Tanielu 9:1-27
9 O le tausaga muamua o Tariu+ le atalii o Asueru, o sē na tupuga mai i Metai, o lē ua tofia e fai ma tupu i le malo o Kaletaia;+
2 o le tausaga muamua o lana nofoaiga, o aʻu o Tanielu, ua ou iloa mai i tusi,* e tusa ai ma afioga a Ieova iā Ieremia le perofeta, o le aofaʻiga o tausaga mo le faataunuuina o le faatafunaina o Ierusalema,+ e 70 tausaga.+
3 Ona faasaga atu lea o oʻu mata iā Ieova le Atua moni, ma faatoga atu iā te ia i le tatalo, faatasi ma le anapogi,+ ma ʻie talatala ma lefulefu.
4 Na ou tatalo iā Ieova loʻu Atua ma taʻutino atu ma faapea atu:
“Ieova e, le Atua moni, o Lē e sili ma o Lē e mataʻutia, o lē e tausia lana feagaiga ma faaalia le alofa faamaoni+ i ē e alolofa atu iā te ia ma tausia ana poloaʻiga,+
5 ua matou agasala, ua matou sesē ma faia mea leaga ma fouvale+ foʻi; ua matou liliuese mai i au poloaʻiga ma au faamasinoga.
6 Ua matou lē faalogo i au auauna o le ʻauperofeta,+ o ē na tautatala i lou suafa i o matou tupu, i o matou perenise, i o matou augātamā, ma tagata uma o le atunuu.
7 Ieova e, ua iā te oe le amiotonu, a o i matou ua masani ona māsiasi e pei ona iai i le asō, o tagata o Iuta, o ē o loo nonofo i Ierusalema ma Isaraelu uma, o ē e latalata ma ē e nonofo mamao i atunuu uma na e faataapeapeina ai i latou, ona o lo latou lē faamaoni iā te oe.+
8 “Ieova e, ua iā i matou le māsiasi, o o matou tupu, o o matou perenise, ma o matou augātamā, ona ua matou agasala iā te oe.
9 Ua iā Ieova lo matou Atua le alofa mutimutivale ma le faamagaloina o agasala,+ auā ua matou fouvale iā te ia.+
10 E matou te leʻi usiusitaʻi i le siʻufofoga o Ieova lo matou Atua, i le mulimuli i ana tulafono na ia tuu i o matou luma, e ala i ana auauna le ʻauperofeta.+
11 Ua solia e Isaraelu uma lau Tulafono, ma ua liliuese e ala i le lē usiusitaʻi i lou siʻufofoga, ona e sasaa mai lea iā i matou o le fetuu na faamalosia i se tautoga na tusia i le Tulafono a Mose le auauna a le Atua moni,+ auā ua matou agasala iā te oe.
12 Na ia faataunuuina ana afioga na ia fetalai mai ai e faasaga iā i matou,+ atoa ma o matou pule o ē na pule iā i matou,* e ala i le faaoo mai iā i matou o se mala mataʻutia; o se mala e leʻi oo muamua lava i lalo o le lagi atoa, e pei o lea na oo i Ierusalema.+
13 Na oo nei mala uma iā i matou+ e pei ona tusia i le Tulafono a Mose, ae e matou te leʻi ʻaiʻoi atu mo le finagalo o Ieova lo matou Atua, e ala i le liliuese mai i o matou sesē+ ma faaalia e matou te malamalama i lau upu moni.*
14 “Na mataala pea Ieova ma faaoo mai le mala iā i matou, auā e amiotonu Ieova lo matou Atua i galuega uma na ia faia; ae na matou lē usiusitaʻi i lona siʻufofoga.+
15 “O lenei, Ieova e lo matou Atua, o Lē na aumaia lou nuu mai i le atunuu o Aikupito i le aao malosi,+ ma e faia se suafa mo oe lava e oo mai lava i le asō,+ ua matou agasala ma faia mea leaga.
16 Ieova e, e tusa ai ma lau amiotonu uma,+ faamolemole, ia liliuese lou toʻasā ma lou toʻatamaʻi mai i lou aai o Ierusalema, o lou mauga paia; ona o a matou agasala ma agasala a o matou augātamā, ua fai ai Ierusalema ma lou nuu ma mea e faifai i ai i latou uma o loo siʻomiaina i matou.+
17 O lenei lo matou Atua e, ia e faafofoga mai i le tatalo a lau auauna ma ana faatoga, ma ia malamalama atu ou fofoga i lou malumalu+ ua faatafunaina,+ ona o lou lava suafa, Ieova e.
18 Loʻu Atua e, ia liliu mai ou fofoga ma e faafofoga mai! Ia silasila mai ou fofoga ma tagaʻi mai i le faatafunaina o i matou ma le aai ua faaigoa i lou suafa; auā ua matou lē faatoga atu iā te oe ona o a matou galuega amiotonu, ae ona o le tele o lou alofa mutimutivale.+
19 Ieova e, ia e faafofoga mai. Ieova e, ia e faamagalo mai.+ Ieova e, ia e uaʻi mai ma gaoioi! Loʻu Atua e, aua e te faatuai, ona o lau afio lava, auā o lou lava suafa ua faaigoa ai lou aai, atoa ma lou nuu.”+
20 A o oʻu tautala ma tatalo ma taʻutino atu laʻu agasala ma agasala a loʻu nuu o Isaraelu, ma fai atu laʻu talosaga mo le finagalo malie i luma o Ieova loʻu Atua e tusa ai ma le mauga paia o loʻu Atua,+
21 ioe, a o oʻu talanoa atu i le tatalo, o le tagata o Kaperielu+ lea na ou vaaia muamua i le faaaliga,+ ua sau iā te aʻu a o oʻu matuā vaivai lava, i le taimi e fai ai taulaga o le afiafi.
22 Ona ia fesoasoani mai lea ina ia ou malamalama, ua ia faapea mai:
“Tanielu e, ua ou sau e aʻoaʻo oe ina ia e maua le tofā mamao ma le malamalama.
23 Na ou maua le feʻau ina ua amata ona e faia au faatoga, ma ua ou sau ai e faamatala atu iā te oe, auā o oe o sē ua matuā faapelepeleina.*+ O lea, ia e mafaufau i lenei mataupu, ma ia e malamalama i le faaaliga.
24 “Ua faatulagaina vaiaso* e 70 i lou nuu ma lou aai paia,+ ina ia faamuta ai solitulafono, e faauma ai le agasala,+ e faia ai le togisala mo mea sesē,+ e aumaia ai le amiotonu e faavavau,+ e faamaufaailogaina ai foʻi le faaaliga ma le valoaga,*+ ma faauuina ai le Mea e Silisili Ona Paia.
25 E ao ona e iloa ma ia e malamalama, e amata mai i le alu atu o le poloaʻiga e toe fausia ma toe atiina aʻe Ierusalema+ seʻia oo atu i le Mesia*+ le Taʻitaʻi,+ e 7 vaiaso atoa foʻi ma vaiaso e 62.+ E toe faafoʻisia mai ai Ierusalema ma toe fausia, e faia le nofoaga faitele ma se alāvai e siʻomia ai le aai, ae e faia ia mea i taimi o puapuaga.
26 “O le a fasiotia le Mesia pe a mavae vaiaso e 62,+ ae e leai se mea e iā te ia.+
“O le a faatafunaina le aai ma le mea paia e se ʻautau a se taʻitaʻi o le a sau.+ O lona iʻuga foʻi o se tafeaga lea. O le a iai taua seʻia oo i le gataaga; o le faatafunaga, o le mea ua uma ona filifilia.+
27 “E faatumauina e ia le feagaiga mo le toʻatele i le vaiaso e tasi; ma i le ʻafa o le vaiaso, e na te faamutaina ai taulaga i manu ma taulaga o meaalofa.+
“O lē na te aumaia le faatafunaga, o le a sau o ia i luga o le apaʻau o mea e inosia;+ ma o mea ua uma ona filifilia o le a sasaa foʻi i lē o loo faatafunaina, ma o le a faaauau pea seʻia oo ina faaumatia.”
Faamatalaga Pito i Lalo
^ E faasino atu i tusitusiga paia.
^ Epe., “o matou faamasino o ē na faamasinoina i matou.”
^ Po o le “i lou faamaoni.”
^ Po o le “alofateleina.”
^ Epe., “le perofeta.”
^ E faasino atu i vaiaso o tausaga.
^ Po o “Lē ua Faauuina.”
