Tanielu e, aua e te fefe.+ Ua faafofogaina au upu mai i le aso muamua na e saunia ai lou loto ia malamalama i ia mea, ma faamaulalo oe lava i luma o lou Atua, ma ua ou sau ona o au upu.+
13 Ae na tetee mai iā te aʻu le perenise+ o le malo o Peresia mo aso e 21. Ae na sau Mikaele,*+ o se tasi o perenise sili, ma na fesoasoani iā te aʻu; ma na ou iai pea i inā faatasi ma tupu o Peresia.
14 Ua ou sau e faamatala atu iā te oe mea o le a tutupu i lou nuu i le faaiʻuga o aso,+ auā o se faaaliga mo aso o i luma.”+
15 Ina ua ia fai mai ia upu iā te aʻu, ua faasaga oʻu mata i le eleele ma ua ou lē magagana.
16 Ona paʻi mai lea i oʻu laugutu+ o se tasi e foliga e pei o se tagata, ma ua ou tautala atu ma faapea atu i lē ua tū i oʻu luma: “Loʻu alii e, ua ou gatete ona o le faaaliga, ma ua leai soʻu malosi.+
17 E faapefea la iā te aʻu o lau auauna ona tautala atu iā te oe, loʻu alii e?+ Auā o lenei ua leai soʻu malosi, ma ua lē toe iai se mānava iā te aʻu.”+
18 Ona toe paʻi mai lea iā te aʻu o lē e foliga e pei o se tagata ma faamalosi mai iā te aʻu.+
19 Ua ia faapea mai: “Le tagata ua matuā faapelepeleina,*+ aua e te fefe.+ Ia iā te oe le filemu.+ Ia e faamalosi, ioe, ia e faamalosi.” A o ia talanoa mai iā te aʻu, ona ou malosi ai lea ma ou faapea atu: “Inā fetalai mai ia loʻu alii e, auā ua e faamalosi mai iā te aʻu.”
20 Ua ia faapea mai: “Pe e te iloa ea le māfuaaga ua ou sau ai iā te oe? O lenei, ou te toe alu atu e tau ma le perenise o Peresia.+ Pe a ou alu ese, e sau foʻi le perenise o Eleni.
21 Peitaʻi, ou te taʻu atu iā te oe mea ua tusia i le tusi o le upu moni. E leai se tasi ua fesoasoani malosi iā te aʻu i ia mea seʻi vaganā ai Mikaele,+ o lo outou perenise.+
Faamatalaga Pito i Lalo
^ Epe., “Hitekelu.”
^ Po o le “alofateleina.”
^ Lona uiga “O Ai e Pei o le Atua?”
^ Po o le “alofateleina.”
