Tanielu 12:1-13
12 “O lea taimi, o le a tulaʻi ai Mikaele,*+ o le perenise sili+ o lē o loo tulaʻi mo lou nuu.* E oo mai foʻi le taimi o puapuaga e leʻi faapea ona tupu talu ona iai se nuu e oo atu i lea taimi. O lea taimi o le a sao tagata o lou nuu,+ o i latou uma ua iloa o loo tusia i le tusi.+
2 O le toʻatele o i latou o loo momoe i le eleele o le a feala, o nisi i le ola e faavavau a o isi i le faalumaina ma le inosia e faavavau.
3 “O ē ua iai le tofā mamao, o le a susulu atu e pei o le malamalama o le vanimonimo o le lagi, o i latou foʻi ua faaliliu ai tagata e toʻatele i le amiotonu e pei o fetu e faavavau, faavavau lava.
4 “A o oe Tanielu e, ia e punitia ia upu ma faamauina le tusi seʻia oo i le taimi o le iʻuga.+ E toʻatele e saʻiliʻili solo* ma o le a faatuputeleina le poto saʻo.”+
5 O aʻu o Tanielu, na ou iloa ma vaaia isi e toʻalua o loo tutū i inā, o le tasi i le itu mai o le auvai o le vaitafe, ma le tasi i le isi itu o le auvai o le vaitafe.+
6 Ona fai atu lea o le tasi i le tagata o loo ofu i le ʻie lino,+ o lē o loo i luga aʻe o vai o le vaitafe: “O le ā le umi o totoe ona oo mai ai lea o le iʻuga o ia mea ofoofogia?”
7 Ona ou faalogo lea i le tagata o loo ofu i le ʻie lino, o lē o loo i luga aʻe o vai o le vaitafe, ua ia sii lona lima taumatau ma lona lima tauagavale i le lagi ma tautō i le suafa o Lē o loo soifua e faavavau:+ “O le umi o le taimi ua filifilia, o le taimi, ma taimi e lua, ma le ʻafa taimi.* Pe a uma ona nutililii le malosi o le ʻaupaia,+ ona faaiʻuina ai lea o nei mea uma.”
8 A o aʻu, na ou faalogo ae ou te leʻi malamalama;+ ona ou fai atu lea: “Loʻu alii e, o le ā le iʻuga o nei mea?”
9 Ua ia faapea mai: “Tanielu e, inā alu ia auā ua punitia upu ma faamauina ai seʻia oo i le taimi o le iʻuga.+
10 E toʻatele o le a faamamāina i latou lava, e faapaʻepaʻeina i latou ma tofotofoina.+ O le a faia mea leaga e ē amioleaga ma e leai se tasi o ē e amioleaga e malamalama; ae e malamalama o ē ua iai le tofā mamao.+
11 “E mai i le taimi e aveesea ai le taulaga e faia i aso uma+ ma le faatūina o le mea inosia e faatafuna aʻi,+ e 1,290 aso.
12 “E fiafia le tagata o loo faatalitali ma le onosaʻi* seʻia oo i le iʻuga o le 1,335 aso!
13 “A o oe, ia e tumau seʻia oo i le iʻuga. O le a e mālōlō, ae e te tū mai i lou tofi i le iʻuga o aso.”+
Faamatalaga Pito i Lalo
^ Lona uiga “O Ai e Pei o le Atua?”
^ Epe., “atalii o lou nuu.”
^ Po o le “saʻiliʻili māeʻaeʻa i ai [e faasino atu i le tusi].”
^ E faasino atu i le tolu ma le ʻafa taimi.
^ Po o le “faatalitali ma le naunautaʻi.”
