Tanielu 7:1-28
7 O le tausaga muamua o le nofoaiga a Pelesara+ le tupu o Papelonia, na vaaia ai e Tanielu se miti ma ni faaaliga a o taoto i lona moega.+ Ona ia tusia lea o le miti,+ na ia faamaumauina foʻi le mataupu atoa.
2 Na faapea atu Tanielu:
“Na ou vaaia ni faaaliga i le pō, faauta foʻi! ua faagaepu e matagi e fā o le lagi le vasaloloa.+
3 Ua ō aʻe mai i le sami o manufeʻai tetelē e fā,+ ua ese le tasi mai i le isi.
4 “O le manufeʻai muamua e pei o se leona,+ ma na iai ona apaʻau e pei o se aeto.+ Na ou vaai pea i ai seʻia oo ina fafaʻi ese ona apaʻau, ma na siitia aʻe mai i le laueleele ma na faatūina i luga o vae e lua e pei o se tagata, na tuuina atu foʻi i ai le loto o le tagata.
5 “Faauta foʻi! o le isi manufeʻai, o le lona lua lea, e pei o se pea.*+ Ua sii aʻe le tasi vae o le manufeʻai, o loo ū i lona gutu ni ivi ʻasoʻaso se tolu; ma o le tala lenei ua fai atu iā te ia, ‘Inā tulaʻi ia e ʻai i tino e tele.’+
6 “Ina ua mavae ia mea, na ou vaavaai pea ma faauta foʻi! o le isi manufeʻai e pei o se nameri,*+ ua iai apaʻau e fā o se manulele i lona tua. E fā ulu o le manufeʻai,+ ma ua tuuina atu iā te ia le pule.
7 “Mulimuli ane, na ou vaavaai pea i faaaliga i le pō, ma ou vaaia ai le manufeʻai lona fā, e matuā feʻai ma mataʻutia, e ese foʻi lona malosi, ma e iai ona nifo uʻamea tetelē. Ua ia ʻaina ma nutililiia so o se mea, ua solipalaina foʻi i ona vae mea o loo totoe.+ E ese mai lava o ia mai i isi manufeʻai uma na muamua mai, ma e iai foʻi ona seu e sefulu.
8 A o oʻu manatunatu i seu, faauta foʻi! o le isi seu, e laʻitiiti+ ua oso mai i le vā o seu, ma ua fafaʻi ese i ona luma o seu e tolu mai i seu muamua. Faauta! ua iai mata e pei o mata o le tagata i lenei seu, ua iai foʻi le gutu e tautala faasausili* ai.+
9 “Na ou vaai pea seʻia oo ina tuuina mai ni nofoālii ma ua alaala ai+ Lē e mai anamuā ona aso.+ O ona ofu ua papaʻe e pei o le kiona,+ ma lona lauao e pei o fulufulu mamoe mamā. O lona nofoālii o le afi mumū ia; o ona uili o se afi mumū foʻi.+
10 Ua tafe le afi ma ua alu atu mai i ona luma.+ Ua auauna pea iā te ia le faitau afe,* ma ua tutū i ona luma le faitau miliona.*+ Ua nofoia le Faamasinoga,+ ua tatalaina foʻi tusi.
11 “Na ou vaavaai pea i lenā taimi ona o upu faasausili* na tautala mai ai le seu;+ na ou vaavaai pea seʻia oo ina fasimate le manufeʻai, ma faatamaʻia lona tino ma lafo i le afi o loo mumū.
12 A o isi manufeʻai ua totoe,+ ua aveesea la latou pule, ma ua faaumiumi ona latou ola mo se taimi ma se tau.
13 “Na ou vaavaai pea i faaaliga i le pō, faauta foʻi! ua afio mai i ao o le lagi se tasi e pei o le atalii o le tagata;+ ma ua tuu atu o ia e ulufale atu i Lē e mai anamuā ona aso,+ ua latou momoli atu foʻi o ia i Ona luma.
14 Ua tuuina atu iā te ia le pule,+ o le mamalu+ ma le malo, ina ia auauna iā te ia o nuu, o atunuu, ma gagana uma.+ O lana pule, o le pulega e faavavau e lē mavae atu, e lē faaumatia foʻi lona malo.+
15 “A o aʻu o Tanielu, ua popole loʻu loto i totonu iā te aʻu, ma ua ou fefe ona o faaaliga na ou vaaia.+
16 Na ou sōsō atu i se tasi o ē o loo tutū i inā, ma fesili atu iā te ia i le uiga moni o ia mea. Na ia tali mai ma faailoa mai iā te aʻu le uiga o ia mea.
17 “‘O nei manufeʻai tetelē, e fā lo latou aofaʻi,+ o tupu ia e toʻafā o le a tulaʻi mai i le lalolagi.+
18 Ae e maua e le ʻaupaia a Lē e Pule Aoao+ le malo,+ e fai mo i latou le malo+ e faavavau, ioe, e faavavau, faavavau lava.’
19 “Na ou fia iloa atili e uiga i le manufeʻai lona fā lea e matuā ese mai i isi manufeʻai uma; e matuā feʻai lava, e uʻamea ona nifo, e ʻapamemea ona matiuu, ma ua ia ʻaina ma nutililiia so o se mea, ua solipalaina foʻi i ona vae mea o loo totoe;+
20 na ou fia iloa foʻi seu e sefulu+ i lona ulu, ma le isi seu ua oso mai ai, lea ua paʻuʻū ai seu e tolu+ i ona luma, o le seu foʻi lea ua iai mata ma le gutu e tautala faasausili* ai, ma o lona tino mai e sili ona telē i isi seu uma.
21 “Na ou vaavaai pea i ai a o siitaua atu lenā seu i le ʻaupaia, ma ua manumalo iā i latou,+
22 seʻia oo ina afio mai o Lē e mai anamuā ona aso+ ma tuuina atu le iʻuga lelei o le faamasinoga mo le ʻaupaia a Lē e Pule Aoao,+ ma ua oo mai le taimi atofaina e maua ai e le ʻaupaia le malo.+
23 “O le tala lenei na ia fai mai: ‘O le manufeʻai lona fā, o lona fā lea o malo o le lalolagi. O le a ese o ia mai i isi malo uma, ma e na te ʻaina le lalolagi uma, ma solipalaina ma nutililiia.+
24 A o seu e sefulu, o tupu ia e sefulu e tulaʻi mai i lenā malo; e tulaʻi mai ai foʻi le isi pe a mavae i latou, e ese mai o ia mai i ē na iai muamua, ma e na te faamāina tupu e toʻatolu.+
25 O le a ia tautala e faasagatau i le Silisili Ese,+ ma o le a ia sauā pea i le ʻaupaia a Lē e Pule Aoao. E manaʻo o ia e sui taimi ma tulafono, ma e tuuina i latou i lona lima mo le taimi, ma taimi e lua, ma le ʻafa taimi.*+
26 Ae ua nofoia le Faamasinoga, ona latou aveesea ai lea o lana pulega, ina ia faatamaʻia ma faaumatia atoatoa o ia.+
27 “‘O le malo, o le pulega, ma le matagofie o malo i lalo o le lagi uma, ua tuuina atu ia i le nuu o le ʻaupaia a Lē e Pule Aoao.+ O lo latou malo o le malo e faavavau,+ e auauna ma usiusitaʻi i ai malo uma.’
28 “O le iʻuga lea o lenei mataupu. A o aʻu, o Tanielu, na ou matuā fefe ona o oʻu manatunatuga, ma na sesega ai oʻu foliga;* ae ua teu pea i loʻu loto le mataupu.”
Faamatalaga Pito i Lalo
^ Po o le “urosa.” O le upu Peretania, o le bear.
^ Tagaʻi i le Uiga o Upu.
^ Po o le “gugutu.”
^ Ara., “le afe o ni afe.”
^ Ara., “le sefulu afe faatele i le sefulu afe.”
^ Po o “upu gugutu.”
^ Po o le “gugutu.”
^ E faasino atu i le tolu ma le ʻafa taimi.
^ Po o le “suia oʻu foliga.”
