O le Tusi iā Tito 2:1-15
2 A o oe, ia e tautala atu pea i mea e ōgatusa ma aʻoaʻoga aogā.*+
2 Ia apoapoaʻi atu i tane ua matutua ina ia pulea a latou amio, ia matutua i o latou mafaufau, ia mafaufau lelei, ia malolosi i le faatuatua, o le alofa ma le tumau.
3 Ia faapena foʻi fafine ua matutua, ia pei a latou amio o tagata paia, e lē taufaaleaga, e lē faapologaina i le inu tele i le uaina, o ē e aʻoaʻo atu i mea lelei,
4 ina ia latou fautua i fafine talavou* ia alolofa i a latou tane ma a latou fanau,
5 ia mafaufau lelei, ia amio mamā, ia faia galuega i le fale, ia amiolelei, ia gauaʻi atu i a latou lava tane,+ ina ia lē upuleagaina le afioga a le Atua.
6 Ia faapena foʻi ona ʻaiʻoi atu pea i tauleleʻa ina ia mafaufau lelei,+
7 ia fai oe ma faaaʻoaʻoga o galuega lelei i mea uma lava. Ia faatagatamatua i le mafaufau a o e aʻoaʻoina atu mea moni,*+
8 e ala i le faia o faamatalaga mamā* ia e lē mafai ona taʻuleagaina,+ ina ia māsiasi ai ē e tetee mai, ma ia leai se upu leaga e faia e uiga iā i tatou.+
9 Ia gauaʻi atu pologa i o latou matai i mea uma lava,+ ma ia taumafai e faafiafia iā i latou ae lē tali upu,
10 aua foʻi neʻi gāoi mai iā i latou+ ae ia matuā maufaatuatuaina, ina ia latou faamamaluina i mea uma lava aʻoaʻoga a le Atua lo tatou Faaola.+
11 Auā ua faaali mai le agalelei faifua o le Atua, lea e maua ai e ituaiga uma o tagata le faaolataga.+
12 Ua aʻoaʻoina ai i tatou ina ia teena amioga faalēmataʻu ma tuʻinanauga o le lalolagi,+ ma ia ola ma le mafaufau lelei, ma le amiotonu, ma le faamaoni i le Atua i le faiga o mea a lenei lalolagi,*+
13 a o tatou faatalitali i le faamoemoe fiafia+ ma le faaaliga mamalu mai o le Atua sili, atoa ma lo tatou Faaola o Iesu Keriso,
14 o lē na foaʻi mai o ia lava mo i tatou+ ina ia faasaʻolotoina* i tatou+ mai i so o se solitulafono, ma faamamāina i tatou mo ia lava e fai ma ona tagata faapitoa, o ē e maelega i galuega lelei.+
15 Ia tautala atu pea i nei mea ma apoapoaʻi* ma aʻoaʻi atu ma le pule uma lava na tuuina atu iā te oe.+ Aua neʻi vaai maulalo se tasi iā te oe.
Faamatalaga Pito i Lalo
^ Po o “aʻoaʻoga e malosi ai; aʻoaʻoga e mālōlōina ai.”
^ Po o le “faasagatonu mafaufau o fafine talavou; aʻoaʻo i fafine talavou.”
^ Pe atonu “a o e aʻoaʻo atu ma le faamaoni.”
^ Po o “faamatalaga e malosi ai; faamatalaga e mālōlōina ai.”
^ Tagaʻi i le Uiga o Upu.
^ Ele., “togiolaina; laveaʻiina.”
^ Po o le “faalaeiau.”
