Mataupu 8

‘Na Uluitinoina ai i Laua e Le Agaga Paia’

1. E tusa ai ma upu a Iesu i le Mataio 28:18-20, o le ā le gaoioiga faapitoa a le agaga paia ua toe itiiti faagata?

O SE gaoioiga faapitoa a le agaga paia o le Atua o loo alualu pea mo le sefulu iva o senituri ma ua toeitiiti ona faamutaina lea. Pe a taofia, ona uma ai foi lea o le faia o soo mo Iesu le Mesia. Sa taʻua e le Alo o le Atua na toe faatuina lenei mea, i luga o se mauga i le itumalo Roma o Kalilaia, na ia faapea atu i ona aposetolo: “Ua tuuina mai ia te au le pule uma lava i le lagi ma le lalolagi. O lenei, ia outou o atu e fai nuu uma lava ma soo, ma papatiso atu ia te i latou i le suafa o le Tamā, ma le Atalii ma le Agaga Paia; ia outou aʻoaʻo atu ia te i latou ia tausi i mea uma ua ou fai atu ai ia te outou; faauta foi, ou te ia te outou i aso uma lava, e oo lava i le gataaga o le lalolagi.”—Mataio 28:18-20.

2. E ese ai mai i a Iesu Keriso faamamaluina, o le ā le isi o le a faatasi ma ona soo e oo i le ‘gataaga o lenei faiga o mea’?

² Sa matua malamalama lelei na aposetolo i lea agaga paia, o le igoa na tofia ai i latou e papatiso ai i latou uma, o e avea ma soo o Keriso mai i atunuu uma. A o auau faatasi i latou ma lo latou Matai o Iesu i se tulaga felatai mo ni tausaga, na latou matauina gaoioiga malolosi e auala i a te ia i le talaʻiga o le Malo, aʻoaʻo atu ma le faia o vavega. (Galuega 10:38) I lo latou toe Paseka i le po ma ia i a Nisani 14, 33 T.A., na ia fetalai i a i latou mo lo latou faamafanafanaga: “Ou te  fai atu foi i le Tamā, ona foai mai ai lea e ia ia te outou le tasi Fesoasoani, ina ia tumau pea o ia ia te outou e faavavau; o le Agaga lea e tupu mai ai le upu moni, e le mafai e le lalolagi ona talia.” (Ioane 14:16, 17) O lea, e le gata ina faatasi Iesu Keriso faamamaluina ua toetu, ma ona soo e oo i le ‘iʻuga o lenei faiga o mea,’ ae o le a faapea foi lo latou fesoasoani galue, le agaga paia, auā o le a faatasi ma i latou e “faavavau.”

3, 4. (a) Ai se ā ua laga ai le fesili pe faamata ua faatasi Iesu Keriso ma Atunuu Kerisiano i aso uma seia oo mai nei? (e) O le ā fa a Iesu i le mea moni e fuaina ai po o faatasi le agaga paia ma ē o fai mai o Kerisiano?

³ O se mea lena e faafiafiaina ai i tatou i aso nei! Ua tatou i ai nei i le vaitaimi ua taʻua o le ‘iʻuga o lenei faiga o mea.’ (Mataio 24:3) Talu mai le amataga o le Taua 1 o le Lalolagi i le 1914 o taualumaga o le lalolagi atoa foi i soo o Keriso ua faataunuuina ai mea na muai taʻua e Iesu i lana valoaga ua faataatia i le Mataio 24:3 sei oo i le 25:46. (Atoa foi ma le Mareko 13:3-37; Luka 21:7-36) O Iesu Keriso, ua tauaaoina le “pule uma lava” i le lagi ma le lalolagi, o loo faatasi pea o ia ma ona soo i “aso uma lava” e oo mai i le asō. Ua faapea foi ona faatasi o le “Fesoasoani” folafolaina ma i latou. Peitai i nei lava aso e toatele ē ua fai mai o i latou o soo o Keriso po o Kerisiano. E tusa ai ma fuainumera fou ua faasalalauina, e sili atu i le iva selau miliona tagata i lotu o Atunuu Kerisiano. Pe tatou te vaavaai ea, la, i Atunuu Kerisiano mo ni faamaoniga o le faatasi mai o Keriso i a te ia? Po o gaoioi ea le agaga paia i a te ia?

⁴ O lenei la, pe o le a taliina ea la le fesili e tusa ma le fuainumera o ē fai mai o i latou o Kerisiano? E leai, auā na fetalai Iesu o le mea e faaaoga e fuaina ai o galuega ia faaleatua:

“Tou te iloa i latou i o latou fua. . . . O laau uma e le  fua mai i fua lelei, e taia ia ma lafoina i le afi. O lea foi tou te iloa ai i latou i o latou fua.”

“E le sao atu i le malo o le lagi i latou uma o e fai mai ia te au, Le Alii e, Le Alii e; na o le na te faia le finagalo o loʻu Tamā o i le lagi.”—Mataio 7:16-21.

5. Po o faatumuina Atunuu Kerisiano i aso nei i “fua o le Agaga” po o “galuega a le tino”?

⁵ Mai i le taimi na faavaeina ai lotu o Atunuu Kerisiano i lona fa o senituri T.A. e le emeperoa faapaupau o Roma, o Konesetanitino le Sili, lē papatisoina, sa lē lelei ona fua. Ina ua mavae senituri e sefulu ono o avanoa e ati aʻe ai “fua o le agaga,” ua lē faatumuina lana faalapotopotoga lotu i le “alofa, o le olioli, o le filemu, o le onosai, o le mataalofa, o le agalelei, o le faamaoni, o le agamalu, ma le le gaoiā.” Peitai, ua faailogaina lotu i Atunuu Kerisiano e “galuega a le tino.”—Kalatia 5:19-23.

6, 7. I le fea itu ua tutusa ai Atunuu Kerisiano ma le faapotopotoga i Laotikaia, ma pe ua salamo ea o ia ma talia fautuaga a Iesu i lena faapotopotoga?

⁶ O lotu i Atunuu Kerisiano, o loo tala mai le tau pasae o ona tagata lotu, ua tai tutusa i se faatusatusaga i aso nei ma le “faapotopotoga i Laotikaia.” I le Faaaliga 3:14-18, ua faapea atu Iesu Keriso faamamaluina i lena faapotopotoga:

“Ua ou iloa au galuega, e te le maalili, e te le vevela foi; ou te loto ina ia e maalili, pe vevela; o lenei, ua e faaleogalua, e te le maalili, e te le vevela foi, o le mea lea ou te luai atu ai ia te oe i loʻu gutu. Auā ua e fai mai, Ou te se mauoa, ua faatamaoaigaina aʻu, ou te le mativa foi i se mea e tasi; a ua e le iloa o oe o le malaia, ma le pagatia, ma le mativa, ma le tauaso, ma le le lavalava; ou te fai atu ai ia te oe, ia e faatau atu ia te au le auro ua faamamāina i le afi, ina ia e tamaoaiga ai; ma ofu sisina ina ia e ofu ai, ina neʻi iloa le mā o lou le lavalavā; ma le vaimata e nini aʻi ou mata, ina ia e pupula ai.”

⁷ Pe ua salamo ea lotu i Atunuu Kerisiano ma talia lena fautuaga mai i a Keriso? O lana vaega iloga i taua e lua o le lalolagi, o lona sauaina  o lotu toaitiiti, o lona tuinanau i mea fai tino, o ona vaivaiga i tulaga tau i amio, o lona auai i mea faafaiga malo ina ia pulea ai ma faaauau pea le faiga o mea ua i ai nei, o nei mea uma atoa foi ma nisi mea e tele ua tali mai e Leai!

8. Ai se ā ua tatau ai i a Iesu faamamaluina ona faamalosia, e pei ona sa i ai, ona luai mai Atunuu Kerisiano mai ona fofoga ma lē faaaogaina o ia i le galuega o aso nei?

⁸ I lenei ‘iʻuga o lenei faiga o mea,’ ua leai se isi gaoioiga e faia e Iesu Keriso na o le “luai” mai o ia mai lona fofoga. I le itu faaleagaga, ua le maalili pe vevela i a te ia. E le mafai ona ia foloa o ia ina ia avea o sē e aoga mo ia. E “faaleogalua” o ia i lona faagutugutulua i le fai mai e Kerisiano ae i lea lava taimi ua fai o ia e ia lava ma uo ma mea faigaluega a lenei lalolagi. Ua le mafai ona taliaina e Iesu Keriso mai lona nofoaiga a tupu lenei mea. Ua silafia e Iesu o ia, o Atunuu Kerisiano, o se fili o le Atua o lona Tamā. (Iakopo 4:4) E le aumea faatasi o ia ma fili o lona Tamā. Ua le faatasi o ia ma Atunuu Kerisiano i se parataiso faaleagaga. O lea e le mafai ona faaaogaina e Iesu o ia i le galuega na ia muai taʻua mo ona soo faamaoni i lenei taimi.—Mataio 24:14.

9. Ona o le faaauauina o ana lava gaoioiga i le igoa o lotu, pe na faia ea e Atunuu Kerisiano ia lava ma mea itagia i nuu uma, pe po o ai na faasaga i ai lona ita?

⁹ Ua faia e Atunuu Kerisiano ana galuega ma tauave ana gaoioiga i le igoa o lotu. Pe ua avea nei gaoioiga ma mea e faia ai o ia ma mea e “inosia foi outou e nuu uma ona o loʻu igoa [o Keriso]”? (Mataio 24:9) Na i lo lea, ua taʻimua o ia i le faia o isi ma mea e inosia. O ai? Ua faailoaina o ai i latou e le tala faasolopito o onapo nei. I taualumaga o le Taua Muamua o le Lalolagi, sa i ai se vaega o tagata aʻoga o le Tusi Paia i atunuu eseese i le lalolagi na latou  faasinoina mai mai Tusi faagaeeina o tausaga o “nuu ese” sa faaiʻuina i le tausaga na gapa ai le Taua 1 o le Lalolagi—1914. (Luka 21:24, Authorised Version) Ona o lea, o atunuu uma ua fai mai o Kerisiano ma ē e lē o taʻutino mai, e ao ona faaumatia ona o lo latou tetee i le malo ua faavaeina o Iesu Keriso, le Tupu ua nofo tupu nei i le lagi i le itu taumatau o le Atua. O i latou uma e mananao e faasaoina mai le faaumatiaga o Atunuu Kerisiano, e manaomia ona o ese mai i ē ua na o ni Kerisiano i le taʻu, o ese mai i lotu o Atunuu Kerisiano. O na aʻoaʻoga toa sa faia e nei tagata aʻoga o le Tusi Paia mataalia, na faatosina ai le ita tele o le lalolagi atoa i a i latou.

10. I le Taua o le Lalolagi I sa tinoū Atunuu Kerisiano e faaumatia le fea lotu itiiti, ma i a auala?

¹⁰ O lenei vaega toaitiiti itagaia sa fai ina aʻe i Kerisiano ua iloaina o le International Bible Students. I a latou suesuega o le Tusi Paia ma galuega o le faalauaitele na latou faaaoga ai lomiga a le Watch Tower Bible and Tract Society, o lo latou ofisa ulu e i Brooklyn, New York. O nei tagata aʻoga o le Tusi Paia sa taulaʻi i ai osofaiga a Atunuu Kerisiano i le Taua 1 o le Lalolagi. Sa taumafai o ia e faauma i a i latou. O ona au failotu na latou tuuaia pepelo i latou ma uunaia taʻitaʻi o malo ma ē fai faamasinoga o le lalolagi e faia laasaga o taofiofiga i a i latou.

11. Ona o le ā, na afaina ai le Watch Tower Bible and Tract Society?

¹¹ Mulimuli ane sa faasāina lomiga a le Watch Tower Bible and Tract Society. I atunuu eseese sa molia i faamasinoga agaʻi i tagata aʻoga o le Tusi Paia. O nisi nofoaga sa faatosina tagatanuu lotonuu e faaita le toatele faasaga i lenei vaega filemu toaitiiti tuuaifuaina. I le tau e totogo ai mea o le 1918 sa avea faamalosia tane iloga o e sa auau faatasi ma le ofisa ulu o le Sosaiete i  Brooklyn e faafalepuipuiina i se fale puipui o le malo i lalo o moliga pepelo.

12. O le ā ua faaalia e le Faaaliga 11:7-12 pe na tumau le fasiotia e Atunuu Kerisiano o le galuega a molimau?

¹² Ona ua aveesea nei le peresitene ma le failautusi-teutupe o le Watch Tower Bible and Tract Society ma se toaono o ē tāua mo le lagolagoina o le galuega e faafalepuipui e pei o ni pagota, sa manatu Atunuu Kerisiano ua na fasiotia le faalapotopotoga o molimau faamaoni i le malo faavaeina o le Atua i aao o Iesu Keriso. Ae pe ua taiaina ea le ta oti? Mo sina taimi o tino o ē molimau i le Malo ua foliga mai ua oti. Ae pe na faatumauina ea ona le toe galulue? Ua tali mai le gagana faigofie o le Faaaliga 11:7-12 e faapea:

“Pe a uma ona la faaiuina la la mau, ona sii mai lea o le taua ia te i laua e le manu feai le ua alu ae nai le to e le gata, e manumalo foi o ia ia te i laua, ma fasioti ia te i laua. O la tino foi e i ai ia i le ala o le aai tele, o lona igoa faaleagaga, o Sotoma ma Aikupito, o le mea foi na faasatauroina ai lo tatou Alii. E tolu aso ma le vaeluagalemu o le aso e vaavaai ai i o la tino e nisi mai nuu, ma itu aiga, ma gagana eseese, ma atu nuu, ae latou te le mafafai ona ia tuuina atu o la tino i tuugamau. E fiafia foi e ua nonofo i le nuu ona o i laua, ma latou olioli, ma feaveai mea alofa; auā na faatigaina e ua nonofo i le nuu e ia perofeta e toalua.

“A ua mavae aso e tolu ma le vaeluagalemu o le aso, ona uluitinoina ai lea o i laua e le Agaga ola mai le Atua, ona la tutū i luga ai lea o la vae, ona oo ai lea o le mataʻu tele i e na matamata ia te i laua. Ona la faalogo lea i le leo tele mai le lagi, ua faapea atu ia te i laua, Ina o mai ia i luga nei. Ona la o ae ai lea i le lagi i le ao, ua matamata foi ia te i laua o e na fai i laua mo latou fili.”

13. Mai le vaaiga a Atunuu Kerisiano o le ā le lumanai mo le faalapotopotoga a molimau, ae peitai o le ā le mana na ia le faitauina?

¹³ Mo sina taimi puupuu, e pei o le tolu ma le afa aso, sa i ai le faalapotopotoga o nei tagata talaʻi o valoaga o le Tusi Paia ma molimau i le  malo faavaeina o le Atua i se faalumaina i luma o le lautele. O tagata na faapuapuagatiaina e ala i le talaʻiina o upu moni o le Tusi Paia, sa fiafia latou i le taofiofia o le molimau atu e uiga i le Malo. Mai le vaaiga a Atunuu Kerisiano, ua ‘mate’ le faalapotopotoga o molimau. Peitai, pe na fasiotia ea le agaga o le Atua, tuuina i le oti? Sa faamaonia e lei oti lea agaga a o taatia le tino o Iesu Keriso na faatautauina ua maliu i le tuugamau mo vaega o aso e tolu. O lea, i le sefuluiva senituri mulimuli ane, sa lei faamaonia ua ‘oti,’ a o taatia ua oti le faalapotopotoga o molimau o le Malo mo le “tolu ma le afa aso,” i se faaupuga faafaatusa.

14. Mo le faataunuuga o le Mataio 24:14, o le ā sa manaomia, ma o le ā na tupu i le tau e totogo ai mea i le 1919?

¹⁴ Ua oo atu nei le taimi i lona lima o tausaga o le ‘iʻuga o lenei faiga o mea.’ O le folafolaga a Iesu, i le Mataio 24:14, e manaomia ona faataunuuina: “E talaʻiina atu foi lenei tala lelei o le malo i le atu laulau uma e fai ma molimau i nuu uma; ona oo mai ai lea o le gataaga.” (Mataio 24:14) O Atunuu Kerisiano ua pisipisia i le toto o le taua a le lalolagi, sa le avanoa pe mamā e faataunuu lena valoaga. O le ā la sa tatau ona faia i ina? O le agaga o le Atua Silisili ese ua manaomia ona gaoioi. Sa faapea lava ona faia, e le ona e mo Atunuu Kerisiano faamasaa toto, ae peitai e mo molimau o le Malo na foliga mai ua ‘oti.’ E moni e pei o le ata i le Faaaliga 11:11, “ona uluitinoina ai lea o i laua e le Agaga ola mai le Atua, ona la tutū i luga ai lea o la vae.” O le tau e totogo ai mea i le tausaga muamua ina ua mavae le taua i le 1919, o le taimi lea mo le toe faaolaina o i latou.

15. O ai na ō e galue ina ua faasaolotoina mai, ma o le ā le vaaiga faafouina sa tuu atu i le Mataio 24:14?

¹⁵ O se mea na faateia ai, i le vaega mulimuli  o Mati 1919, ina ua tatala mai ofisa o le Watch Tower Bible and Tract Society ma a latou aumea pagota ma toe o atu loa e galulue. O le valoaga a Iesu i le Mataio 24:14 sa toe vaaia i se tulaga ua faafouina. Na i ai se faamatalaga maofa sa faia e faatatau i lena mea i le The Watch Tower itulau 199, 200 o Iulai 1, 1920. Sa faamanino mai ai e faapea o le talaʻiga i le lalolagi uma na valoia e le o se talaʻiga na faia e senituri e sefulu iva ua mavae o “Tausaga o le Tala Lelei,” mo se malo o sau. A o lenei, o le talaʻiga lea o se malo ua uma ona faavaeina. O lea o le talaʻiga ua avea o se galuega o le faalauiloa i le lalolagi atoa e faia talu mai le 1914 T.A. agaʻi i luma.

16. Pe sa faapefea ona afaina molimau i lena faaaliga, ma o le ā le mea na tupu sa taualuga ai le tausaga e 1919?

¹⁶ O lenei faaaliga mai le “agaga o le upu moni” ua tuuina atu ai se ola fou i le talaʻiga o le Malo e molimau. E avea o se faatumutumuga sili mo le 1919, le tausaga o le toe faaolaina, o le uluai tauaofiaga faalauaitele lea a molimau o le Malo sa faia mo aso e valu i Cedar Point, Ohio, ina ua mavae le taua. E faitau afe ē na auai mai le Iunaite Setete ma Manata. O le peresitene o le Watch Tower Bible and Tract Society, lea ua faasaolotoina nei i moliga pepelo i le taimi o le taua, na ia folafola le galuega fou o le Malo o i luma. Sa ia faia le lauga lautele i se aofia o le 7,000.

17. O le ā le pogai sa i ai i ina ma fefefe ai fili i le faaeaina o molimau mai se tulaga oti?

¹⁷ I le faateia i le toe faaolaina mai o molimau o le malo o le Atua ua faavaeina, sa paʻū ai le fefe tele i fili o le Malo, ae maise lava i luga o Atunuu Kerisiano. Afai na i ai se pogai na fefe ai fili i lena taimi, e ui ina sa na o se vaega totoe itiiti o molimau o le Malo, sa i ai se pogai sili e fefe ai i se taimi mulimuli ane ai. Auā e tuuina  atu i na molimau se tulaga aloaia i le lalolagi aoao e lei tuuina atu i soo o Keriso i soo se taimi muamua atu. Sa tosina i latou i sea aloaia maualuga e peiseai o se leo tele mai le lagi, ua faapea mai i a i latou: “Ina o mai ia i luga nei.”

18. Pe na faapefea i le 1922 ona faaalia e molimau na latou lē solomuli i tua mai le galuega e aumaia ai se faalauiloaina i le lalolagi atoa?

¹⁸ I le ulu atu i le faasalalauina o le Malo e siitia ai i latou i le maualuga i le lagi i le aloaia e le lautele, na latou le toe solomuli ai i tua. I le uunaiga a le agaga malosi o le Atua, na latou o atu ai i le galuega ma le lē fefe. Sa tupu tele le naunau i le tauaofiaga lona lua faalauaitele i Cedar Point, Ohio i le 1922, ina ua taunuu le peresitene o le Watch Tower Society i le tumutumuga o lana lauga autu ma alaga le valaau, “Faalauiloa, faalauiloa, faalauiloa, le Tupu ma lona malo”! O le faitau afe o le tauaofiaga sa pati mai i lea valaau faatupu malosi e talaʻi le Malo e oo i le iʻuga.

O LE TAIMI ATOFAINA MO LE MOLIMAU O LE MALO I LE LALOLAGI AOAO

19. Ai se ā ua avea ai le Faaaliga 11:15-18 o se tala fetaui mo Ioane e aumaia ina ua maea lana tala o le toe faaolaina o molimau?

¹⁹ E mo le talaʻiga o le Malo i le lalolagi aoao na uluitino ai le “Agaga ola mai le Atua” i molimau sa taofiofia i le 1919 T.A. Ua talafeagai la, ona sosoo mai e le aposetolo o Ioane lana tala o molimau e toalua faaeaina e faapenei:

“Ua ili foi e lona toafitu o agelu le pu, ona i ai lea i le lagi o leo tetele, ua faapea mai, O malo o le lalolagi ua avea mo lo tatou Alii ma lona Keriso, e fai foi o ia ma tupu e faavavau faavavau lava.”

“O toeaina foi e toaluafulu ma le toafa, o e nonofo i o latou nofoālii i luma o le Atua, ua latou faapaū fao, ma ifo i le Atua, ua faapea atu, Le Alii e, le Atua e ou le malosi uma lava, ua matou faafetai atu ia te oe, o  lē soifua, o le na soifua, o le a afio mai, ina ua e tago i lou mana tele ma ua fai oe ma tupu. Ua ita foi nuu, ona oo mai lea o lou toasa, ma ona po e faamasinoina ai e ua oti, ma taui ai i au auauna le au perofeta, ma le au paia, ma e ua matatau i lou suafa, o tagatānuu atoa ma alii, e fano ai foi i latou o e na fano ai le lalolagi.”—Faaaliga 11:15-18.

20. (a) Po o lena faasalalauga leoleoā o tala e mo na o le lagi? (e) Ona o le valoaga a Iesu, ua laga aʻe nei se mea manaomia mo ai?

²⁰ O lena alagaina ma le leo tele o le faasilasilaga, “O malo o le lalolagi ua avea mo lo tatou Alii ma lona Keriso, e fai foi o ia ma tupu e faavavau faavavau lava,” ua tatau ai nei ona toe faailo i le lalolagi e molimau faauuina a Ieova. Na ia tauaaoina lona tulaga tautupu o le lalolagi i le faaiʻuga o Taimi o Nuu ese i le 1914. O se tala lenei e lē mo na o le lagi. Ua aofia ai le lalolagi o le fanau a tagata. E tatau ona latou faalogoina. E faapefea ona latou faalogoina e aunoa ma ni ē talaʻia, ni isi e alagaina? Sa valoia e Iesu e talaʻia i le lalolagi aoao a o lei oo mai le iʻuga o lenei faiga o mea. O le vaega totoe o ona soo faauuina o i latou ia ua tofia e faia le talaʻiga talu mai le taimi o lo latou toe faaolaina faaleagaga i le 1919 agaʻi i luma.—Mataio 24:14; Mareko 13:10; Roma 10:14, 15; matau le Isaia 32:15.

21. Ai se ā ua le o se mea faafiapoto o soo faauuina o Keriso lo latou faia o le talaʻiga o le Malo, e ui lava ina ua taofi faapea e Atunuu Kerisiano, ma ai se ā ua moni ai e uiga i a i latou le Sakaria 4:6?

²¹ O le vaega totoe o soo faauuina o Iesu Keriso o e ua lautogia ma aauina atu e faia le talaʻiga. (Isaia 61:1-3) Afai e molia e Atunuu Kerisiano i latou ua faafiapoto i le faia o lenei talaʻiina o le Malo, ia, ai se ā ua le faia e lotu i Atunuu Kerisiano lava ia le talaʻiga? Ae e lē faia e ia faapea. Ua faia sana vaega i mea faafaiga malo a le lalolagi ma avatu ana faamanuiaga i le Malo  Aufaatasi lē Kerisiano. Ona o le vaega totoe e itiiti tele i le faatusatusa atu ma le faitau selau o miliona o tagata lotu o Atunuu Kerisiano, ua tatau ai ona moni lava i le vaega totoe faauuina e pei ona fetalai Ieova i le Sakaria 4:6: “E le o le fitafita, e le o le malosi, a o loʻu Agaga.”

22. Pe a faamasinoina i le talaʻiga o le Malo o loo faia, o ai i latou o ē ua faataunuu i ai le Ioelu 2:28,29?

²² O le agaga paia, sa valoia mai e Ieova na te liligi ifo i aso e gata ai, ua le taofia lona gaoioi, auā o loo papatisoina pea e le vaega totoe soo mo Keriso i le igoa o lena agaga. (Mataio 28:19, 20; Ioelu 2:28, 29; Galuega 2:14-21) O le fuafuaga folafolaina ua i tua o le liligiina ifo o lona agaga i luga o tagata uma lava ina ia mafai ai e ē ua latou maua ona perofeta ane. Ua faamaonia e mea moni ua faia pea e le vaega totoe o soo faauuina o Keriso lena perofetaga i nuu uma lava e fai ma molimau e mo le malo o le Atua. Ua fetaui ai la ma tulaga tonu, o i latou ia ua tatau ona avea ma ē ua liligi ifo i ai ma le tonu le agaga o le Atua. O lena agaga ua i tua o la latou talaʻiga i le lalolagi aoao. Ai se ā e finau fua i ai?

23. I taualumaga o tausaga e sefululua o na valoaga, o ai sa faia i ai se molimau, ma ai se ā sa manaomia ai lenei mea?

²³ Ina ua mavae tausaga e sefululua o na perofetaga i le malo o le Atua, ua atili ona malamalama ai le vaega totoe i a Ieova le Atua, o le Puna faalelagi o le agaga ua liligi ifo. Ua faateleina la latou molimau i a te ia ma faalauiloa i soo se mea faapea o lona suafa o lea le Suafa e silisili ese i mea uma o i ai. Ua latou matuā faataatitia i latou lava o Ana molimau ma ola ai e tusa ma le avea o i latou ma “nuu mo lona suafa.” (Isaia 43:10-12; Galuega 15:14) O lea sei aua neʻi o tatou faaitiitia le tāua ma le fetaui o lenei molimau i a Ieova atoa foi ma lana Mesia o Iesu. E tusa ai ma le valoaga a Ioelu 2:28-32  e tatau ona muamua i “le aso tele ma le silisili o Ieova.” Auā afai e lē taʻua i tagata, latou te le mafai ona valaau i le peresona saʻo mo le faaolataga i lena “aso.” Ua taʻu mai e le Ioelu 2:32 i a i tatou o soo se tasi na te “valaau atu i le suafa o Ieova” o le a “faaolaina” o ia. Sa tatau ona avatu le molimau i a Ieova!

24. I le 1931 o le ā le taʻu fou mo i latou na tali leleia e i latou o le vaega totoe faauuina, ma ai se ā sa le avea ai lenei o se gaoioiga tau ina faia?

²⁴ O lea la, e lē o se mea na tei lava ua tupu ina ua oo i le aso Sa, Iulai 26, 1931, i le tauaofiaga faalelalolagi a le International Bible Students Association i Columbus, Ohio, o le faitau afe o ē na usufono na talia ma le loto atoa se iʻugafono mo i latou ia taʻua i se igoa mai le Tusi Paia, e i ai sona uiga loloto. O le igoa na talileleia e le au usufono e ala i le avea o le Iʻugafono o “Molimau a Ieova.” Ina ua maea le gaoioiga sa faia i le tauaofiaga faalelalolagi i Columbus, sa talia foi lea e faapotopotoga i le lalolagi aoao o le International Bible Students Association se iʻugafono e tutusa faapea. Ma ua faapea ai ona faailoa i latou lava o Molimau a Ieova. O lenei mea ua le na o se gaoioiga tau ina fai a le vaega totoe faauuina o Isaraelu faaleagaga. I le faatinoina o avega tauave ua faaopoopo atu e le igoa mo i latou, ua latou ola e tusa ai ma lenei fuafuaga fou mo i latou.

25. Ua faapefea ona faaeaina molimau o le Malo toe faaolaina i se tulaga iloga e fesootai ma le suafa tau atua, ma e aofia ai ma le talia o le avega tauave o i le Isaia 43:10-12?

²⁵ E aunoa ma se faaletonu, o le “Agaga ola mai le Atua” ua uluitinoina le vaega totoe faauuina ma ua ia valaauina i latou i se tulaga matuai maualuga i luma o o latou fili uma. E aunoa ma le fefe i na fili, na latou talia le valaaulia mai le Atua, “Ina o mai ia i luga nei.” (Faaaliga 11:11,12)  Na latou le māmā e tauave le suafa tau atua, le suafa paia silisili. Ua avea la latou talaʻiga ma perofetaga i lea fale ma lea fale i lea aai ma lea aai e faavae i lena suafa ma iʻu ai i le faapaiaina o lena suafa i le lalolagi uma. Ua i ai nei ni siamupini o ona po nei mo le suafa silisili i le vateatea! E faanoanoa e faapea atu, sa le taulau i le nuu anamua o Isaraelu i le tino le mea na valoia i le Isaia 43:10-12 na faia muamua lava, i a i latou: “Ua fetalai mai Ieova, O outou o aʻu molimau, ma laʻu auauna o le na aʻu filifilia, . . . sa leai foi ia te outou se atua ese; o outou foi o aʻu molimau, o aʻu lava o le Atua, ua fetalai mai ai Ieova.” Ona ō lea o le vaega totoe faauuina o aso nei o Isaraelu faaleagaga ua latou talia ma le fiafia le avega tauave e avea ma Molimau a Ieova.

26. I le ā le tulaga faaleagaga e mafai ona faataʻitaʻia mai i le faapotopotoga o Sarataisa i Asia Itiiti e le mananao le vaega totoe ua toe faaolaina e toe paū atu i ai?

²⁶ Talu ai ua toe faafouina le vaega totoe o Isaraelu faaleagaga e le “Agaga ola mai le Atua,” latou te le mananao e toe paū atu i le tulaga na faataʻitaʻia mai e le faapotopotoga anamua o Sarataisa, i Asia Itiiti. Sa fetalai Iesu Keriso i ai:

“O mea nei ua fai mai ai le ua i ai Agaga e toafitu o le Atua, ma fetu e fitu, Ua ou iloa au galuega, ua ia te oe le igoa ua e ola, a ua e oti. Ia e mataala, ma ia e faatumauina mea ua totoe o le a mate; auā ou te lei iloa au galuega ona atoatoa i luma o le Atua. O lea foi ia e manatu ai i mea ua e maua ma ua e faalogo ai, ma ia e taofiina ai, ma ia e salamo. Afai foi e te le mataala, ou te alu atu ia te oe e pei o se gaoi, e te le iloa foi le itu aso ou te alu atu ai ia te oe.”—Faaaliga 3:1-3.

27. Ina ia puipuia mai le lē iloa o le ā le faaeaga, ua amanaia ai e le vaega totoe faauuina o Isaraelu faaleagaga upu a Iesu i le Faaaliga 2:5?

²⁷ I lenei lalolagi pouliuli i mea tau tapuaiga, e manaomia e le vaega totoe faauuina o Isaraelu  faaleagaga ona susulu atu o ni malamalama, faasusulu atu le malamalama i le suafa o le Atua ma ana fuafuaga mo le laveaiina o le fanau a tagata. Ua latou leoleoina ina neʻi le iloa lo latou faaeaga o le avea, i se tulaga tuufaatasia, o se tuugalamepa faaleagaga. Ua latou talia upu a Iesu Keriso faamamaluina i le faapotopotoga anamua i Efeso:

“Ia e salamo, ma e faia au uluai galuega; afai e leai, ona ou vave alu atu lea ia te oe, ou te aveesea lau tuugālamepa i le mea e tu ai, pe afai e te le salamo.”—Faaaliga 2:5.

O SE “MOTU O TAGATA E TOATELE” UA VALAAU I LE SUAFA

28. A o tau le Taua o le Lalolagi II, ina ua toe fai taua atu le manu feai ua alu aʻe nai le to e le gata i le vaega totoe, ai se ā na le toe faaluaina ai le mea na oo i a i latou i le Taua o le Lalolagi I?

²⁸ I le 1939 seia oo i le 1945 T.A. na faatamaia ai e se taua lona lua le fanau a tagata. Peitai pe na toe oo mea na tutupu i le Taua I o le Lalolagi i le vaega totoe toe faaolaina, o Isaraelu faaleagaga, o ē, talu mai le 1931, ua iloa o Molimau a Ieova? E ui lava i sauaga faatapuaiga e sili ona leaga i le Taua II o le Lalolagi, ina ua ‘alu ae le manu feai nai le to e le gata’ ma toe fai taua foi i le vaega totoe, o le tali e Leai! Sa le mafai e sauaga faigata ona manumalo e taofia le molimau i le Malo sa tauave e le vaega totoe faauuina. Sa tumau ai pea i le ‘faatumuina i le agaga’ mai lo latou Foai-Ola faalelagi. (Efeso 5:18) Sa latou taofi mau pea i le ola faaleagaga e ala i galuega o le molimauina o le Malo, e tusa lava pe fai faanana i lalo o le eleele, pe a tatau ai. Ina ua faasaina e malo o tagata ma faavaegaau e aua le toe talaʻia le tala lelei o le malo o Ieova ua faavaeina, sa latou tatalo i a te ia mo le lototele e faaauau ai ma le faamaoni i le faataunuuga o lo latou tofi e talaʻi.

29. E faapefea i le taunuuga o mea faatoa mavae atu i le vaega totoe ona pei o le mea na tupu o loo taʻua i le Galuega 4:31?

 ²⁹ O le iʻuga i a i latou sa pei o le tulaga o le faapotopotoga i Ierusalema, ina ua uma ona poloaia e le au failotu pule, e aua le toe talaʻia Keriso: “Ua tutumu foi i latou uma i le Agaga Paia, ma ua tautala atu i le afioga a le Atua ma le faamalosi.” (Galuega 4:31) I le uiga tutusa foi la, e oo mai i le asō, o loo tuuina atu e le vaega totoe faamatalaga i le faatutumuina o i latou i le agaga paia ma faamalosia ai e “tautala atu i le afioga a le Atua ma le faamalosi.” Ona o lea, ua le toesea ai le “tuugālamepa” a le vaega totoe mai i lona tulaga.

30. (a) O le ā e faia e le vaega totoe faauuina e uiga i le suafa o le Atua? (e) Ai se ā, ona o le Faaaliga 6:14-17, ua i ai se mafuaaga e fesili ai tagata e uiga i le vaega totoe pe ua na o i latou ia e “faaolaina” i le aso o Ieova?

³⁰ O le vaega totoe faauuina lava i latou, ua ‘valaau i le suafa o Ieova’ ma faalauiloa lea suafa i le lalolagi aoao. A e ui i lea, pe e na o i latou ea o aso nei ua faamoemoe “ina faaolaina” i le “aso tele ma le Silisili o Ieova,” o loo taulata mai? (Ioelu 2:31, 32) O lenei le fesili ua manaomia e ē e lē o i le vaega totoe ona mauaina se tali, auā e faatatau i le “aso silisili” fai mai le Faaaliga 6:14-17:

“Ua mavae atu foi le lagi [o pulega maualuluga faafaiga malo i luga o tagata] pei o se tusi taaia, o mauga ma motu uma foi ua aveeseina i mea sa i ai; O tupu foi o le lalolagi, ma alii sili, ma e ua tamaoaiga, ma taʻitaʻi o ʻau e taitoaafe, ma e ua malolosi, ma pologa uma, atoa ma tama a le eleele uma ua latou lalafi i ana ma papa o mauga; ua latou fai atu foi i mauga ma papa, Mafuli mai ia ia te i matou, ma tanumai i matou ai le silafaga a lē tietie i le nofoālii, ma le toasa o le Tamai mamoe; auā ua oo mai le aso tele o lona toasa, o ai foi se na te mafaia ona tu atu?”

31. (a) O le ā le tali i le fesili mo tagata ua faamatalaina i luga e uiga i le sao ese mai i le aso o Ieova? (e) O ai e lē aufaatasi ma tupu o le lalolagi ma a latou aumea i le valaau atu mo se puipuiga mai le lalolagi?

 ³¹ O le tali i le fesili a i latou uma ua faamatalaina i luga o ē ua le valaau i le suafa o Ieova mo le faaolataga, e faapea, E leai lava se tasi o i latou o le a tu faamaonia ma faasaoina i Lona “aso silisili.” O le matagi afā faafaatusa e faaumatiaina ai i latou ua taʻua i le mataupu e sosoo ai o le tusi, i le Faaaliga 7:1-3. Ina ua mavae lena faasinoga, ona taʻu mai lea i a i tatou o le 144,000 o auauna a le Atua o ē ua faamaufaailogaina i muaulu i le “faamaufaailoga a le Atua soifua.” Ua faavasegaina i latou nei o ni Isaraelu, e lē o Isaraelu i le tino na faapei o i latou na faamaonia le fasiotia o le Tamai Mamoe a le Atua, ae peitai o Isaraelu faaleagaga o ē mulimuli i le Tamai Mamoe o Iesu le Mesia. (Faaaliga 7:4-8; 14:1-5) Ina ua mavae atu le vaaiga o i latou nei, o le ā ua faailoaina mai i la tatou vaaiga? O ni tagata ua lē ma faitaulia o ē na lē auai faatasi ma tupu o le lalolagi ma a latou aumea i le valaau atu i mauga faafaigamalo ma papa maa e lalafi ai i latou mai le toasa o le Atua ma lana Tamai Mamoe. Latou te lē matataʻu i le toasa tau atua.

32. Ua tuu atu i a te ai e le “motu o tagata e toatele” lo latou faaolataga, ma o ā ni aoga mo i latou lava?

³² A o tatou faitau i le Faaaliga 7:9-17, sei matauina o lenei “motu o tagata” le ma faitauina e faapea na “o mai nai le puapuaga tele”:

“Faauta foi i le motu o tagata e toatele mai atu nuu uma, ma aiga, ma nuu, ma gagana eseese, e le ma faitaulia e se tasi, o loo tutū i latou i luma o le nofoālii ma luma o le Tamai mamoe, ua oofu i latou i ofu sisina, ua i ai foi lau pama i o latou lima; ua latou alalaga foi ma leo tetele, ua faapea atu, O i ai le faaolataga i lo tatou Atua o le tietie i le nofoālii atoa ma le Tamai mamoe.”

“. . . O i latou ia e ua oofu i ofu sisina, o ai ea i latou,  po o fea foi na latou o mai ai?...O i latou ia o e o mai nai le puapuaga tele, ua ta foi o latou ofu, ma ua faasinasinaina o latou ofu i le toto o le Tamai mamoe. O le mea lea ua latou i luma ai o le nofoālii o le Atua, ua latou auauna foi ia te ia i lona malumalu i le ao ma le po; o lē tietie foi i le nofoālii e mau ma i latou. Latou te le toe fia aai, e le toe fia inu foi e le ogotia i latou i le la, po o se tasi vevela; auā o le Tamai mamoe o loo i luma o le nofoālii na te fafaga ia i latou, ma taʻitaʻi ia te i latou i puna o vai ola; e sōloieseina foi e le Atua o loimata uma nai o latou mata.”

33. O ā isi o mea e faaesea ai lenei “motu o tagata e toatele” mai le 144,000 o Isaraelu faaleagaga na muai taʻua, ma ai se ā ua onomea ai ona latou auauna i le Atua i lona malumalu faaleagaga?

³³ O le “motu o tagata e toatelē e le o se vaega o le 144,000 faitauina o Isaraelu faaleagaga. Ua le faamaufaailogaina o latou muaulu i le “faamaufaailoga a le Atua soifua.” Ua le o vaaia i latou faapea o tutu i le Mauga o Siona faalelagi ma le Tamai Mamoe a le Atua. Ua le taʻua i latou faapea na “faatauina nai tagata, o e na faapolopoloina mo le Atua ma le Tamai mamoe.” I le tulaga tau atunuu, pe a faatusatusa atu i le 144,000 o Isaraelu faaleagaga, o i latou o tagata o Nuu ese, o tagata mai atunuu uma. Peitai, ua latou oo ina iloa Ieova le Atua ma vaaia o ia o loo tietie i le nofoalii o le vateatea, o le Pule Silisili Ese Aoao. Ua latou iloa ma taʻutino atu po o ai le Tamai Mamoe fasia a le Atua, auā ua latou faataʻitaʻia le faatuatua i lona malosi faamamā o le toto ona faamamā i latou ina ia i ai i se tulaga mamā i luma o le nofoalii o le Atua. I lea tulaga mamā, ua latou auauna ai i a te ia i le ao ma le po i le lotoā faalelalolagi o lona malumalu faaleagaga.

34. O le “motu o tagata o toatele” ua faavasegaina e faapea ua faia aʻe i ā “mamoe,” ma o le ā le faamoemoe ua i a i latou mo le ola i le lumanai?

³⁴ Ae faapefea le faamoemoe taatele ua latou  taofia? E lē o se faamoemoe faalelagi. Ua faatusaina i latou i mamoe i le Faaaliga 7:17, ua faia ai le Tamai Mamoe ma o latou Leoleo Mamoe. O “puna o vai ola” ua ia taʻitaʻi i ai i latou o “puna o vai” o loo tafe mai ai sauniuniga tau atua mo le ola faaletagata lelei atoatoa i le lalolagi parataiso folafolaina. O i latou o se vaega o “mamoe” faafaatusa o ē ua foaiina e le Leoleo Mamoe Lelei lona ola faaletagata mo i latou. Ina ua uma ona ia fetalai e uiga i le “lotoā” lea na tatalaina i ai e Ioane le Papatiso le faitotoa o ia o “le leoleo faitotoa” i le 29 T.A., ona fetalai mai lea o Iesu: “Ua ia te au foi isi mamoe e le o i lenei lotoā; e tatau ona ou taʻitaʻiina mai o i latou foi, e faalogo foi i latou i loʻu leo; ona tasi ai lea o le lafu mamoe, ma le leoleo mamoe e toatasi.” (Ioane 10:3, 16) O lea la, o le “motu o tagata e toatele” o le Faaaliga 7:9-17 e faia aʻe i “isi mamoe” o loo ola i aso nei ma e ua malilie e mulimuli i a Iesu Keriso, o le Leoleo Mamoe Lelei.

35. Faatasi ma ai e avea ai le “motu o tagata e toatele” o se ‘lafu mamoe e tasi’ i lalo o le “leoleo mamoe e toatasi”?

³⁵ O ai isi la, e tuufaatasi ma le “motu o tagata e toatele ona avea ai lea ma “lafu mamoe” e tasi i lalo o “le leoleo mamoe e toatasi”? E faatasi ma “mamoe” o le isi “lotoā” ua taʻua o le vaega totoe o le “lafu mamoe itiiti” o Isaraelu faaleagaga. (Luka 12:32; 1 Peteru 2:25) E ui ina e le o i ai le “motu o tagata e toatele” i lalo o le feagaiga fou sa puluvagaina e Iesu Keriso mo Isaraelu faaleagaga, ua ia faatasia i latou ma le vaega totoe faauuina e pei o se ‘lafu mamoe e tasi’ i se pa e tasi. E mai ana fea ma agaʻi i luma, na faia ai faapea e le Leoleo Mamoe Lelei?

36, 37. (a) O le ā le mea na tupu sa faailoga ai le amataina o le aoaoina o “isi mamoe”? (e) O le ā le faamoemoe sa faatulagaina i luma o i latou, ma mo lo latou fiafiaga sili?

 ³⁶ E talu mai le 1935 ma agaʻi i luma. I le faaiʻuga o le masina o Me o lena lava tausaga sa faia ai se tauaofiaga mo aso e lima a Molimau Kerisiano a Ieova i Washington, District of Columbia, U.S.A. Sa valaauliaina faapitoa i lena tauaofiaga tagata na auau faatasi ma le vaega totoe ae o e naunau e faasaoina i le “puapuaga tele” ma ulu atu e aunoa ma le oti, i le faiga fou a le Atua ma se lalolagi parataiso. Sa leai so latou faanaunauga faalelagi. O le ola e faavavau i se lalolagi parataiso na te faataunuuina atoatoa manaoga a o latou loto.

³⁷ Sa tele lava, lo latou olioli, i le tauaofiaga i Washington ina ua talanoaina e le peresitene o le Watch Tower Bible and Tract Society le mataupu o le “motu o tagata e toatele” ua taʻua i le Faaaliga 7:9-17, Authorized Version. Na ia faamanino ai o le “motu” e lē o se vaega faaleagaga po o se vaega e fanauagagaina; o le a lē maua le tulaga faaagelu i le lagi ina ia lagolago i le 144,000 o suli faatasi ma Keriso. E matuā patino lava o se vasega faalelalolagi e i ai se faamoemoe o le ola faaletagata lelei atoatoa e faavavau i le lalolagi parataiso i lalo o le malo o Keriso. Ua aoaoina nei e Ieova le Atua e auala i le Leoleo Mamoe Lelei o Iesu Keriso, lenei “motu i se gaoioiga faaleauaunaga faatasi ma le vaega totoe.

38. Sa faapefea ona tali le “agaga” o le “motu o tagata e toatelē i le faamoemoe na faatulagaina i luma o i latou, ma o le ā le faamoemoe ua taofia maualuga mo ē uma e saili i le Atua talu mai lena taimi?

³⁸ O loto o le faitau selau sa i ai i le tauaofiaga i Washington sa lei i ai se faalogona mafana i se faamoemoe e avea ai ma suli faatasi ma Keriso. Peitai ona ua faamaninoina nei le faamoemoe  faalelalolagi o i totonu o le Faaaliga 7:9-17, o o latou “agaga,” le malosi toe galue o loo i totonu o i latou sa gaee e talia ai mai o latou fatu. Sa latou patipati malosi mai e faaalia ai le talia o lena faamoemoe. Mulimuli ane, ina ua faitau le afe ma afe o isi i le mekesini o le Watchtower sa toe tusia ai le talanoaga o le “motu o tagata e toatele,” sa talia foi, e o latou “agaga.” Talu mai lena taimi, o le faamoemoe mo le “motu o tagata e toatele” ua tuuina atu matilatila mo i latou uma o ē saili mo le Atua i le lalolagi aoao. E faitau selau o afe ua papatisoina i le suafa o le Alo o le Atua ma ua tutu nei i le faasologa mo le faatinoina o lena faamoemoe matagofie.

39. Ona o ā eseesega i le va o i latou ma le vaega totoe faauuina, ua laga ai le fesili pe ua i ai i “isi mamoe” ua tuuina atu ma papatisoina le agaga paia i o latou luga?

³⁹ E mautinoa lava, o nei “isi mamoe” o le “motu o tagata e toatele” ua tuuina atu ma papatisoina, e lei filifilia e avea ma atalii faaleagaga o le Atua mo se tofi faalelagi. E le ni Isaraelu faaleagaga i latou. E lei avea i latou i totonu o le feagaiga fou ma le avanoa e avea ai ma “malo o ositaulaga, ma se nuu paia” o le Atua. (Esoto 19:5,6) E lei faamaufaailogaina i latou i le agaga o le Atua e fai ma faailoga o lo latou tofi faalelagi. E lei faauuina i latou i le agaga o le Atua mo le faamoemoe e avea ai ma suli faatasi ma Keriso i lona malo faalelagi. (Isaia 61:1-3; 1 Ioane 2:20, 27; 2 Korinito 1:21, 22) Peitai pe ua lē o i ai i o latou luga le agaga paia?

40. O ā faamaoniga faale-Tusi Paia ua i ai e faailoa ai pe e tatau i se tagata i le lalolagi ua tuuina atu atoatoa i le Atua ona tatou ona fanauina e le agaga o le Atua ina ia maua le agaga paia e gaoioi i luga o ia?

⁴⁰ Ma le maumauai i mea moni o le tali o le Ioe! Ae maise lava talu mai le 1935 T.A., na galulue ai le “motu o tagata e toatele” ma le vaega totoe  faauuina i le agaga. Ua latou aumaia ni faamaoniga maumaututu o loo gaoioi le agaga paia o le Atua i a i latou. E le manaomia e le tagata i le lalolagi ona fanaua i le agaga o le Atua ina ia faagaoioia i ai Lona malosi galue i a te ia. Vaai i le perofeta o Mose, i le Faamasino o Otinielu, i le Faamasino o Kitiona, i le Faamasino o Samasoni, i le Tupu o Tavita, i a Ioane le Papatiso. Ioe, vaai i perofeta uma, o ē na muamua atu i Kerisiano, sa i ai i a i latou le agaga o Ieova e faagaeeina i latou e tusitusia tusi o le Tusi Paia mai le Kenese e oo i le Malaki. E moni e lei folasia i luma o na tagata anamua, se faamoemoe faalelagi, a e ui i lea sa tuu e Ieova lona agaga i luga o i latou auā na latou tuuina atu i latou lava i a te ia ma ofoina atu i latou ma le alofa mo lana galuega. Na ia faatumuina i latou i lona agaga paia. Sa gaoioi lea i a i latou.

41. Ona o le toaitiiti o le fuainumera o i latou ua faia aʻe ai le vaega totoe faauuina i aso nei, ua faapefea ona tagai i ai le Atua i le galuega o le tauaveina o le talaʻiga o le Malo ma le faia ma soo i le lalolagi aoao ua faataunuuina?

⁴¹ I aso nei, pe taofia o le vaega totoe o Isaraelu faaleagaga ua faauuina i le agaga paia? E tusa ai ma le fuainumera o i latou o e tagofia le falaoa ma le uaina faafaatusa o le faamanatuga faaletausaga o le Talisuaga a lo tatou Alii, o lo latou numera pe a ma le 9,200 i le taimi nei. Peitai o i latou o Kerisiano papatisoina ua lolo atu ma le agaga talisapaia mo le faamoemoe o le ola e faavavau i se parataiso i inei i le lalolagi, ua sili atu i le lua miliona le fuainumera. O ai, la, o faia le vaega tele o le talaʻiga o le Malo ma fai ma soo i le lalolagi aoao. (Mataio 24:14; 28:19, 20) O le vaega totoe faauuina ua tagata matutua, ua itiiti foi le numera, na te le mafaia lava ona tauave le tele o le galuega. O lea, o le agaga o le Atua, ua gaoioi malosi i luga o le “motu  o tagata e toatele” o “isi mamoe,” ua mafaia ai e i latou faatasi ma le vaega totoe faauuina ona faia le galuega molimau i le lalolagi aoao e le ma faatusatusaina i tala tuufaasolo Kerisiano.

42, 43. (a) Mo le faataunuuga o le faalauiloaina i le lalolagi aoao o le malo faa-Mesia, o ai ua avatu i ai e ē o auai le faamalo? (e) Ona o ā mau i le Tusi Paia, latou te talitonu ai ua i a i latou le taʻitaʻiga faaagelu?

⁴² O le faasalalauina o le Tala Lelei o le Malo ua alagaina nei faataamilo i le kelope atoa i atunuu ma motu o le sami e sili atu i le 200. E sili atu i le 46,000 faapotopotoga o le au folafola ma le maelega o le Malo ua lauolaola i se parataiso faaleagaga i le lalolagi aoao. *

⁴³ O lenei faasalalauga mamao o le malo o le Atua mo lana faiga fou, e oo lava i vaega aupito mamao o le lalolagi, sa manaomia ai le tele o le galue mamafa i a i latou ua auai i le faasalalauga, ma e aunoa ma se totogi. (Mataio 10:8) Peitai o lenei au faailo o le Malo, o molimau Kerisiano a Ieova, latou te lē ave le faamalo i a i latou lava mo lenei taunuuga matagofie. Ua latou taʻutino ua na o ni mea faigaluega i latou i aao o le Atua. O le tōa ma le malosi e faia ai lenei galuega atofaina ua latou faaee i le agaga o le Atua. Ua latou utagia sa latou maua foi le lagolagoina ma le taʻitaʻiga a agelu a o latou faia le galuega faamaonia a le Atua. Ua latou talitonu i le mea ua fai mai ai le Eperu 1:14 o loo tautala e uiga i agelu faalelagi o ni “agaga e auauna . . . i latou uma, ua aauina e auauna ona o i latou o e a maua le ola.” I le ma lea foi, e faatatau tonu i lo tatou taimi, ‘o le iʻuga o lenei faiga o mea,’ na fetalai Iesu: “E aauina atu foi e ia o ana agelu ma le leo tele o le pu, latou te faapotopoto foi i e ua filifilia e ia mai matāmatagi e fa, e amata i  le tasi tuluʻiga o le lagi, e oo i le tasi tuluʻiga.”—Mataio 24:3, 30, 31.

44. (a) Ai se ā ua le o se mea e uiga ese ai le faaaogaina o agelu mai le lagi? (e) Mo le vavaeeseina o Kerisiano moni mai ē faatagafai, ma mo le aoaoina o le “motu o tagata e toatele” o isi mamoe, o ai e ona le fesoasoani le vaaia na muai valoia?

⁴⁴ Pe e i ai ea se mea uiga ese i lena mea? E leai! Auā foi, anamuā, a o lei aulia taimi faa-Kerisiano sa fesoasoani ai agelu faalelagi e fesoasoani ma taʻitaʻia tagata tapuai faatuatua o Ieova le Atua. (Kenese 32:1,2,24-30; Esoto 14:19,20; 2 Tupu 6:15-17; Isaia 37:36; Salamo 34:7) I aso nei o le taimi mo le aoaoina faatasi o suli moni o le malo o le Atua ma le vavaeeseina o i latou mai Kerisiano faatagafai o Atunuu Kerisiano ma mo lenei taimi faigata o le a manaomia e le vaega totoe faauuina le fesoasoani a agelu e tusa ai ma le Mataio 13:39-43, 49, 50 ma le Faaaliga 14:6. O le mea lea, o agelu i lalo o Keriso le Tupu e tauave sa latou vaega o le taʻitaʻiina le vaaia i le aoaoina o le vaega totoe o ona soo faauuina, “e ua filifilia.” O agelu i lalo o lana faatonuga na te faaaoga foi e aoaoina se motu o tagata e sili atu ona tele na i lo le vaega totoe faauuina, ua taʻua lea, o le “motu o tagata e toatele” o ana “isi mamoe.”—Mataio 25:31-46; Ioane 10:16.

O SE TOETU FAAFAATUSA

45, 46. (a) Ai se ā ua leai ai se faavae mo le inoino i le aso o mea iti e tusa ai ma le vavega matagofie a le Atua ua muai faaataina mai i le Esekielu 37:1-14? (e) Ina ia toe faanofoina i lona laueleele Isaraelu sa faaaunuua, o le ā o le a tuuina e Ieova i totonu o i latou?

⁴⁵ Ona, o lenei, pe o tumau ea se faavae mo soo se tasi e “inoʻino i le aso o mea iti”? (Sakaria 4:10) Maeu le ofoofogia o le gasologa o mea na faataunuuina i tua i le 1919 T.A., na “uluitinoina ai lea o i laua e le Agaga ola mai le Atua,” o lona uiga, i totonu o le vaega totoe na foliga  mai ua oti! (Faaaliga 11:11) Sa avea o se vavega faaonapo nei o le toetu i le vaega a le Atua e ou le Malosi uma lava. E maua lona faafetauia i le mea na vaaia e le perofeta o Esekielu, ina ua i a te ia le vaaiga o le laugatasi sa tumu i ivi taapeape mamago o tagata Isaraelu ua oti. O tino o na tagata Isaraelu sa toe faafoisia, ae na taatitia pea tino ua oti. O lea, i le usiusitai i le poloaiga mai le Atua, sa vavalo ai Esekielu i o latou luga. O le ā, na tupu? “Ona ulu ane lea o le mānava i totonu ia te i latou, ona latou ola ai lea, ma tutū i luga i o latou vae, o le itu taua e matuā tele lava.”—Esekielu 37:1-10.

⁴⁶ Pe sa faataunuuina le vaaiga a Esekielu i luga o tagata filifilia o le Atua a o faavaivaia i Papelonia? Ina ia faamautinoaina i a i latou o lenei vaaiga o le a faataunuuina, na faagaeeina e Ieova Esekielu e faapea atu: “Ou te tuuina atu foi loʻu Agaga i totonu ia te outou, e ola ai foi outou, ou te faanofofilemuina foi outou i lo outou lava laueleele; ona outou iloa ai lea o aʻu lava o Ieova, ua ou fai atu ai, ou te faia foi, o loo fetalai mai ai Ieova.”—Esekielu 37:11-14; faatusatusa Isaia 32:15-18.

47. (a) Ina ua toe faafoisia lana vaega totoe faauuina, mo le ā le fuafuaga na ia tuu atu ai lona agaga i o latou luga? (e) E faapefea ona tutusa auga o lenei toe faaolaina ma le Roma 8:11?

⁴⁷ I lo tatou luafulu senituri, ina ua mavae le iʻuga o le Taua o le Lalolagi I i le 1918, sa toe faaolaina faaleagaga le vaega totoe faauuina ma savavali ese mai le faaaunuua i Papelonia le Sili, o le emepaea faalelalolagi o lotu pepelo, ina ia toe faaauau la latou auaunaga o le Malo. Mo lena taunuuga, sa toe faafoi i latou e Ieova i lo latou tulaga tatau i le lalolagi, i se faiā faamaonia ma ia. Na ia tuu lona agaga i o latou luga, e galulue ai ma le saoloto, e tautala atu ma le lē meia, i  le auaunaga o le Malo. “O le mea o i ai le agaga o le Alii, o i ai le saʻolotoga.” (2 Korinito 3:17) Talu mai lena taimi, maeu le mataola o le vaega totoe faasaolotoina ua faaalia i lana auaunaga tau tupu, ma mulimuli ane, o le “motu o tagata e toatele” o a latou aumea galulue e pei ni mamoe! O le mana galue paia o Ieova ua faapogai ai, e pei lava ona faamanatu mai i a i tatou e le Roma 8:11, e faapea: “A e afai e nofo i totonu ia te outou le Agaga o le na toe faatu mai ia Iesu nai e ua oti, e faaola mai foi o outou tino auga vale e le na toe faatu mai ia Keriso nai e ua oti, e lona Agaga o loo nofo i totonu ia te outou.”

48. O le ā le malosi ua faatasi ma le vaega totoe aufaatasi ma le “motu o tagata e toatele”?

⁴⁸ O lea, ia agaʻi i luma, aufaatasi, Le vaega totoe ma le “motu o tagata e toatele”! O le mana le mafaatoilaloina o loo i tua o le faiga fou a le Atua o sau ua i a te outou. (Sakaria 4:6) O lo outou talaʻia pea o “lenei tala lelei o le malo” o le a aumaia ai atili ni tiga ma le faalumaina. Peitai o lo outou tautiga mo lenei ma mo Ieova le Atua ma lana Keriso o se faaeaga e aupito sili ua avanoa. Ia manatua: “Afai e upuleagaina outou ona o le suafa o Keriso, amuia outou; auā o loo tumau ia te outou le Agaga mamalu o le Atua.” (1 Peteru 4:14) O le upuleagaina mai fili o le malo o le Atua ua lē o se faailoga lea o lona lē faamaonia. O lo outou tutumau i ia mea o se faamaoniga lea ua i a te outou le agaga o le Atua. O le i ai o lona agaga i a te outou o se mamalu, a e le o se maasiasi i a te outou. E faamamaluina outou ma faia outou e faapei o Keriso. E faailogaina ai outou o ē ua tatau i ai le galuega mamalu i e faiga fou a le Atua o sau. O lea ō ia faitauina outou ua faafiafiaina ma maualuga le faaeaina!

[Faaopoopoga i lalo]

[Fesili mo le Suʻesuʻega]