Tanielu 6:1-28
6 Ua lelei lea mea i le finagalo o Tariu, e tofia le toʻa 120 o faipule e vaaia le malo atoa.+
2 Ua pule iā i latou alii sili e toʻatolu, o Tanielu+ le tasi o i latou; ma e taʻu atu e faipule+ faamatalaga iā i latou, ina ia lē maʻimau ai oloa a le tupu.
3 Ae ua faamaonia e Tanielu ua sili o ia nai lo o isi alii sili ma faipule, auā ua maoa‘e lona atamai,+ ma ua manatu le tupu e faaeaina o ia e pule i le malo uma.
4 Ona saʻiliʻili lea e alii sili ma faipule ni māfuaaga e tuuaʻia ai Tanielu e tusa ma mataupufai a le malo, ae ua latou lē maua ni māfuaaga e tuuaʻia ai o ia po o se mea faapiʻopiʻo na ia faia, auā o ia o se tagata maufaatuatuaina, ma e lē faatamala pe e na te faia se mea faapiʻopiʻo.
5 Ua faapea ane ia tamāloloa: “E matuā lē mafai ona tatou maua ni māfuaaga e tuuaʻia ai Tanielu, seʻi vaganā ai o se mea e fesootaʻi atu i le tulafono a lona Atua.”+
6 O lea, ua lolofi faatasi atu ai alii sili ma faipule i le tupu ma ua latou faapea atu iā te ia: “Tariu e le tupu, ia soifua oe e faavavau.
7 Ua uma ona fono alii sili uma, o taʻitaʻi, o faipule, o leoleo maualuluga a le tupu, ma kovana, ina ia faavaeina se tulafono a le tupu, ma faamamalu se sā e faapea, o so o se tasi e faatoga atu i se atua po o se tagata i le 30 aso, seʻi vaganā ai le faatoga atu iā te oe le tupu e, ia lafoina o ia i le lua o leona.+
8 O lenei le tupu e, ia e faamaonia le tulafono ma ia sainia,+ ina ia lē mafai ai ona suia e tusa ai ma le tulafono a Metai ma Peresia, lea e lē mafai ona tatalaina.”+
9 O lea, ua sainia e le tupu o Tariu le tulafono ma le sā.
10 Ae ina ua iloa e Tanielu ua sainia le tulafono, ona alu atu lea o ia i lona fale, ua matala faamalama o lona potu pito i luga e faasaga i Ierusalema.+ E faatolu foʻi i le aso ona ia tootuli e tatalo ma avatu viiga i lona Atua, e pei ona ia masani ai.
11 I lenā taimi, ua lolofi mai nei tagata ma maua ai Tanielu o loo tatalo ma faatoga atu mo le finagalo malie o lona Atua.
12 Ona latou ō atu lea i le tupu ma faamanatu atu i ai le sā a le tupu: “Pe e te leʻi sainia ea se sā e faapea, o so o se tasi e faatoga atu i se atua po o se tagata i le 30 aso seʻi vaganā ai le faatoga atu iā te oe le tupu e, ia lafoina o ia i le lua o leona?” Ua tali mai le tupu: “Ua uma ona faamaonia lea mea e tusa ai ma le tulafono a Metai ma Peresia, ma e lē mafai ona tatalaina.”+
13 Ona latou faapea atu loa lea i le tupu: “O Tanielu o se tasi na aumaia faapagota mai i Iuta,+ ua lē āva o ia iā te oe le tupu e, po o le sā na e sainia, ae ua ia tatalo faatolu i le aso.”+
14 Ina ua faalogo le tupu i ia faamatalaga, ona matuā tigā ai lea o ia, ma ua ia mafaufau i se auala e laveaʻiina ai Tanielu; ua ia taumafai pea e laveaʻi o ia seʻia oo ina goto le lā.
15 Mulimuli ane, ua lolofi faatasi atu nei tagata i le tupu ma faapea atu i le tupu: “Le tupu e, ua e silafia e tusa ai ma le tulafono a Metai ma Peresia, e lē mafai ona suia se sā po se tulafono ua faamaonia e le tupu.”+
16 O lea, ua fai ai le poloaʻiga a le tupu, ma ua latou aumaia Tanielu ma lafo i le lua o leona.+ Ua faapea atu le tupu iā Tanielu: “O lou Atua, o lē o loo e auauna pea i ai, o ia e na te laveaʻiina oe.”
17 Ua aumai se maa ma tuu i le gutu o le lua, ma ua faamaufaailogaina ai e le tupu i lana mama ma le mama a ona alii sili, ina ia lē suia ai se mea e tusa ma le mataupu iā Tanielu.
18 Ona alu ai lea o le tupu i lona maota. E leʻi ʻai o ia i lenā pō, e leʻi manaʻo i ni faafiafiaga,* ma e leʻi moe foʻi o ia.
19 Ua tulaʻi le tupu i le vaveao ina ua tafa mai o ata, ma alu atu faavave i le lua o leona.
20 A o latalata atu o ia i le lua, ua ia valaau atu iā Tanielu i se leo faanoanoa. Ua fesili atu le tupu iā Tanielu: “Tanielu e, le auauna a le Atua soifua, po ua mafai ea e lou Atua o lē o loo e auauna pea i ai ona laveaʻiina oe mai i leona?”
21 Ona tali mai loa lea o Tanielu i le tupu: “Le tupu e, ia soifua oe e faavavau.
22 Na auina mai e loʻu Atua lana agelu e punitia gutu o leona,+ ma ou te leʻi afāina ai,+ auā ua ia silafia ua mamā lava aʻu i ona luma; e leai foʻi se mea sesē ua ou faia iā te oe le tupu e.”
23 Ona matuā fiafia ai lea o le tupu, ma ua ia poloaʻi atu ia ave aʻe Tanielu mai i le lua. Ua ave aʻe Tanielu mai i le lua, ma e leai se mea o ia na afāina, auā na ia faatuatuaina lona Atua.+
24 Ua faia e le tupu le poloaʻiga, ona aumaia ai lea o tagata na tuuaʻia* Tanielu, ma ua lafo i latou i le lua o leona, atoa ma o latou atalii ma a latou avā. E leʻi oo i latou i le taʻele o le lua ae ua osofaʻia e leona, ma ua nutililiia o latou ivi.+
25 Ona tusi atu lea o Tariu le tupu i nuu uma, o atunuu ma gagana o ē o loo nonofo i le lalolagi:+ “Tau ina ia tele lo outou filemu!
26 Ua ou tuuina atu nei se faatonuga i vaipanoa uma o loʻu malo, e ao ona gatete ma matataʻu tagata uma i luma o le Atua o Tanielu.+ Auā o ia o le Atua soifua ma e tumau o ia e faavavau. E lē faaumatia lona malo, ma e faavavau foʻi lana pulega.*+
27 E na te faasao,+ laveaʻi, ma faia faailoga ma mea ofoofogia i le lagi ma le lalolagi,+ auā na ia laveaʻia Tanielu mai i lima o leona.”
28 A o Tanielu, sa manuia lona olaga i le malo o Tariu+ ma le malo o Kuresa le Peresia.+
Faamatalaga Pito i Lalo
^ Pe atonu “e leʻi aumaia ni ē e tāina meafaifaaili.”
^ Po o le “faia tala taufaaleaga e uiga iā.”
^ Po o le “pule silisili ese.”
