Tanielu 11:1-45
11 “A o aʻu, i le tausaga muamua o le nofoaiga a Tariu+ le Metai, na ou tū ai e faamalosiau ma puipuia o ia.*
2 O lenei, ou te taʻu atu le mea moni iā te oe:
“Faauta! e toʻatolu isi tupu e tutū mai* mo Peresia, ma o le tupu lona fā e tele atu lona tamaoaiga nai lo o isi uma. Pe a oo foʻi ina malosi o ia ona o lona tamaoaiga, o le a faaaogā ana mea uma e faasagatau ai i le malo o Eleni.+
3 “O le a tulaʻi atu se tupu malosi ma pule i malo e tele+ ma faia mea e loto i ai.
4 Ae pe a tulaʻi o ia, e lepetia lona malo ma vaevaeina i matagi e fā o le lagi,+ ae e lē tuuina i ē e tupuga mai iā te ia ma e lē tusa foʻi ma lana pulega na ia pule ai; auā o le a liaʻieseina lona malo, e fai foʻi mo isi ae e lē o i latou.
5 “O le a matuā malosi le tupu o le itu i saute, o se tasi lea o ana perenise; ae o le a iai sē* e sili atu ona malosi nai lo o ia, ma o le a sili atu ona malosi lana pulega.
6 “Pe a mavae ni tausaga, ona la ʻau faatasi lea, e alu atu foʻi le afafine o le tupu o le itu i saute i le tupu o le itu i mātū, ina ia faia se maliega. Peitaʻi, e lē tumau pea ona iai i lenei afafine le lima malosi; e lē tumau foʻi le tupu po o lona aao; e tuuina atu lenei afafine, o ia atoa ma i latou e momolia o ia, ma lē na fanaua o ia, ma lē na te faamalosia lea afafine i na aso.
7 O le a tū se tasi mai i tātupu o aa o lenei afafine i lona* tulaga tautupu, e sau foʻi o ia i le ʻautau ma faasagatau atu i le nofoaga malupuipuia a le tupu o le itu i mātū, ma o le a faasagatau atu o ia iā i latou ma manumalo ai.
8 E na te ave foʻi i Aikupito o latou atua, o o latou faatusa uʻamea, o a latou mea matagofie* ua faia i siliva ma auro, atoa ai ma pagota. Mo ni tausaga, o le a tū mamao o ia mai i le tupu o le itu i mātū,
9 o lē o le a alu atu e faasagatau i le malo o le tupu i le itu i saute, ae e toe foʻi atu i ona lava laufanua.
10 “A o ona* atalii, e la te sauniuni mo le taua ma faapotopoto se ʻautau tele lava. O le a alu atu lava o ia* ma lofia le laueleele e pei o se lologa. Ae e toe foʻi o ia, ma o le a ia tau seʻia oo lava i lona aai malupuipuia.
11 “E matuā ita foʻi le tupu o le itu i saute ma alu atu ma tau ma ia, o le tupu lea o le itu i mātū; ma e na te aveina se motu o tagata e toʻatele, ae e tuuina atu lenei motu o tagata e toʻatele i le lima o lea tupu.
12 O le a aveesea le motu o tagata. O le a faamaualugaina foʻi lona loto, ma e na te faapogaia le paʻuʻū o le faitau sefulu afe; ae e na te lē faaaogāina lona tulaga malosi.
13 “E toe foʻi le tupu o le itu i mātū ma faatulaga se motu o tagata e sili atu ona toʻatele nai lo o lea na muamua; ma i le iʻuga o se vaitaimi, ina ua mavae ni tausaga, e sau ai lava o ia ma le ʻautau tele atoa ma oloa e tele.
14 I na taimi, e toʻatele o le a tutū atu e faasagatau i le tupu o le itu i saute.
“O le a tulaʻi foʻi tagata sauā* mai i lou nuu e taumafai e faataunuu se faaaliga; ae e lē taulau* i latou.
15 “E sau foʻi le tupu o le itu i mātū ma tanu se mea maupuʻepuʻe ma faoa se aai ua malupuipuia. A o lima* o le itu i saute e lē tumau ia, e faapena foʻi ona fitafita ua filifilia; e leai so latou malosi e tutū atu ai.
16 O lē e alu atu e faasagatau iā te ia* o le a faia lona lava loto, ma e leai foʻi se tasi e tū i ona luma. E tū foʻi o ia i le Laueleele Matagofie,+ ma o le a iā te ia le malosi e faaumatia ai.
17 E faasaga atu ona mata* ina ia alu atu ma le malosi uma o lona malo, ma e na te faia se maliega ma lea tupu; e taulau foʻi lea gaoioiga. E faataga o ia e tuuina atu le afafine o tagata ina ia faaleagaina. E lē tū lenei afafine, e lē ʻau faatasi foʻi ma ia.
18 Ona faasaga lea o ona mata i nuu tū matafaga ma faoa le tele o nuu. Ae o le a faamutaina e se taʻitaʻiʻau le faalumaina na faatupuina e lenei tagata. O le a muta lea faalumaina, auā o le a faalumaina lē na māfua ai le faalumaina.
19 Ona toe faasaga atu lea o ona mata i nofoaga malupuipuia o lona lava atunuu, e tautevateva ma paʻū ai, ma e lē toe maua o ia.
20 “E tulaʻi foʻi se tasi i lona tulaga tautupu, o lē e māfua ai le alu atu o sē e aolafoga* i le malo matagofie, ae i nai aso o le a fano ai o ia, ae e lē ona o le ita po o se taua.
21 “E tulaʻi foʻi i lona tulaga tautupu o lē e inosia, e latou te lē tuu atu iā te ia le mamalu o le malo; e sau foʻi o ia i se taimi o le saogalemu* ma maua ai le malo e ala i upu faaʻoleʻole.
22 A o ʻautau e pei o ni lologa o le a tafiesea ona o ia, ma e faaumatia ai i latou; atoa ma le Taʻitaʻi+ o le feagaiga.+
23 Ona o lo latou ʻau faatasi ma ia, e na te faia ai mea pepelo ma alu aʻe lava ia, e malosi foʻi ona o se nuu laʻitiiti.
24 I se taimi o le saogalemu,* e sau o ia i vaega e sili ona lelei* o le itumalo ma faia mea e leʻi faia e ona tamā ma tamā o ona tamā. E na te tufatufaina atu iā i latou mea ua faoa, o vete* ma oloa; ma faia ni faufauga leaga i ni nofoaga malupuipuia, ae e na o sina taimi.
25 “E na te faatupuina lona malosi ma lona loto ia tetee atu ma lana ʻautau tele i le tupu o le itu i saute; ma o le a sauniuni foʻi le tupu o le itu i saute mo le taua ma se ʻautau matuā toʻatele ma malosi. E lē mafai ona tū o ia* auā e latou te faia ni faufauga leaga iā te ia.
26 O i latou o ē e aai i ana meaʻai lelei, o le a paʻū ai o ia.
“A o lana ʻautau malosi, o le a tafiesea* ma o le a fasiotia le toʻatele.
27 “A o nei tupu e toʻalua, e naunau o la loto e faia mea leaga, ma e tautala le tasi i le isi i tala pepelo a o nonofo i le laulau e tasi. Ae e lē taulau manuia, auā e oo mai le iʻuga i le taimi ua atofaina ai.+
28 “E toe alu o ia i lona laueleele ma le tele o oloa, ma e tetee lona loto i le feagaiga paia. E taulau foʻi ana gaoioiga ma e toe alu o ia i lona lava laueleele.
29 “E toe foʻi mai o ia i le taimi atofaina, ma tetee atu i le itu i saute. Ae o le a lē tutusa le taimi lenei ma le taimi muamua,
30 auā e ō atu vaa o Kitimo+ e tetee iā te ia, ona faamaulaloina ai lea o ia.
“E toe foʻi o ia ma lafo upu faatigā* i le feagaiga paia+ ma e taulau ana gaoioiga; e toe foʻi o ia ma uaʻi i ē ua tuua le feagaiga paia.
31 E tulaʻi foʻi ʻautau* ua ʻau faatasi ma ia; e latou te faaleagaina le nofoaga malupuipuia, o le malumalu+ lea, e aveese foʻi le taulaga e faia i aso uma.+
“E latou te faatūina le mea e inosia ua faatafuna aʻi.+
32 “O i latou o ē e faia mea leaga e soli ai le feagaiga, e na te taʻitaʻiina i latou e ala i ni upu faaʻoleʻole* ina ia latou fulitua i le upu moni. Ae o tagata e iloa lo latou Atua, o le a malolosi i latou ma o le a taulau a latou gaoioiga.
33 O i latou foʻi mai i tagata o ē ua iai le tofā mamao,+ o le a latou faamalamalamaina le toʻatele. O le a paʻuʻū i latou i le pelu ma le afi, e ave faapagota ma faoa a latou mea mo ni aso.
34 Ae pe a paʻuʻū i latou, o le a latou maua se fesoasoani itiiti; ma e toʻatele o le a aufaatasi ma i latou e ala i upu faaʻoleʻole.*
35 O le a paʻuʻū nisi o ē ua iai le tofā mamao, ina ia taunuu le galuega o le faamamāina ona o i latou ma le faaleleia o o latou tulaga ma ia lē ponā,+ seʻia oo i le taimi o le iʻuga; auā e leʻi oo i le taimi ua atofaina.
36 “E faia e le tupu mea e manaʻo i ai lona loto, ma e na te faaeaina o ia lava ma faasilisilia o ia lava i luga o atua uma; e tautala o ia i upu e faateʻia ai faasaga i le Atua o atua.+ E manuia o ia seʻia oo i le taimi ua uma ai le toʻasā; auā o le mea ua atofaina e ao ona taunuu.
37 E lē manatu o ia i le Atua o ona tamā; e lē manatu foʻi i tuʻinanauga o fafine atoa ma isi atua uma, ae na te faasilisilia o ia lava i luga o isi uma.
38 Ae nai lo o lea,* e na te avatu le viiga i le atua o nofoaga malupuipuia; e na te avatu foʻi le viiga i se atua e leʻi iloa e ona tamā e ala i auro, o siliva, o maa tāua, ma mea matagofie.*
39 E gaoioi o ia ma le taulau manuia faasaga i nofoaga e sili ona malupuipuia, e ala i le mulimuli i* se atua ese. E na te avatu le mamalu tele i ē e viiviia o ia,* e na te faia foʻi i latou ia pule i le toʻatele; e na te vaevaeina foʻi le laueleele ina ia maua ai se tupe.
40 “I le taimi o le iʻuga, e auai le tupu o le itu i saute ma ia i se tautūleiga,* ma e pei o se afā le alu atu o le tupu o le itu i mātū e faasagatau iā te ia, ma kariota ma ē e tiʻetiʻe i solofanua ma le tele o vaa; e alu atu o ia i atunuu ma e lolofi i ai e pei o se lologa.
41 E alu atu foʻi o ia i le Laueleele Matagofie,+ e tele foʻi atunuu o le a tautevateva ai. A o atunuu nei o le a sosola ese mai i ona lima: o Etoma ma Moapi, ma ē e sili ona tāua o tagata Amonī.
42 E na te faaoo atu pea lona lima i atunuu; ma e lē sao ai foʻi le atunuu o Aikupito.
43 E pule foʻi o ia i ʻoa ua natia o le auro ma le siliva, ma mea matagofie* uma o Aikupito. E mulimuli atu foʻi iā te ia o tagata Lipua ma tagata Aitiope.
44 “Ae o le a iai ni lipoti e faaatuatuvale ai o ia, e mai i le itu i sasaʻe* ma e mai i le itu i mātū, ona alu atu lea o ia ma le lotoa tele ina ia tuʻimomomo ma faaumatia le toʻatele.
45 E na te faatūina ona faleʻie tautupu i le vā o le sami telē ma le mauga paia o le Laueleele Matagofie;+ ma e oo o ia i lona lava iʻuga, e leai foʻi se tasi e fesoasoani iā te ia.
Faamatalaga Pito i Lalo
^ Po o le “ma avea o se malu iā te ia.”
^ Po o le “tutulaʻi.”
^ E foliga mai e faasino atu i le “tupu o le itu i mātū.”
^ E foliga mai e faasino atu i le “tupu o le itu i saute.”
^ Po o “mea tāua.”
^ I le gagana Eperu e mafai ona faasino atu lenei suinauna i ni tagata se toʻalua pe sili atu.
^ E foliga mai e faasino atu i le “tupu o le itu i mātū.”
^ Po o “atalii o tagata gāoi.”
^ Epe., “e paʻuʻū.”
^ Po o “ʻautau.”
^ E foliga mai e faasino atu i le “tupu o le itu i saute.”
^ Po o le “E maumauaʻi o ia.”
^ E mafai ona faasino atu i se isi e lesitalaina tane mo le taua.
^ Pe atonu “e aunoa ma se lapataʻiga.”
^ Tagaʻi i le Uiga o Upu.
^ Pe atonu “E aunoa ma se lapataʻiga.”
^ Epe., “vaega lololo.”
^ E foliga mai e faasino atu i le “tupu o le itu i mātū.”
^ Po o le “lolofi ese atu.”
^ Po o le “ma taulaʻi lona ita.”
^ Epe., “lima.”
^ Po o “upu faaviivii.”
^ Po o “upu faaviivii.”
^ Po o le “Ae i lona tulaga tautupu.”
^ Po o “mea tāua.”
^ Po o le “e ala i le fesoasoani a.”
^ Pe atonu “i so o se tasi e na te amanaʻia.”
^ Po o le “i se tautūleiga i o la seu.”
^ Po o “mea tāua.”
^ Po o le “mea e oso a‘e ai le lā.”
