Tanielu 3:1-30
-
Le tupua auro a le tupu o Nepukanesa (1-7)
-
Faatonuga ina ia tapuaʻi i le tupua (4-6)
-
-
Tuuaʻia talavou Eperu e toʻatolu i le lē usiusitaʻi (8-18)
-
“E matou te lē auauna i ou atua” (18)
-
-
Lafo i le ogaumu aasa (19-23)
-
Laveaʻi faavavega mai i le afi (24-27)
-
Viiviia e le tupu le atua o talavou Eperu (28-30)
3 Na faia e le tupu o Nepukanesa se tupua auro, e 60 kupita* le maualuga, ma e 6 kupita* le lautele. Na ia faatūina i le fanua laugatasi o Turu i le itumalo o Papelonia.
2 Ua aauina atu e le tupu o Nepukanesa se feʻau ina ia faapotopoto faipule, o taʻitaʻi, o kovana, o le ʻaufaufautua, o teutupe, o faamasino, o leoleo o le saogalemu o le nuu, ma pule lagolago uma o itumalo, ina ia ō mai i le faapaiaina o le tupua na faatūina e le tupu o Nepukanesa.
3 Ona faapotopoto mai ai lea o faipule, o taʻitaʻi, o kovana, o le ʻaufaufautua, o teutupe, o faamasino, o leoleo o le saogalemu o le nuu, ma pule lagolago uma o itumalo, i le faapaiaina o le tupua na faatūina e le tupu o Nepukanesa. Ua latou tutū i luma o le tupua na faatūina e Nepukanesa.
4 Ua alaga leotele atu lē e faia faasilasilaga: “Ua faatonuina outou, o nuu, o atunuu, ma gagana,
5 o le taimi lava tou te faalogo ai i leo o le pū, o le faaili, o le kitara tafatolu,* o meafaifaaili ua iai uaua, o le meafaifaaili e fai lona taga ma isi meafaifaaili uma, ia outou faapaʻuʻū faō ma tapuaʻi i le tupua auro na faatūina e Nepukanesa le tupu.
6 O so o se tasi e lē faapaʻū faō ma tapuaʻi, o le a lafo i lea lava taimi i le ogaumu aasa.”+
7 O lea, o le taimi lava e faalogo ai tagata i leo o le pū, o le faaili, o le kitara tafatolu, o meafaifaaili ua iai uaua ma isi meafaifaaili uma, ona faapaʻuʻū faō ai lea o nuu, o atunuu, ma gagana uma ma tapuaʻi i le tupua auro na faatūina e le tupu o Nepukanesa.
8 I lenā taimi, ua ō atu ai nisi o tagata Kaletaia i le tupu ma tuuaʻia* tagata Iutaia.
9 Ua latou faapea mai i le tupu o Nepukanesa: “Le tupu e, ia soifua oe e faavavau.
10 O oe lava le tupu e, na faia le poloaʻiga e faapea pe a faalogo tagata uma i leo o le pū, o le faaili, o le kitara tafatolu, o le meafaifaaili ua iai uaua, o le meafaifaaili e fai lona taga ma isi meafaifaaili uma, e ao ona latou faapaʻuʻū faō ma tapuaʻi i le tupua auro;
11 ma o so o se tasi lava e lē faapaʻū faō ma tapuaʻi, o le a lafo i le ogaumu aasa.+
12 Ae ua iai nisi o tagata Iutaia o ē na e tofia e pule i mataupufai a le itumalo o Papelonia: o Sataraka, o Mesako, ma Apeteniko.+ Le tupu e, ua lē faaaloalo ia tane iā te oe. Ua latou lē auauna i ou atua, ma ua mumusu e tapuaʻi i le tupua auro na e faatūina.”
13 Ona matuā ita tele ai lea o Nepukanesa ma faatonu e aumai Sataraka, Mesako, ma Apeteniko. Ona aami ai lea o nei tane i luma o le tupu.
14 Ua faapea atu Nepukanesa iā i latou: “Sataraka e, Mesako e, ma Apeteniko, pe e moni ea e tou te lē o auauna i oʻu atua,+ ma e tou te mumusu e tapuaʻi i le tupua auro ua ou faatūina?
15 O lenei, afai ua outou nofosauni ma o le taimi lava tou te faalogo ai i leo o le pū, o le faaili, o le kitara tafatolu, o meafaifaaili ua iai uaua, o le meafaifaaili e fai lona taga ma isi meafaifaaili uma, tou te faapaʻuʻū faō ma tapuaʻi i le tupua auro na ou faia, ua lelei lea. Ae afai tou te mumusu e tapuaʻi i le tupua, o le a lafoina loa outou i le ogaumu aasa. O ai le atua e mafai ona laveaʻia outou mai i oʻu lima?”+
16 Ua tali mai Sataraka, o Mesako, ma Apeteniko i le tupu: “Nepukanesa e, e lē manaʻomia ona matou tali atu iā te oe e tusa ma lenei mea.
17 Afai o lea, e mafai e lo matou Atua o loo matou auauna i ai ona laveaʻia i matou mai i le ogaumu aasa. Le tupu e, e na te laveaʻi foʻi i matou mai i lou lima.+
18 Ae e tusa pe e na te lē faia faapea, le tupu e, ia e silafia e matou te lē auauna i ou atua ma e matou te lē tapuaʻi foʻi i le tupua auro ua e faatūina.”+
19 Ona matuā ita ai lea o Nepukanesa iā Sataraka, o Mesako, ma Apeteniko ma ua suia ona foliga* iā i latou, ma na ia faatonu atu ina ia faafitu ona faaaasa le ogaumu nai lo o le mea e masani ai.
20 Ua ia faatonu nisi tamāloloa malolosi o lana ʻautau e saisai iā Sataraka, Mesako, ma Apeteniko ma lafo i latou i le ogaumu aasa.
21 Ona saisai lea o nei tane faatasi ma o latou ofu tele, o o latou ofu ma o latou pulou ma ofu uma ua latou oofu ai, ma ua lafo i latou i le ogaumu aasa.
22 Ona o le lē alofa o le faatonuga a le tupu ma le mataʻutia o le aasa o le ogaumu, na faaumatia ai i le mumū o le afi tamāloloa sa avatua Sataraka, Mesako, ma Apeteniko.
23 Ae o nei tane e toʻatolu, o Sataraka, Mesako, ma Apeteniko, ua paʻuʻū i totonu o le ogaumu aasa a o saisaia i latou.
24 Ona fefe ai lea o Nepukanesa le tupu ma tulaʻi faavave ma faapea atu i ona tagata maualuluga: “Pe e tatou te leʻi saisaia ea nei tane e toʻatolu ma lafoina i latou i totonu o le afi?” Ua latou tali mai i le tupu: “O lea lava, le tupu e.”
25 Ua ia faapea atu: “Faauta! Ua ou iloa atu tane e toʻafā o loo savavali saʻoloto i totonu o le afi, ma e lē o afāina i latou, ma o le lona fā e foliga mai e pei o se alo o le atua.”
26 Ua faalatalata atu Nepukanesa i le faitotoʻa o le ogaumu aasa ma faapea atu: “Sataraka, Mesako, ma Apeteniko, o outou o auauna a le Atua Silisili Ese,+ inā ō mai ia i fafo ma ō mai i inei!” Ona ō mai ai lea mai i le afi o Sataraka, Mesako, ma Apeteniko.
27 Ua vāai faipule, o taʻitaʻi, o kovana, ma tagata maualuluga a le tupu na faapotopoto i inā,+ e leʻi aafia* tino o nei tane i le afi;+ e leʻi mū foʻi so latou lauulu, e leʻi leaga o latou ofu, ma e leʻi namuasua foʻi i latou.
28 Ona faailoa atu lea e Nepukanesa: “Ia viia le Atua o Sataraka, o Mesako, ma Apeteniko,+ o lē na auina mai lana agelu e laveaʻi i ana auauna. Na latou faatuatua iā te ia ma tetee i le poloaʻiga a le tupu, ma lotomalilie e feoti* nai lo o le auauna pe tapuaʻi i so o se atua seʻi vaganā ai lo latou lava Atua.+
29 O lea, ua ou faia lenei faatonuga, o so o se nuu, po o se atunuu po o se gagana e fai se upuleaga faasaga i le Atua o Sataraka, o Mesako, ma Apeteniko, e vaevaeniniiina i latou, e fai foʻi o latou fale ma faleese* o tagata uma; auā e lē o iai se isi atua e mafai ona laveaʻi e pei o ia.”+
30 Ona toe faafoʻisia lea e le tupu o tulaga o* Sataraka, Mesako, ma Apeteniko i le itumalo o Papelonia.+
Faamatalaga Pito i Lalo
^ O se meafaifaaili anamua e ese mai i le kitara i aso nei, e taʻua i le faa-Peretania o le triangular harp.
^ Po o le “faia tala taufaaleaga e uiga i.”
^ Po o le “ua matuā suia ona uiga.”
^ Po o le “mū.”
^ Po o le “ma faataulaga o latou tino.”
^ Pe atonu “mea e tiaʻi ai lapisi; faaputuga o otaotavale.”
^ Po o le “O le tupu na sologa lelei ai mea uma mo.”
